ماڭعىستاۋدا كۇيشىلەر بايقاۋى ءوتتى

ماڭعىستاۋ وبلىستىق مادەنيەت باسقارماسى جانە وبلىستىق عىلىمي-ادىستەمەلىك جانە مادەني قىزمەت كورسەتۋ ورتالىعىنىڭ ۇيىمداستىرۋىمەن ماڭعىستاۋ كۇيىنىڭ اتاسى اتانعان كاسىبي دومبىراشى, كۇيشى, جىرشى, حالىق كومپوزيتورى مۇرات وسكىنباي ۇلى اتىنداعى VII رەسپۋبليكالىق كۇيشىلەر كونكۋرسى ءوتتى. بابالار مۇراسىن قايتا جاڭعىرتۋ, مادەني-تاريحي قۇندىلىقتاردى ساقتاپ, ماڭعىستاۋ وڭىرىنە ءتان توكپە كۇي ءداستۇرىن كەڭىنەن ناسيحاتتاۋ, ەلىمىزدەگى كۇي ونەرىن, ءداستۇرلى كۇيلەردى ورىنداۋشىلاردىڭ جاڭا ەسىمدەرىن انىقتاپ, مۇرات وسكىنباي ۇلىنىڭ ونەر الەمىندەگى وزىندىك ناقىشتى ورنەگىن تانىتۋ, رەسپۋبليكا اۋماعىندا كۇيشىلەردىڭ كاسىبي دەڭگەيىن, شەبەرلىگىن جەتىلدىرۋ ماقساتىنداعى كونكۋرسقا رەسپۋبليكامىزدىڭ 8 وبلىسىنان - باتىس قازاقستان وبلىسىنان 2, وڭتۇستىك  قازاقستان وبلىسىنان 1,  قىزىلوردا وبلىسىنان  3,  اتىراۋ  وبلىسىنان  4, اقتوبە  وبلىسىنان  1,  ماڭعىستاۋ وبلىسىنان 6 كۇيشى, سونىمەن قاتار استانا قالاسىنان 9, الماتى قالاسىنان 11, بارلىعى 37 كۇيشى قاتىستى. قر ەڭبەگى سىڭگەن ءارتىسى, قۇرمەت وردەنىنىڭ يەگەرى, قۇرمانعازى اتىنداعى ۇلتتىق كونسەرۆاتوريانىڭ قۇرمەتتى پروفەسسورى, ابىل تاراق ۇلى اتىنداعى ۇلت-اسپاپتار وركەسترىنىڭ دومبىراشىلار توبىنىڭ كونتسەرتمەيستەرى روزا ايدارباەۆا, قر ەڭبەگى سىڭگەن مادەنيەت قىزمەتكەرى, قۇرمانعازى اتىنداعى ۇلتتىق كونسەرۆاتوريانىڭ قۇرمەتتى پروفەسسورى, قۇرمەت  وردەنىنىڭ يەگەرى, كۇيشى سەرجان شاكرات, قر ەڭبەگى سىڭگەن قايراتكەرى, قۇرمانعازى اتىنداعى ۇلتتىق كونسەرۆاتوريانىڭ پروفەسسورى, حالىق مۋزىكاسى فاكۋلتەتىنىڭ دەكانى ك.ساحارباەۆا سىندى ونەر ساڭلاقتارى قازىلىق ەتكەن سايىستا باس جۇلدەنى الماتىلىق تاڭات سادەنوۆ يەلەندى. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى