بۇگىن قر ۇكىمەتىندە قازاقستاندىق وتباسىلار ءۇشىن باسپانا ماسەلەسىن شەشۋدىڭ جاڭارعان تەتىكتەرى قامتىلعان «نۇرلى جەر» باعدارلاماسى تالقىلاندى.
ۇلتتىق ەكونوميكا ءمينيسترى قۋاندىق بيشىمباەۆتىڭ ايتۋىنشا, باعدارلاما اياسىندا يپوتەكالىق قارىزداردى سۋبسيديالاۋ, قۇرىلىس كومپانيالارى ءۇشىن قارىز مولشەرلەمەسىنىڭ ءبىر بولىگىن جابۋ جولىمەن جەكە قۇرىلىس سالۋشىلاردى ىنتالاندىرۋ, تۇرعىن ءۇي قۇرىلىس جيناق بانكىنىڭ سالىمشىلارى جانە اكىمدىكتەردە كەزەكتە تۇرعان ازاماتتار ءۇشىن نەسيەلىك تۇرعىن ءۇي قۇرىلىسىنىڭ كولەمىن ۇلعايتۋ شارالارى قولدانىلاتىنىن ايتتى. سونداي-اق, باعدارلاما اياسىندا حالىقتىڭ الەۋمەتتىك جاعىنان وسال توپتارى ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇيدىڭ وڭىرلىك قورىن قۇرۋ, قاجەتتى ينفراقۇرىلىم جۇرگىزۋ ارقىلى جەكە تۇرعىن ءۇي قۇرىلىسىن دامىتۋ جوسپارلانعان.
«نۇرلى جەر» باعدارلاماسىن جۇزەگە اسىرۋدىڭ ناتيجەسىندە 1,5 ملن. شارشى مەتر تۇرعىن ءۇي سالىنادى, ونىڭ ىشىندە 2017-2019 جىلدارى 274 مىڭ شارشى مەتر تۇرعىن ءۇي سالۋ جوسپارلانعان.
ەندى يپوتەكالىق نەسيە 10 پايىزبەن بەرىلەدى
«بۇل جەردە رەسەيدىڭ وڭ تاجىريبەسىن مىسالعا كەلتىرۋگە بولادى. كورشى ەلدە يپوتەكالىق كرەديت ۇلەسى ايتارلىقتاي جوعارى, ال يپوتەكانى وتەمەۋ مولشەرى 5 پايىزدان تومەن. باعدارلامانىڭ الدىڭعى رەداكتسياسىندا بىرىڭعاي جيناقتاۋشى زەينەتاقى قورىنداعى قاراجات ەسەبىنەن بانكتەردى قورلاندىرۋ تەتىكتەرى قاراستىرىلعان بولاتىن. بىراق بۇل تەتىكتەر ۇلتتىق بانكتىڭ ەسكەرتۋلەرىنەن كەيىن الىنىپ تاستالدى. وكىنىشكە قاراي, قازىرگى ۋاقىتتا بانكتەر جاي دا يپوتەكا بەرۋگە مۇددەلى ەمەس», — دەيدى ا.راقىمباەۆ. ونىڭ ايتۋىنشا, بانكتەردىڭ ۇزاق مەرزىمگە بەرىلەتىن ارزان اقشاسى بولماعاندىقتان, باعدارلامادا ۇسىنىلىپ وتىرعان شارالاردى جاپپاي قولدانىسقا ەنگىزۋ مۇمكىن بولمايدى. ال باعدارلاما تۇجىرىمداماسىندا 2017 جىلدان باستاپ حالىققا 17 پايىزبەن بەرىلەتىن ەكىنشى دەڭگەيدەگى بانكتەردىڭ يپوتەكاسىن سۋبسيديالاۋ جوسپارلانىپ وتىر. ناتيجەسىندە قارىز الۋشى ءۇشىن سىياقى مولشەرلەمەسى 10 پايىزدى قۇرايتىن بولادى. سۋبسيديالار بويىنشا قاراجاتتى ءتيىمدى پايدالانۋ ءۇشىن استانا جانە الماتى قالالارىندا تۇرعىنداردى نەسيەلەندىرۋدىڭ 15 جىلعا دەيىن 20 ملن. تەڭگەگە دەيىنگى, ال ايماقتاردا — 15 ملن. تەڭگەگە دەيىنگى شەكتى سوماسى بەلگىلەنەتىن بولادى. وسى شارتتارمەن نەسيە بويىنشا ورتاشا اي سايىنعى تولەم استانا جانە الماتى قالالارىندا – 158 مىڭ, ايماقتاردا – 116 مىڭ تەڭگەنى قۇرايتىن بولادى. سونىمەن قاتار جەكە قۇرىلىس سالۋشىلاردى ىنتالاندىرۋ ءۇشىن قولجەتىمدى نەسيەلىك رەسۋرستاردى پايدالانۋ ماقساتىندا مەملەكەت بانكتەر بەرەتىن نەسيەلەر بويىنشا پايىزدىق مولشەرلەمەنىڭ ءبىر بولىگى سۋبسيديالانادى.جالداپ تۇراتىن ۇيلەر سالىنادى
«نۇرلى جەر» باعدارلاماسى اياسىندا وڭىرلەردە كەزەكتە تۇرعان ادامدار ارەندالىق تۇرعىن ۇيلەردى ساتىپ الۋ قۇقىعىنسىز الا الادى. 15 جىلدىڭ ىشىندە وڭىرلەردە ساتىپ الۋ قۇقىعىنسىز جالعا بەرىلەتىن تۇرعىن ءۇي قورىن قۇرۋ ءۇشىن 2017 جىلدان باستاپ رەسپۋبليكا بويىنشا جىل سايىن 25 ملرد. تەڭگە ءبولۋ جوسپارلانعان. جالعا بەرىلەتىن تۇرعىن ۇيلەر جاو كەزەگىندە تۇرعان حالىقتىڭ الەۋمەتتىك جاعىنان وسال توپتارىنا ارنالعان. ولار 1-توپتاعى مۇگەدەكتەر, جەتىم بالالار جانە تاعى باسقا. باعدارلاما جۇزەگە اسىرىلاتىن 15 جىل ىشىندە ارەندالىق تۇرعىن ءۇي قورى 45 مىڭ پاتەر نەمەسە 2,2 ملن شارشى مەتر باسپانانى قۇرايدى.
