جالپى, «يسلاميادا» دەگەن بەيرەسمي اتاۋعا يە بولعان بۇل جارىس العاش رەت 2005 جىلى ساۋد ارابياسىندا وتكەن بولاتىن. سول جولى قازاقستان سپورتشىلارى تاماشا ناتيجەگە قول جەتكىزىپ, 27 جۇلدەمەن (13 التىن, 8 كۇمىس جانە 6 قولا) جالپىكوماندالىق ەسەپتە ءۇشىنشى ورىنعا يە بولدى.
ەكىنشى يسلام ويىندارى 2009 جىلى يران ەلىندە وتۋگە ءتيىس-ءتىن. الايدا, بۇل مەملەكەت پەن اراب ەلدەرى اراسىنداعى دۇردارازدىقتىڭ سالدارىنان اتالعان دودا وتپەي قالدى. ءسويتىپ, ارادا سەگىز جىل وتكەندە, ياعني 2013 جىلى يسلاميادانى يندونەزيا قابىلدادى.
ال باۋىرلاس ازەربايجان ەلىندە وتكەن ءدۇبىرلى دوداعا قازاقستاننان ەل نامىسىن ارقالاپ 32 سپورتشى اتتانعان بولاتىن. ءبىزدىڭ سايىپقىراندار سپورتتىڭ بەس تۇرىنەن, اتاپ ايتقاندا بوكس, دزيۋدو, تاەكۆوندو WTF, ەركىن جانە قىزدار كۇرەسى بويىنشا سىنعا ءتۇستى.
وبالى نەشىك, قىز-جىگىتتەرىمىز شاما-شارقىنشا ونەر كورسەتىپ, نامىستى قولدان بەرمەۋگە تىرىستى. بىراق, وزگە ەلدەردىڭ بۇل جارىسقا جوعارى ءمان بەرىپ, تاس-ءتۇيىن دايىندىقپەن كەلگەنى بايقالدى. ءبىز بولساق, بۇل جولعى يسلامياداعا ايتەۋىر قاتىسۋ كەرەك بولعان سوڭ, بارا سالعان سياقتى كورىندىك. ويتكەنى, جارىستىڭ قورىتىندى ناتيجەسىنە كوز جىبەرگەندە وسىلاي دەمەسكە امال قالمادى. قازاق ەلىنىڭ سپورتشىلارى ءبارىن قوسىپ ساناعاندا 19 جۇلدەگە يە بولدى. بار-جوعى ەكى التىن... بەس كۇمىس جانە 12 قولا مەدال. ەگەر دە, قوس بوكسشىمىز – ازات ماحمەتوۆ (52 كگ) پەن تۇرسىنباي قۇلاحمەت (75 كگ) بولماسا, التىننان جۇرداي بولادى ەكەنبىز. ءسويتىپ, جالپى ەسەپتە 14-ورىننان كورىندىك.
«يسلاميادا-2017» دوداسىندا ءبىرىنشى ورىندى ويىندار يەسى ازەربايجان الدى. ولاردىڭ ەنشىسىندە 152 مەدال (74 التىن, 46 كۇمىس, 32 قولا). ودان كەيىنگى ورىنداردى تۇركيا (185 مەدال – 68, 63, 54) جانە يران (89 مەدال – 30, 26, 33) يەلەندى. ال ءبىزدىڭ كورشىمىز وزبەكستان بولسا, 62 مەدالمەن (15 التىن, 17 كۇمىس جانە 30 قولا) ءتورتىنشى ورىنعا تابان تىرەدى...
دەگەنمەن, نەگە بۇلاي دەپ ويباي-اتتان سالۋدان اباي بولعان ءجون. ماسەلەنىڭ ءمانىسى – تەرەڭدە. ونىڭ ءبىر كىلتيپانى مىنادا: حالىقارالىق وليمپيادا كوميتەتى, وليمپيالىق حارتيا ءدىني تۇرعىداعى قانداي دا ءبىر جارىسقا اسا ساقتىقپەن قارايدى, ءتىپتى بويىن اۋلاق سالۋعا تىرىسادى دەۋگە دە بولادى. سول سەبەپتى, ءبىز دە زايىرلى مەملەكەت ەسەبىندە وسى جايتتى ەسكەرگەن سياقتىمىز... مىڭ قۇبىلعان دۇنيەنى ۋىسىندا ۇستاعان ساياساتپەن ساناسپاسقا تاعى بولمايدى.
قايرات ابدوللا
