الەمنىڭ تۇكپىر-تۇكپىرىنەن كەلگەن ەڭ ازۋلى شوگەن شەبەرلەرى باس قوساتىن باسەكەدە «Astana Polo Club» جانە «Almaty Polo Club» سىندى ماڭدايالدى كوماندالارىمىز ەلىمىزدىڭ نامىسىن قورعايتىن بولادى. قۇرىلعانىنا نەبارى 3-4 جىلدىڭ اينالاسى بولسا دا, قازاقستان شوگەن فەدەراتسياسى اۋىز تولتىرىپ ايتارلىقتاي جەتىستىكتەرگە قول جەتكىزىپ ۇلگەردى. وعان دالەل, «Astana Polo Club» كومانداسى 2016 جىلى ارگەنتينانىڭ لۋحان قالاسىندا وتكەن حالىقارالىق تۋرنيردەن I ورىنمەن ورالدى. سونداي-اق, 2017 جىلى ارگەنتيناداعى «Santa Catalina Summer Cup» جانە «Torneo Summer Polo Match» حالىقارالىق تۋرنيرلەرىندە ءبىزدىڭ كوماندالار شەتەلدىك شوگەنشىلەردەن وق بويى وزىپ, العاشقى ورىندى ەنشىلەدى. بيىل عانا ەلىمىزدە جالاۋىن كوتەرگەن «Almaty Snow Polo Cup» حالىقارالىق دوداسىندا باس جۇلدە ءوز قانجىعامىزدا قالدى. شوگەن ويىنى الەم بويىنشا ەرەكشە تانىمالدىلىققا يە ەكەندىگىن ەسكەرسەك, قازاقستاندىق سپورتشالارىمىز دا ەل ابىرويىن ارتتىرىپ جۇرگەنى انىق.
«پولو سپورتىنىڭ تاريحى ءبىزدىڭ بولمىسىمىزبەن استاسىپ جاتىر. سوندىقتان, بۇل تەك باي-باعلاندار وينايتىن بىزگە تاڭسىق سپورت دەپ قاراماعانىمىز ابزال. پولو – اتا-بابامىزدان مۇرا بولىپ قالعان, كونە زامانداردا شوگەن (شوعان, چوۆگان) دەگەن اتپەن تانىمال بولعان ات ويىنى. بابالارىمىزدىڭ شوگەن ويىنىن ويناعاندىعى تۋرالى دەرەكتەر ءجۇسىپ بالاساعۇننىڭ «قۇتادعۋ بىلىك», ماحمۇد قاشقاريدىڭ «ديۋاني لۇعات ات-تۇرىك» اتتى تۇركى جازبا ەسكەرتكىشتەرىندە ايتىلعان. بۇل تۋرالى ءوز ەڭبەكتەرىندە وسى ەسكەرتكىشتەردى تۇركى تىلىنەن زاماناۋي قازاق تىلىنە ترانسكريپتسيالاعان ەتنوگروف-عالىم اسقار ەگەۋباەۆ جازىپ كەتكەن. ايتا بەرسەك بۇل ويىن ءتۇرىنىڭ بىزگە جات ەمەس ەكەندىگىن دالەلدەيتىن تاريحي دەرەكتەر جەتىپ ارتىلادى. 2014 جىلدىڭ جەلتوقسان ايىندا ارگەنتينا استاناسى بۋەنوس-ايرەس قالاسىندا وتكەن باس اسسامبلەيادا قازاقستان شوگەن فەدەراتسياسى حالىقارالىق پولو فەدەراتسياسىنىڭ تولىققاندى مۇشەسى مارتەبەسىنە يە بولدى. قازىرگى ۋاقىتتا اقمولا, الماتى, جامبىل, قاراعاندى, قوستاناي جانە وڭتۇستىك قازاقستان وبلىستارىندا وڭىرلىك فەدەراتسيالار اشىلىپ, شوگەن كلۋبتارى جۇمىس ىستەۋدە. بۇل ويىن ءبىزدىڭ قوعام ءۇشىن الەۋمەتتىك ليفت رەتىندە بولاتىنىنا كوزىمىز جەتىپ وتىر. كوماندالاردىڭ قۇرامىندا اۋىلدان شىققان قازاقتىڭ قاراپايىم قارا بالالارى ويناپ ءجۇر. ولار الەمدىك وركەنيەتكە وسى ارقىلى قوسىلىپ, تانىسادى. كەشەگى ەرجۇرەك ەرلەردىڭ ۇلى كوشىن جالعاپ, اتتان تۇسپەگەن قايسار ەلدىڭ ۇلاندارى ەكەنىن الەمگە ايگىلەيدى. الدىمىزدا تۇرعان ۇلكەن جارىستان تابىستى ورالامىز دەگەن ويدامىز», – دەيدى قازاقستان شوگەن فەدەراتسياسىنىڭ ۆيتسە-پرەزيدەنتى سارسەن قۇرانبەك.
اتالعان جارىسقا ەلىمىزدىڭ نامىسىن قورعايتىن سپورتشىلاردى «Astana Polo Club» جم اتقارۋشى ديرەكتورى ايدىن جاكەجانوۆ پەن «Almaty Polo Club» كلۋبىنىڭ ديرەكتورى ۆالەري تساليكوۆ باستاپ بارماق. تارتىستى دوداعا ەل ءۇمىتىن ارقالاپ بارا جاتقان شوگەنشى جىگىتتەرگە ساتتىلىك تىلەپ, جەڭىستى جولدىڭ جالعانا بەرۋىنە تىلەكتەستىك بىلدىرەمىز.
ارمان وكتيابر,
«ەگەمەن قازاقستان»
الماتى
