تاۋەلسىزدىك كۇنى قارساڭىندا, 10 جەلتوقسان كۇنى قىزىلوردا وبلىسىنىڭ اكىمى قىرىمبەك كوشەرباەۆ قارماقشى اۋدانىنىڭ ورتالىعى جوسالى كەنتىنىڭ 25 تۇرعىنىنا جەكە تۇرعىن ءۇي قۇرىلىسىن جۇرگىزۋ ءۇشىن جەر تەلىمىنىڭ قۇجاتتارىن تاپسىردى.
وبلىس اكىمى ءوزىنىڭ العىسوزىندە جەرگىلىكتى بيلىك الدىمەن اۋىلدىق ەكونوميكانى دامىتۋعا جانە اۋىل جۇرتشىلىعىنىڭ ءومىر ءسۇرۋ دەڭگەيىن جاقسارتۋعا باسىمدىق بەرەتىندىگىن جەتكىزدى.
- ەل دامۋىنىڭ نەگىزگى كورسەتكىشتەرىنىڭ ءبىرى - تۇرعىن ءۇي قۇرىلىسىنىڭ قارقىندى دامۋى. وتكەن جىلى الماتى قالاسىندا 51 كوپقاباتتى ءۇي سالىنسا, قىزىلوردادا 53 كوپقاباتتى ءۇي تۇرعىزىلدى. بيىلدىڭ وزىندە كوپقاباتتى 80 ءۇي سالىنىپ جاتىر. قىزىلوردا قالاسىندا پاتەر كەزەگىندە تۇرعانداردىڭ 28 پايىزى, ياعني ۇشتەن ءبىرى باسپانالى بولدى. جوسالى كەنتىندە 25 مىڭ حالىق تۇراتىن بولسا, ونىڭ 1380-ءى جەكە تۇرعىن ءۇي سالۋ ءۇشىن جەر تەلىمىن الۋعا ءوتىنىش بەرگەن. اۋدان ورتالىعىنان بارلىق ينجەنەرلىك-كوممۋنيكاتسياسى دايىن 1400 جەر تەلىمى ءبولىنىپ بەرىلدى,- دەدى وبلىس اكىمى.
اۋداندىق ارداگەرلەر كەڭەسىنىڭ توراعاسى ك.ەسداۋلەتوۆ ءسوز سويلەپ, ايماق باسشىسىنا اۋىلدىڭ الەۋمەتتىك ماسەلەلەرىنىڭ دەر كەزىندە وڭ شەشىمىن تابۋىنا كومەك كورسەتكەنى ءۇشىن العىسىن ءبىلدىردى, ەلباسىنىڭ سارابدال ساياساتى مەن رەفورمالارىنا قاۋىم بوپ قولداۋ كورسەتەتىندىكتەرىن جەتكىزدى. مۇنان سوڭ قر تاۋەلسىزدىك كۇنى مەن جوسالى كەنتىندەگى بولاشاق شاعىن اۋداننىڭ نەگىزى قالانعان كۇننىڭ قۇرمەتىنە ارنالىپ مەرەكەلىك شارالار ۇيىمداستىرىلدى.
