استانا, الماتى, شىمكەنت, سەمەي, قىزىلوردا, وسكەمەن, ورال, كوكشەتاۋدان كەلگەن 10 كوماندا وزارا كىم مىقتىنى انىقتاماق. جارىس ماقساتى – ۇلتتىق جانە حالىقارالىق ستاندارتتاردى ەسكەرە وتىرىپ, تۇرعىندارعا جەدەل كومەك كورسەتۋ داعدىلارىن دامىتۋ. قاتىسۋشىلار جەدەل ارەكەت ەتۋ ارقىلى انافيلاكتيكالىق شوك, جاڭا تۋعان ءسابيدى رەانيماتسيالاۋ جانە جاراقات العاندا كومەك كورسەتۋ بويىنشا كلينيكالىق بەكەتتەردەن ءوتۋى ءتيىس. ءاربىر تاپسىرما ءۇشىن كلينيكالىق ستانتسيا ازىرلەنگەن: شىنايى جاعداي كەزىندەگىدەي مانەكەن جانە ستاندارتتالعان ەمدەلۋشىلەردى قولدانۋ ارقىلى ەپتىلىكتەرىن كورسەتەدى.
جەدەل-جاردەم قىزمەتىنىڭ بريگاديرلەرىنە ارنالعان العاشقى جارىس «استانا» وقۋ-كلينيكالىق ورتالىعىنىڭ باستاماسىمەن 2016 جىلدىڭ ماۋسىم ايىندا قىسقى ۋنيۆەرسيادا-2017 شاراسى قارساڭىندا الماتى قالاسىندا وتكىزىلگەن بولاتىن. بيىل ەكسپو-2017 حالىقارالىق كورمەسىنە دايىندىق قارساڭىندا ۇيىمداستىرىلىپ وتىر.
بۇقارالىق شارالاردى ۇيىمداستىرۋ ماقساتىندا جانە قازاقستان ءتۋريزمىن دامىتۋ ءۇشىن جەدەل-جاردەم قىزمەتىنىڭ ۇلتتىق جانە حالىقارالىق ستاندارتتارعا ساي بولۋى باستى ماسەلە.
شارا قالالىق اكىمدىكتىڭ, قر دەنساۋلىق ساقتاۋ مينيسترلىگىنىڭ, «استانا» وقۋ-كلينيكالىق ورتالىعى, سيمۋلياتسيالىق ءبىلىم بەرۋ جانە مەديتسيناداعى تاۋەلسىز ساراپشىلار قازاقستان وداعى, استانا قالاسىنىڭ جەدەل-جاردەم ستانتسياسىنىڭ قولداۋىمەن وتكىزىلۋدە.
