نازارباەۆ سيريا بويىنشا كەلىسسوزدەردى استانادا وتكىزۋدى قولدادى

قازاقستان پرەزيدەنتى نۇرسۇلتان نازارباەۆ سيرياداعى قاقتىعىسۋشى تاراپتاردىڭ كەلىسسوزدەرىن استانادا وتكىزۋگە كەلىسىم بەردى. بۇل جونىندە ەلباسىنىڭ بۇگىن رەسەي جانە تۇركيا باسشىلارى ۆلاديمير پۋتين جانە تايىپ ەردوعانمەن تەلەفون ارقىلى اڭگىمەسى ناتيجەسىندە ءمالىم بولدى. رەسەي مەن تۇركيا پرەزيدەنتتەرى ەلباسىمەن كۇن تارتىبىندەگى وزەكتى وڭىرلىك جانە حالىقارالىق ماسەلەلەردى تالقىلادى. رەسەي مەن تۇركيا كوشباسشىلارى سيرياداعى قاقتىعىسۋشى تاراپتار اراسىنداعى احۋالدى بەيبىت رەتتەۋگە ارنالعان كەلىسسوزدەردى استانادا وتكىزۋگە مۇددەلى ەكەندىكتەرىن ءبىلدىردى. نۇرسۇلتان نازارباەۆ بۇل باستامانى قولداپ, قازاقستان ەلورداسىندا مۇنداي كەلىسسوزدەر جۇرگىزۋ ءۇشىن قاجەتتى جاعداي جاساۋعا دايىن ەكەنىن مالىمدەدى» دەلىنگەن اقوردانىڭ ءباسپاسوز قىزمەتى تاراتقان حابارلامادا. رەسەي مەن تۇركيا باسشىلارى نۇرسۇلتان نازارباەۆتى قازاقستان رەسپۋبليكاسى تاۋەلسىزدىگىنىڭ 25 جىلدىعىمەن قۇتتىقتاپ, قازاقستان حالقىنا باق-بەرەكە تىلەپ, ودان ارى ءوسىپ-وركەندەي بەرۋىنە نيەتتەستىك بىلدىرگەن. ۆ.پۋتينمەن اڭگىمەلەسۋ بارىسىندا جوعارى ەۋرازيالىق ەكونوميكالىق كەڭەستىڭ الداعى وتىرىسىنا جانە ۇقشۇ ءسامميتىن وتكىزۋگە دايىندىق ماسەلەلەرى تالقىلاندى. تۇركيا پرەزيدەنتىمەن سويلەسۋ كەزىندە ر.ت.ەردوعان استاناعا بيىلعى 12 جەلتوقسانعا جوسپارلانعان ءىس-ساپارىنىڭ كەيىنگە قالدىرىلعانىنا وكىنىش ءبىلدىردى. تۇركيا كوشباسشىسى الداعى ۋاقىتتا ءبىزدىڭ ەلگە كەلۋگە دايىن ەكەنىن ايتتى. قازاقستان پرەزيدەنتى سيرياداعى قاقتىعىستى بەيبىت رەتتەۋگە باعىتتالعان حالىقارالىق دەڭگەيدەگى ۇمتىلىستاردى ءبىزدىڭ ەلدىڭ اۋەلدەن قولداپ كەلە جاتقانىن اتاپ ءوتتى. 16 جەلتوقسان كۇنى ۆلاديمير پۋتين تۇركيالىق ارىپتەسىمەن تەلەفون ارقىلى اڭگىمە كەزىندە سيريادا قاقتىعىسۋشى تاراپتار كەلىسسوز جۇرگىزەتىن الاڭ رەتىندە استانانى تاڭداۋدى ۇسىنعان بولاتىن. «قازاقستان استاناسى ونداي الاڭ بولار ەدى. ەگەر قاقتىعىسۋشى تاراپتار كەلىسسە, ءبىز پرەزيدەنت نازارباەۆقا وسى پروتسەستى قولداۋدى سۇراپ ءوتىنىش جاسايمىز» دەگەن-ءدى رەسەي باسشىسى.