باعانى نارىق قانا ەمەس, انتيمونوپوليالىق زاڭناما دا رەتتەۋ كەرەك

ۇكىمەت وتىرىسىندا پرەمەر-مينيستر باقىتجان ساعىنتاەۆ: «باعانىڭ كوتەرىلۋىنە قاتىستى ماسەلەنى ءبىز قىركۇيەك ايىندا تالقىلادىق, بۇگىنگى باياندامالاردان كورىپ وتىرعانىمىزداي, بەلگىلى ءبىر جۇمىستار اتقارىلعان. اسقار يسابەك ۇلى (قر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ – رەد), نارىققا قاتىسۋشىلاردىڭ پىكىرلەرىن ەسكەرىپ, ۇسىنىلعان تاسىلدەردى تاعى ءبىر قاراستىرىپ, سايكەس شەشىمدەر تۇرىندە رەسىمدەۋگە بولادى. بۇل جەردە ۇكىمەت نارىقتىق تەتىكتەردى جاۋىپ تاستايدى دەگەن ءسوز ەمەس. الايدا جوعارى باعانىڭ بولۋىنا جاعدايلار تۋسا, ءبىز قولىمىزدا بار مونوپولياعا قارسى زاڭناما اياسىنداعى قۇرالداردى ەسكەرۋمەن, ونىڭ جولىن كەسۋىمىز كەرەك», – دەدى. سونىمەن قاتار, ۇكىمەت باسشىسى: «ەشكىم نارىقتىق جاعدايدا جۇمىس ىستەمەۋى كەرەك, تابىس تاپپاۋى كەرەك دەپ وتىرعانىمىز جوق. ءبىز تەك مونوپوليالىق جوعارى باعا بەلگىلەۋ جاعدايلارى بولسا, انتيمونوپوليالىق زاڭناما اياسىندا تەتىكتەردى قولدانا وتىرىپ, ولاردىڭ جولىن كەسۋ كەرەك دەيمىز», – دەدى. سونداي-اق, مەملەكەت شىعىنداردى تومەندەتۋ شارالارىن قاراستىرۋ قاجەت دەپ سانايتىندىعىن,  بۇل رەتتە نارىققا قاتىسۋشىلار دا ءوز شىعىستارىن تومەندەتۋى تيىستىگىن اتاپ ءوتتى. «ولار كولىك, ساقتاۋ جانە ەلەكتر ەنەرگياسى سياقتى شىعىندار. ياعني, كەشەندى شەشىمدەر قابىلدايتىن ساتتەر وتە كوپ. بۇل اكىمدەر جاۋاپكەرشىلىگىنىڭ اۋماعى. بارلىق قاجەتتى زاڭنامالىق وزگەرتۋلەردى جۇرگىزىپ, جاۋاپكەرشىلىكتى تولىعىمەن جەرگىلىكتى اتقارۋشى ورگاندارعا بەرۋ قاجەت», – دەپ اتاپ ءوتتى پرەمەر-مينيستر. دينارا بiتiكوۆا, «ەگەمەن قازاقستان».