قازاقستانعا ءيزرايلدىڭ پرەمەر-ءمينيسترى كەلەدى

14 جەلتوقسان كۇنى ەلىمىزگە يزرايل پرەمەر-ءمينيسترى بينيامين نەتانياحۋ كەلەدى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە وسى ەلدىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ميحاەل برودسكي حابارلادى. بينيامين نەتانياحۋ ەلىمىزدىڭ  تاۋەلسىزدىگىن العان كەزدەن بەرى ورتالىق ازياعا رەسمي ساپارمەن كەلە جاتقان ءيزرايلدىڭ العاشقى پرەمەر-ءمينيسترى. ءباسپاسوز ءماسليحاتىندا ديپلومات ءيزرايلدىڭ  دۇنيەجۇزىندە مەديتسينا, تەحنولوگيا, اۋىلشارۋاشىلىق جانە سۋ رەسۋرستارىن باسقارۋ سالالارىندا جەتەكشى ورىن الىپ, «High-Tech» ەلى دەگەن اتاققا يەلەنىپ وتىرعان مەملەكەت ەكەنىن اتاپ ءوتتى.  سوندىقتان ەكى ەل باسشىلارىنىڭ كەزدەسۋىندە ءيزرايلدىڭ تاجيريبەسى كوبىرەك ءسوز بولاتىنىن, ال كاسىپكەرلەردىڭ قاتىسۋىمەن وتەتىن بيزنەس فورۋمدا اۋىلشارۋاشىلىق, مەديتسينا, ەنەرگەتيكا, قاۋىپسىزدىك جۇيەلەرى مەن قورعانىس ونەركاسىبى سالالارىنداعى قازاقستاندىق جانە يزرايلدىك ءىرى كومپانيالاردىڭ باسشىلارى كوپتەگەن قۇجاتتارعا قول قوياتىنىن ايتتى. –يزرايل مەن قازاقستان اراسىنداعى ەكونوميكالىق ءوزارا ارەكەتتەستىك كەيبىر سالالاردا تابىستارعا جەتىپ وتىر. «يزرايلدە جاسالعان» ساۋدا تاڭباسىمەن, تامپشىلاپ سۋعارۋ جۇيەلەرى, جىلىجايلار, قۇس فەرمالارى, قاۋىپسىزدىك پەن بيللينگ جۇيەلەرى قازاقستاندا تانىمال جانە كەڭ قولدانۋدا. وسى فورۋمدا اۋىل شارۋاشىلىق كلاستەرىن قۇرۋ, ەكىجاقتى اۋىلشارۋاشىلىق جوبالاردى دامىتۋدىڭ قارجىلىق مەحانيزمىن قۇرۋ, تەحنولوگيالىق جوبالار ترانسفەرتىن جانە ماڭىزدى ءوزارا ينۆەستيتسيالاردى قولدانۋ سياقتى ماسەلەلەر تالقىلانادى,- دەدى ميحاەل برودسكي. داستان كەنجالين, "ەگەمەن قازاقستان".