ازاماتتىق ۇستانىم ارقاۋى

استاناداعى ۇلتتىق اكادەميالىق كىتاپحانادا «دارىن» مەملەكەتتىك جاس­تار سىيلىعىنىڭ لاۋرەاتى بولاتبەك تولەپبەرگەننىڭ ەل تاۋەلسىزدىگىنىڭ 25 جىل­دىعىنا جانە 1986 جىلعى جەلتوقسان وقيعاسىنىڭ 30 جىلدىعىنا وراي جارىق كورگەن «قاسيەتتىم – جەلتوقسان!» اتتى كىتابىنىڭ تۇساۋكەسەر ءراسىمى ءوتتى. جالپى, 1986 جىلعى جەل­توقسان وقيعاسى تۋرالى ەڭبەك­تەر بارشىلىق. ولاردىڭ ارقاي­سى­سىنىڭ ورنى بولەك. بۇل تا­قىرىپ الداعى ۋاقىتتا تا تالاي قالامگەرلەردىڭ شىعارمالارىنا ارقاۋ بولاتىنى كۇمانسىز. ويتكەنى, اتالعان ماسەلە ۇلتىمىزدىڭ تاع­دىرىنا تىكەلەي قاتىستى. مىنە, كۇنى كەشە وسى جەلتوقسان وقيعاسىن نەگىزگە الىپ, ونىڭ ءمان-ماڭىزىنا تەرەڭنەن ۇڭىلۋگە ۇندەيتىن تاعى ءبىر جاڭا تۋىندى ءوز وقىرمانىنا جول تارتتى. پارلامەنت سەناتىنىڭ دەپۋتاتى سارسەنباي ەڭسەگەنوۆ, ءماجىلىس دەپۋتاتى باقىتبەك سماعۇل, قازاق راديوسىنىڭ ديرەكتورى ماحات سادىق, جەلتوقسانشىلار, قوعام قايراتكەرلەرى, زيالى قاۋىم وكىل­دەرى مەن جاستار قاتىسقان تۇساۋ­كەسەر راسىمىندە اتالعان كىتاپتىڭ مازمۇنى, وندا قامتىلعان جاع­داياتتار كەڭىنەن ءسوز بولدى. جيىندا اتاپ وتىلگەندەي, «دارىن» مەملەكەتتىك جاستار سىي­لىعىنىڭ يەگەرى, قازاق راديوسى ديرەكتورىنىڭ ورىنباسارى – «شالقار» راديوسىنىڭ ديرەكتورى بولاتبەك تولەپبەرگەننىڭ «قاسيەتتىم – جەلتوقسان!» اتتى پۋبليتسيستيكالىق كىتابىندا 1986 جىلعى الماتى قالاسىنداعى جەل­توقسان وقيعاسىنىڭ شىعۋ سەبەپ-سالدارى مەن ءور­بۋ بارىسى كەڭىنەن قامتىلعان. سو­نىمەن قاتار, وقيعاعا قاتىس­قان جانە ودان كەيىنگى كەز­دە ازاماتتىق ۇستانىمىن كور­سەتكەن زيالىلارىمىزدىڭ, جاستا­رىمىزدىڭ قايسارلىعى تۋرالى سىر شەرتىلەدى. بۇدان بولەك, جەلتوقسان وقيعاسىنا تۇرتكى بولعان جايتتاردان باستاپ, جەل­توقساندىق قاھارمانداردىڭ ءىس-ارەكەتتەرى اشىپ كورسەتىلىپ, جەل­توقسانشىلاردىڭ ءبىرازىنىڭ ءتىزىم­دەرى مەن سول 1986 جىلعى وقيعاعا قاتىسقان جاستاردىڭ دەرەكتەرى بەرىلگەن. اۆتور جەلتوقسان كوتە­رىلىسىنە قاتىستى تولىققاندى ماعلۇماتتى ناقتى دەرەكتەرمەن دايەكتەپ, جەلتوقساندىق زيالى قاۋىم بولمىسىن اشۋعا ۇمتىلا وتىرىپ, وقيعانىڭ بىزگە بەيمالىم قىر­لارىن بايانداۋدى ماقسات تۇتقان. كىتاپتى وقۋ ارقىلى ءبىز جەل­توقسان وقيعاسى قازاق تاري­حىنىڭ كۇردەلى كەزەڭى ەكەنىنە كوز جەتكىزەمىز. اۆتوردىڭ بۇل تيا­ناقتى ەڭبەگى – قاhارماندىق كۇرەستىڭ شىنايى بەينەسى مەن تولىق اقيقاتىن اشۋداعى ساۋاپتى دا قاجىرلى تالپىنىسى, يگىلىكتى ءىستىڭ ماۋەلى جەمىسى دەپ ايتۋعا تولىق نەگىز بار. اتالعان كىتاپ مادەنيەت جانە سپورت مينيسترلىگىنىڭ «ادە­بيەتتىڭ الەۋمەتتىك ماڭىزدى ءتۇر­­لەرىن باسىپ شىعارۋ» باع­دار­لاماسى بويىنشا 2000 دانامەن «كەرەمەت مەديا» باسپاسىنان جارىق كوردى. جولدىباي بازار, «ەگەمەن قازاقستان»