ورالدا ءوز قارجىسىنا مەدپۋنكت سالعان كاسىپكەر «جىل مەتسەناتى» اتاندى

باتىس قازاقستان وبلىسى قازتالوۆ اۋدانىندا كاسىپكەر نۇرلىباي جولدىباەۆ «جىل مەتسەناتى» اتاندى, دەپ حابارلايدى قازاقپارات. اۋدان اكىمى نۇرلان بەكقايىردىڭ ايتۋىنشا, ن.جولدىباەۆ تاۋەلسىزدىكتىڭ تورقالى تويىنا وراي تۋعان جەرى تالدىاپان اۋىلدىق وكرۋگىنە قاراستى سارىقۇدىق ەلدى مەكەنىندە ءوز قاراجاتى ەسەبىنەن 5,2 ملن تەڭگەگە مەدپۋنكت سالىپ بەرگەن. جۋىردا اشىلعان مەدپۋنكتتە فەلدشەرلىك جانە اكۋشەرلىك كابينەت, ەكپە بولمەسى جاڭا اپپاراتتارمەن قامتاماسىز ەتىلگەن. ەندى اۋىل تۇرعىندارى الىسقا بارماي-اق وسىندا ەمدەلە الادى. ءبىر ايتا كەتەرلىگى, كاسىپكەر اتالمىش عيماراتتى مەملەكەت يەلىگىنە ەشقانداي قايتارىمسىز بەرىپ وتىر. «وبلىس كولەمىندە كاسىپكەردىڭ ءوز اۋىلىنا وسىلايشا جاڭا عيمارات سالىپ بەرۋى ءبىرىنشى رەت دەۋگە بولادى. ونىڭ بۇل ءىسى ۇلگى ەتۋگە تۇرارلىق. جالپى, اۋداندا كاسىپكەرلەردىڭ ءوز اۋىلدارىنا قولۇشىن بەرۋى ءبىر بۇل ەمەس, مۇنداي جاقسى ءۇردىس الداعى ۋاقىتتا دا جالعاسىن تابا بەرمەك», – دەدى اۋدان اكىمى نۇرلان بەكقايىر.