جاپونيا استاناسى توكيودا 2020 جىلى جازعى وليمپيادا ويىندارى وتكىزىلەتىن ستاديونىنىڭ قۇرىلىسى باستالدى, دەپ حابارلايدى BBC.
قۇرىلىستىڭ رەسمي ىرگەتاسىنىڭ قالانۋ سالتاناتىنا ەلدىڭ ۇكىمەت باسشىسى سيندزو ابە, توكيو پرەفەكتۋراسىنىڭ گۋبەرناتورى يۋريكو كويكە, 2020 جىلعى وليمپياداعا جاۋاپتى مينيستر تاماە مارۋكاۆا مەن قۇرىلىس ارحيتەكتورى كەنگو كۋما قاتىستى.
جاڭا ستاديون 1964 جىلى ۇيىمداستىرىلعان وليمپيادانىڭ ەسكى ستاديونىنىڭ ورنىنا سالىنادى. باستاپقىدا بۇل جوباعا ۇكىمەت وتە قىمبات بولعاندىقتان رۇقسات بەرمەگەن ەدى. بيلىك ءالى دە بولسا قۇرىلىستىڭ قىمباتتىعىنا الاڭداۋلى. قۇرىلىستىڭ جالپى قۇنى 1,5 ملرد دوللاردى قۇرايدى. ەستەرىڭىزگە سالا كەتەيىك, ححII جازعى وليمپيادا ويىندارى 2020 جىلدىڭ 24 شىلدەسى مەن 9 تامىزى ارالىعىندا وتكىزىلەدى.
