[caption id="attachment_84720" align="aligncenter" width="432"]
image description[/caption]
ەلورداداعى «قازاقستان» ورتالىق كونتسەرت زالىندا «قازاق ەلى» سەريالىنىڭ كينونۇسقاسى – «الماس قىلىش» كوركەم ءفيلمىنىڭ تۇساۋكەسەرى ءوتتى. اۋقىمدى تاريحي جوبانىڭ نەگىزگى اۆتورى – قر پرەزيدەنتى ن.نازارباەۆ.
ەلىمىزدىڭ تەلەۆيزيا تاريحىنداعى تۇڭعىش تاريحي سەريال – «قازاق ەلىنىڭ» ءتۇسىرىلىم جۇمىستارى اياقتالدى. «قازاقستان» ارناسىنان, «31 ارنادان» كورسەتۋ تۋرالى كەلىسىم-شارتتار جاسالىپ جاتىر. بۇيىرتسا جاڭا جىلدان كەيىن تەلەارنالاردان كورسەتىلە باستايدى. ال, «الماس قىلىش» ءفيلمى جالپىۇلتتتىق پروكاتقا 2017 جىلدىڭ قاڭتار ايىنان باستاپ شىعادى. «قازاقستان» ورتالىق كونتسەرت زالىنىڭ عيماراتىندا باق وكىلدەرىنە ارنايى سۇحبات بەرگەن جوبا جەتەكشىسى, قازاقستاننىڭ ەڭبەك سىڭىرگەن قايراتكەرى, رەجيسسەر رۇستەم ابدىراشەۆ وسىلاي دەدى. ونىڭ ايتۋىنشا, «قازاق ەلى» - اۋقىمدى جوبا. ءفيلمدى تۇسىرۋگە 500-گە جۋىق ادام جۇمىس ىستەگەن. 100-دەن استام اكتەر قاتىسقان. اكتەرلەردىڭ كيىمدەرى قازاقستان, رەسەي, قىتاي ەلدەرىندە تىگىلگەن.
«ءبىز جوبانى وتاندىق تاريحتىڭ حرەستوماتيالىق وقۋلىقتارىنا جاقىنىراق نەگىزدە جاساۋعا تىرىستىق. ارينە, ءار تاريحشىنىڭ ءوز كوزقاراسى بار. ولار «مىنا جەرى بىلاي ەمەس نە انا جەرىندە قاتەلىك بار» دەگەن سياقتى ءوز ويلارىن ايتۋى مۇمكىن. بىراق, بۇل دەرەكتى فيلم ەمەس, كوركەم فيلم دەگىم كەلەدى. جوباعا بەلگىلى جازۋشى ءى.ەسەنبەرليننىڭ «الماس قىلىش» رومانىن لەيتموتيۆ ەتىپ الدىق. دەگەنمەن تۇتاس كىتاپتاعىداي ەتىپ جاساعان جوقپىز. ويتكەنى, بىلەسىزدەر, «الماس قىلىش» كەڭەس ۇكىمەتى تۇسىندا جازىلعان كىتاپ. ول كەزدە كوپ تاريحي دەرەكتەر جوقتىڭ قاسى بولاتىن. ءبىز جاڭا تاريحي دەرەكتەردى دە پايدالاندىق» – دەدى رەجيسسەر ر.ابدىراشەۆ.
«الماس قىلىش» – «قازاق ەلى» سەريالىنىڭ سىعىمدالعان نەمەسە باسقاشا ايتقاندا ءبىر فيلمگە جيناقتالعان نۇسقاسى. ءفيلمنىڭ تۇساۋكەسەرى بارىسىندا ءفيلمنىڭ باس پروديۋسەرى ارمان اسەنوۆ كورەرمەندەرگە وسىلاي ءتۇسىندىردى. ال, مادەنيەت جانە سپورت ءمينيسترى ارىستانبەك مۇحامەدي ۇلى ءفيلمدى ەلىمىز تاۋەلسىزدىگىنىڭ 25 جىلدىعىنا تارتۋ دەپ ەسەپتەيتىنىن جەتكىزدى. سونداي-اق, فيلمگە تۇسكەن اكتەرلەردىڭ بىرقانشاسى ساحناعا شىعىپ, كورەرمەندەر ىقىلاسىنا بولەندى.
فيلمگە حV-ءشى عاسىرداعى تاريحي وقيعالار ارقاۋ بولعان. ايتسە دە نەگىزگى ماقسات – قازاق حاندىعىنىڭ قۇرىلۋىن كورسەتۋ, الاش ۇراندى قازاقتىڭ بۇعاۋعا كونبەيتىن اردا بولمىسىن دارىپتەۋ, حالقىمىزدىڭ سول زامانداعى دالا دەموكراتياسىنا باعىنعان تۇرمىس-تىرشىلىگىنەن حابار بەرۋ. ونداعان تاريحي ءىرى تۇلعالاردىڭ, اتاپ ايتقاندا اق وردانىڭ بيلەۋشىسى ابىلقايىر شايباني, قازاق حاندىعىنىڭ نەگىزىن سالعان كەرەي, جانىبەك حاندار, موعولستان بيلەۋشىسى ەسەن-بۇعا, ويراتتاردىڭ تايشىسى ءوز-تەمىر, قازاق سۇلتاندارى قاسىم مەن بۇرىندىق, اتاقتى اسان قايعى مەن قازتۋعان جىراۋ ت.ب بەينەلەرى ءتۇرلى وقيعالار تۇسىندا جان-جاقتى اشىلادى.
«الماس قىلىش» ءفيلمىنىڭ ستسەناري اۆتورلارى: سماعۇل ەلۋباي, تيمۋر جاقسىلىقوۆ جانە رۇستەم ابدىراشەۆ. قويۋشى سۋرەتشىلەرى: ومىرزاق شمانوۆ, ءسابيت قۇرمانبەكوۆ, ەدىل ءنۇسىپوۆ جانە جاننات بايمۇقانوۆا. سونداي-اق, باستى رولدەرگە دوسحان جولجاقسىنوۆ, ەركەبۇلان دايىروۆ, قايرات كەمالوۆ, ايان وتەپبەرگەن, بەكبولات تىلەۋحان, شۇعىلا ساپارعالي, قارلىعاش مۇحامەدجانوۆا, ارمان قوجا سىندى اكتەرلەر مەن اكتريسالار تارتىلعان.
ايگۇل سەيىلوۆا,
«ەگەمەن قازاقستان»
