الداعىنى قاپىسىز بولجايتىن كورەگەن كوسەم, حالقىن سوقپاقتى جولدان اداستىرماي الىپ وتكەن قاجىرلى قايراتكەر, ەلىنە الەمنىڭ مارتەبەلى مىنبەرلەرىنەن ويىپ تۇرىپ ورىن سايلاعان ساياساتكەر, ەلباسى نۇرسۇلتان نازارباەۆتىڭ «مەملەكەتتىك رامىزدەر – بۇل ءبىزدىڭ مەملەكەتتىلىگىمىزدىڭ, ەگەمەندىگىمىزدىڭ بەرىك نەگىزىنىڭ ءبىرى. ولار تاۋەلسىزدىكتىڭ قاسيەتتى بىرىكتىرۋشى وبرازىن بىلدىرەدى», – دەپ باعا بەرگەن ەلدىگىمىزدىڭ ۇشتاعانى شىن مانىندە ۇلتتىق قۇندىلىعىمىزعا اينالدى.
ەركىندىكتىڭ ەلەڭ-الاڭىندا قابىلدانعان مەملەكەتتىك رامىزدەرىمىزدىڭ ءمانىن ءبىز مەكتەپكە بارعاننان-اق ۇعىنا باستادىق. مەملەكەتتىك تۋداعى قىران مەن ەلتاڭباداعى قاناتتى پىراقتارعا تالاي مارتە قىزىعا قاراعانىمىز ەستە. سالتاناتتى جيىنداردا عانا ورىندالاتىن مەملەكەتتىك گيمننىڭ قۇدىرەتىن سەزىنە تۇستىك. «مەنىڭ ەلىم...» دەپ شىرقاعان ساتتە ۇلكەندەردىڭ جانارىنا جاس ۇيىرىلگەنىن كورىپ, تاڭعالاتىن ەدىك. بۇل تۋعان جەرىنىڭ ءار سۇيەمىن قاسىقتاي قانى قالعانشا قورعاعان, ازات قازاقستاننىڭ ءانۇرانى اسقاقتاپ, تۋىنىڭ كوككە كوتەرىلۋىن كوكسەگەن, وسى جولدا جان قيعان بابالار ەرلىگىنە قۇرمەت ەكەنىن كەيىن ۇقتىم.
گيمننىڭ العاشقى اۋەندەرى وينالا باستاعاندا-اق كىندىك قانىڭ تامعان كيەلى جەرىڭ, ونىڭ وتكەنى مەن بۇگىنى كوز الدىڭا كەلە قالادى. تالاي وتكەلەكتەن امان وتكەن ەلدىڭ جۇرەك سوزىنە اينالعان ءانۇران جىگەرىڭدى جاني تۇسەدى. بۇل بالتالاسا دا بۇزىلمايتىن بەرەكەنىڭ ارقاسىندا بۇگىنگە جەتىپ, بايتاق وتاننان باقىت تاپقان جۇرتتىڭ جان تەبىرەنىسى.
ءبىزدىڭ جاڭاقورعان ۇلت رۋحانياتىنىڭ تالاي-تالاي قابىرعالى قايراتكەرلەرىن تۇلەتكەن ءوڭىر. سولاردىڭ ءبىرى – بەلگىلى ساۋلەتشى, مەملەكەتتىك ەلتاڭبا اۆتورى جانداربەك مالىبەكوۆ اعامىز.
وقۋشى كەزىمىزدە ول كىسىمەن وتكەن تالاي كەزدەسۋگە قاتىستىق. سونداي ساتتەردىڭ بىرىندە ساۋلەتشى ەلتاڭبادا بەينەلەنگەن شاڭىراقتاعى ۋىقتار قازاقستانداعى ۇلتتاردىڭ بىرلىگىن بەينەلەيتىنىن ايتىپ ەدى. قازىر قاي مەكەمەگە بارساڭىز دا ءبىزدىڭ ەلدەگى دوستىقتىڭ بەرىكتىگىن بەينەلەيتىن وسى ەلتاڭبا ءسىزدى الدىمەن قارسى الادى.
مەملەكەتتىك رامىزدەر ءبارىمىز ءۇشىن وتە قاسيەتتى ۇعىم. حالقىمىزدىڭ عاسىرلار بويى ارمانداعان تاۋەلسىزدىگىنىڭ جەمىسى. ءوز باسىم ەلىمىزدىڭ كوك تۋىن شامام جەتكەنشە كوككە كوتەرىپ, شەت ەلدەردەگى ءىرى جارىستاردا مەملەكەتىمىزدىڭ ءانۇرانىن شىرقاتۋعا ۇلەس قوسىپ جۇرگەنىمە ىشتەي بولسا دا مارقايامىن. ويتكەنى, تۋعان ەلىڭنىڭ نامىسىن قورعاعاننان, تۋعان جەرىڭنىڭ ابىرويىن ارتتىرعاننان ارتىق باقىت جوق.
داۋلەت نيازبەكوۆ,
ەركىن كۇرەستەن ازيا چەمپيونى
قىزىلوردا وبلىسى
