ورالدا 9 قاباتتى تۇرعىن ءۇي پايدالانۋعا بەرىلدى

ورال قالاسىنا قاراستى زاچاگان كەنتىندە 144 پاتەرلىك, توعىز قاباتتى تۇرعىن ءۇي پايدالانۋعا بەرىلدى, دەپ حابارلايدى قازاقپارات. تاۋەلسىزدىكتىڭ تورقالى تويى قارساڭىندا تۇرعىنداردى جاڭا قونىستارىمەن قۇتتىقتاعان وبلىس اكىمى التاي كولگىنوۆتىڭ اتاپ وتكەنىندەي, ەلىمىز ەگەمەندىك العاننان بەرى ەلەۋلى وزگەرىستەر بولىپ, حالقىمىزدىڭ ءال-اۋحاتى جىل ساناپ جاقسارۋدا. ەلباسىمىزدىڭ تۇرعىنداردى قولجەتىمدى باسپانامەن قامتۋ جونىندەگى تاپسىرماسى دا ويداعىداي ورىندالۋدا. جاڭا ۇيلەردى بەرۋ جىل اياعىنا دەيىن جالعاسادى. «نۇرلى جول» باعدارلاماسىنا سايكەس رەسپۋبليكالىق بيۋدجەتتەن بولىنگەن 1,1 ملرد تەڭگەگە سالىنعان اتالمىش ءۇيدىڭ كولەمى – 10 مىڭ شارشى مەتر. «سۆ پليۋس» جشس تۇرعىن ءۇيدى ەكى جىلدا سالىپ ءبىتىردى. تۇرعىن ۇيدەگى 144 پاتەردىڭ تەڭ جارتىسى كەزەكتە تۇرعان ازاماتتارعا بەرىلسە, قالعانىن «تۇرعىنۇيقۇرىلىسجيناقبانكى» سالىمشىلارى يەلەندى. سالتاناتتى جاعدايدا كوپ بالالى جانە جاس وتباسىلارعا جاڭا پاتەر كىلتتەرى تابىس ەتىلىپ, ولار قامقورلىعى ءۇشىن ەلباسىنا ريزاشىلىقتارىن ءبىلدىردى. تۇرعىنداردىڭ قۋانىشىنا ورتاقتاسقان ءوڭىر باسشىسى ولاردىڭ بىرقاتارىنىڭ جاڭا پاتەرىنە كىرىپ, قۇتتى بولسىن ايتۋدى دا ۇمىتقان جوق.