قازاقتىڭ قادىرىن ءبىزدىڭ اۋلەت جاقسى بىلەدى

ارعى اتالارىمىز قازاقستانعا شامامەن وتكەن عاسىردىڭ 30-جىلدارعى قۋعىن-سۇرگىن كەزىندە قونىس اۋدارىپتى. اتام سول كەزدە نەبارى التى جاستا عانا ەكەن. ول جەتىمدىكتى دە, جوقشىلىقتى دا, ايتەۋىر ءومىردىڭ  بار اۋىرتپالىعىن باسىنان وتكىزگەن. ايتسە دە, ۇل-قىزدارىنا جاقسى تاربيە بەرىپ, جاقسىلىقتى ۇمىتپاۋعا باۋلىدى. انام قىزىلوردادا, اكەم الماتى وبلىسىنداعى ۇشتوبە قالاسىندا دۇنيەگە كەلگەن. قىسقاسى, ءبىزدىڭ اۋلەتتىڭ ءۇشىنشى ۇرپاعى قازاقستاندا ءومىر ءسۇرىپ جاتىر. قازاقستان تاۋەلسىزدىك العان ساتتە «الداعى تاعدىرىمىز قالاي بولادى؟» دەپ الاڭداعانىمىز راس. دەگەنمەن, قازاق جەرىندە ءبىرجولا  قالۋعا بەكىندىك ويتكەنى, تۋعان-تۋىستارىمىزدىڭ ءبارى وسىندا, اتا-بابالارىمىز دا وسىندا جەرلەنگەن. ونىڭ ۇستىنە ءبىز باسقا جەردەن باقىت تاپپاسىمىزدى بۇرىنان دا بىلەتىن ەدىك. ونىڭ قىسقاشا تاريحى تومەندەگىدەي. ءبىز قىزىلوردادا وتە جاقسى تۇردىق. اتام سوۆحوز ديرەكتورى, اكەم اسكەري جۋرناليست ەدى. مەنىڭ تۋىلعانىما ءبىر اي تولعاندا اكەمنىڭ قىزمەت بابىمەن تامبوۆ قالاسىنا كوشۋىنە تۋرا كەلىپتى. تۋىستارىمىز  اكەمە قونىس اۋدارماۋعا اقىل-كەڭەستەرىن ايتقانىمەن, ول تىڭداماپتى. سونىمەن نە كەرەك, اتتاي التى جىل رەسەيدە تۇردىق. بىراق وتە قيىن بولدى. قالىڭ قازاقتىڭ ورتاسىندا ءوسىپ-ونگەندىكتەن, اكە-شەشەم جاڭا ورتاعا كوندىگە الماپتى. انام ءتىپتى شىداماعان, ونىڭ ۇستىنە توركىنى دە قازاقستاندا. ولار وزدەرىن رەسەيدە بوتەن ادام سياقتى سەزىنەدى. مىنەز-قۇلقى, ءىس-ارەكەتى تۇگەل دەرلىك قازاقتاردان اۋمايتىن اكە-شەشەم 1980 جىلى قازاقستانعا قايتا ورالدى. قازاقستانعا العاش قونىس اۋدارعاندا قازاق حالقى كومەكتەسپەگەن بولسا, ءومىر ءسۇرۋىمىز ءتىپتى قيىن بولار ەدى. اتا-اجەمىز بالالارىنىڭ اۋزىنان تاماعىن جىرىپ بەرگەن جەرگىلىكتى حالىققا ىلعي دا العىس جاۋدىرىپ وتىراتىن. قازاقستاندىق ءاربىر كورەي قازاق جەرىنە كەلۋ تاريحىن جاقسى بىلەدى. سول ءۇشىن شۇكىرشىلىگىن ايتىپ وتىرادى. پرەزيدەنت نازارباەۆ 1 ناۋرىزدى العىس ايتۋ كۇنى دەپ بەلگىلەدى عوي. بۇل قازاقستان جەرىنە ەرىكسىز قونىس اۋدارعان ءتۇرلى ەتنوستاردىڭ ميلليونداعان وكىلدەرىنىڭ قۇتتى قونىسىنا اينالعان قاسيەتتى قازاق جەرى مەن قوناقجاي قازاق حالقىنا دەگەن ريزالىعىنىڭ بەلگىسى. شىعارماشىلىق ادامى رەتىندە 20 جىلدان استام مۋزىكامەن اينالىسىپ كەلەمىن. ءتۇرلى مۋزىكالىق ستيلدەردى, ستاندارتتاردى زەرتتەپ ءجۇرمىن. سەسسيالىق مۋزىكانت رەتىندە ءتۇرلى جوبالاردا جانە توپتاردا ونەر كورسەتەمىن. قازىر قازاق ۇلتتىق ونەر ۋنيۆەرسيتەتىندە قىزمەت ەتەمىن. ۋاقىتىم بولعان ساتتەردە تابيعات اياسىنا شىققاندى قاتتى ۇناتامىن. ءتۋريزمدى جانىم سۇيەدى. ەلىمىزدە تابيعاتى سۇلۋ جەرلەر كوپ. بۋرابايدى جاقسى كورەمىن.  تاۋەلسىز قازاقستان ماعان وتە ىستىق. ويتكەنى,  ول مەنىڭ وتانىم. بۇگىندە شى­عار­ماشىلىعىمىز دامىپ, حالقى­مىز وركەندەپ جاتسا, ول تاۋەل­سىزدىگىمىزدىڭ ارقاسى دەپ ايتار ەدىم. تاۋەلسىزدىكتىڭ قادىر-قاسيە­تىن ءبىزدىڭ اۋلەت جاقسى بىلەدى. سەرگەي تەن, رەجيسسەر