استاناعا مونۋمەنت كوپتىك ەتپەيدى - نازارباەۆ

بولاشاقتا حالقىنىڭ سانى ۇش ميلليونعا جەتەتىن ەلورداعا مونۋمەنت كوپتىك ەتپەيدى. بۇل تۋرالى بۇگىن استانادا « ۇلى دالا ەلى» مونۋمەنتىن سالتاناتتى تۇردە اشقان مەملەكەت باسشىسى نۇرسۇلتان نازارباەۆ ايتتى. مونۋمەنت 2017 جىلى باستالاتىن ەكسپو-2017 كورمەسىنىڭ اۋماعىندا ورنالاسقان. ياعني, ميلليونداعان تۋريستەر قازاقستان تاۋەلسىزدىگى تۋرالى بىلەتىن بولدى. «قۇداي بۇيىرتسا, ەكسپو كورمەسىن اشقان كەزدە, دۇنيەجۇزىنەن ميلليونداعان تۋريستەر كەلىپ, وسى جەردە جۇرەدى. سوندا, مىنا مونۋمەنتكە قاراپ, قازاقستاننىڭ تاۋەلسىزدىگىنە 25 جىل ەكەنىن ەستەرىنە تۇسىرەر دەپ ويلايمىن. ەكسپو كورمەسى قالانىڭ ءبىر اۋدانىن الىپ جاتىر. قالانىڭ كوركىن وزگەرتەيىن دەپ تۇر. بولاشاقتا حالقىنىڭ سانى 3 ميلليون ادامعا جەتكەن كەزدە, حالىق كوپ بارىپ, دەمالاتىن ورىندار كەرەك. دۇنيەجۇزىندەگى استانالاردىڭ ەشقايسىسىنا مۇنداي مونۋمەنت كوپتىك ەتپەيدى», - دەدى پرەزيدەنت. مونۋمەنتتى سالعان قۇرىلىس كومپانياسىنىڭ مالىمەتىنە سۇيەنسەك, مونۋمەنت 3 جارىم اي ۋاقىتتا سالىنعان. انتيكا مرامورىنان سالىنعان مونۋمەنتتىڭ 25 قىرى تاۋەلسىزدىكتىڭ 25 جىلى تۋرالى سىر شەرتەدى.