فرانتسيا پاۆيلونى 1084 شارشى مەتردى قۇرايدى جانە كورمەدەگى ەڭ ۇلكەن پاۆيلونداردىڭ ءبىرى. مۇندا مەملەكەتتىڭ ءىرى كومپانيالارى – «Peugeot», «Syctom», «Total», «Veolia», «Vicat», «Iter», «ADEME», «Saint-Gobain» وزدەرىنىڭ بولاشاق ەنەرگياسى تاقىرىبىنداعى جەتىستىكتەرىن پاش ەتىپ, جاڭا ونىمدەرىن كورسەتپەك. ء«بىزدىڭ كورمە پاۆيلونىمىز ەكى قاباتتان تۇرادى. ءبىرىنشى قاباتتا فرانتسيادا يننوۆاتسيا مەن بولاشاق تەحنولوگيالار سالاسىندا وزىق سانالاتىن كومپانيالار ورنالاسسا, ەكىنشى قابات سيمپوزيۋمدارعا, دەباتتارعا, سۋرەت كورمەلەرىنە ارنالادى. ول ءبىر ساتتە 200 ادامدى قابىلداۋعا قاۋقارلى. «Peugeot» كومپانياسى 1995 جىلى الەمدە ەڭ العاشقىلاردىڭ ءبىرى بولىپ ءوزىنىڭ ەلەكتر كولىگىن تانىستىرعان ەدى. استانادا وتەتىن ەكسپو-2017 كورمەسىندە ءبىز جاڭا بۋىن كولىگىن ۇسىناتىن بولامىز. بۇل, اسىرەسە, بۇلدىرشىندەر مەن اۆتو الەمىن جاقسى كورەتىندەر ءۇشىن قىزىق بولاتىنى ءسوزسىز», دەدى پ.لورو.
پاۆيلوننىڭ ءوزى «ەكوقالا», «بالامالى ەنەرگيا» جانە «ەكولوگيالىق كولىك» دەگەن تاقىرىپتارعا بولىنگەن ەكەن. وسى تاقىرىپتاردىڭ بىرىنە ساي جاسالعان فرانتسۋز پاۆيلونىنىڭ ءبىرىنشى قاباتىنداعى 7 بولىك كەلۋشىلەرگە «جاسىل ەنەرگەتيكا» سالاسىنداعى جاڭا تەحنولوگيالارمەن تانىسۋعا مۇمكىندىك بەرەدى. بولىكتەر گالەرەيا ارقىلى قوسىلعان, وندا الەم وركەنيەتىنىڭ دامۋىنا ۇلەستەرىن قوسقان فرانتسيانىڭ كورنەكتى قايراتكەرلەرى مەن عالىمدارىنىڭ بەينەلەرى قويىلادى.
پ.لورونىڭ ايتۋىنشا, كورمە قوناقتارى پاۆيلون اۋماعىندا فرانتسۋز ونەر قايراتكەرلەرىنىڭ شىعارمالارىن – ءمۇسىنشى ميلەن گەرموننىڭ تۋىندىسى «مينيس اكۆا» كومپوزيتسياسىن, سۋرەتشى-يلليۋستراتور يان دالوننىڭ قولىنان شىققان جانە فرانتسيانىڭ سيمۆولىنا اينالعان مارياننا بەينەسىن جانە فرانتسيانىڭ ەڭ ادەمى جەرلەرىنىڭ فوتوسۋرەتتەرىن كورە الادى. استانا ەكسپو-2017 حالىقارالىق كورمەسى جۇمىس ىستەپ تۇرعان ۋاقىتتا فرانتسيا ەكى ۇلتتىق مەرەكەسىن – 21 ماۋسىمدا فرانتسيا كۇنىن, 14 شىلدەدە باستيليانى الۋ كۇنىن اتاپ وتەدى. وسىعان وراي, مەرەكەلىك ءىس-شارالار ۇيىمداستىرىلادى.
فرانتسۋزدار 21 ماۋسىمدا وتىز جىلدان استام ۋاقىتتان بەرى تويلاپ كەلە جاتقان مۋزىكا مەرەكەسى اياسىندا وزدەرىن بارلىق قىرىنان كورسەتپەك. شارا قوناقتارى ءداستۇرلى تسيرك نومىرلەرى مەن كابارەنى كورىپ, فرانتسيانىڭ وڭتۇستىك-باتىسىنىڭ جانە برەتان مۋزىكاسىن تىڭدايدى. مۋزىكا مەرەكەسى شەڭبەرىندە قازاق ۇلتتىق ونەر ۋنيۆەرسيتەتىنىڭ ستۋدەنتتەرى دە فرانتسۋز تىلىندە ءان سالادى.
پاۆيلوننىڭ كونفەرەنتسيا زالىندا ءۇش اي بويى كوپتەگەن سەمينارلار, شەبەرلىك ساعاتتار مەن عىلىمي كونفەرەنتسيالار وتەدى. ولارعا قاتىسقان قوناقتار بولاشاق ەنەرگياسى سالاسىنداعى فرانتسۋز يننوۆاتسيالىق تەحنولوگيالارى تۋرالى, سونداي-اق, ءبىلىم, مادەنيەت جانە فرانكوفونيا سالالارىنداعى فرانتسيا مەن قازاقستاننىڭ ىنتىماقتاستىعى تۋرالى كوپتەگەن قىزىقتى مالىمەتتەرگە قانىعادى.
اسحات رايقۇل,
«ەگەمەن قازاقستان»
