جوسپار بويىنشا قولادان قۇيىلاتىن ساتپاەۆ تاستىڭ ۇستىندە تۇرادى. ەسكەرتكىشتىڭ بيىكتىگى - 7 مەتر. وعان قوسا, 3,6 مەترلىك تۇعىر قويىلادى. ال مونۋمەنتتىڭ ءوزىن قالا اۆتوۆوكزالى ماڭايىندا ورناتۋ جوسپارلانىپ وتىر. قانىش ساتپاەۆتىڭ ەسكەرتكىشى ماڭايىندا ساياباق بولادى.
«ەندى, كوكشەتاۋدا شوقان ءۋاليحانوۆ پەن ابىلاي حاننىڭ ەسكەرتكىشتەرى بار. ەرەيمەنتاۋدا بوگەنباي باتىردىڭ الىپ ءمۇسىنى تۇر. ال ستەپنوگورسكىدە ونداي ەسكەرتكىش جوق. قالا كەزىندە ۋران مەن التىن وندىرەتىن ورتالىق رەتىندە سارىارقانىڭ توسىندە اشىلعان ەدى. بۇل - كەنشىلەردىڭ شاھارى, ءوندىرىس وشاقتارىنىڭ قالاسى. سول سەبەپتى ۆوكزالدىڭ ماڭايىندا ورناتىلاتىن ەسكەرتكىش ءدال وسى سالانىڭ تانىمال تۇلعاسىنا ارنالعان ءجون. بۇگىندە اقمولا وبلىسى تاۋ-كەن سالاسىنىڭ ءىرى ايماعى بولىپ سانالادى. سوعان قاراماستان, بىردە-ءبىر ەلدى مەكەندە قانىش ساتپاەۆقا ارنالعان ەسكەرتكىش جوق. دەگەنمەن, قانىش ساتپاەۆتىڭ ەڭبەكتەرى نەگىزىندە وسى وڭىردە كوپتەگەن كەنىشتەر اشىلدى. ونى دا ەسكەرۋ كەرەك», دەيدى قالا اكىمىنىڭ ورىنباسارى گۇلناز ءابىلوۆا.
قانىش ساتپاەۆتىڭ ەسكەرتكىشىن قازاقستان سۋرەتشىلەرى وداعىنىڭ مۇشەسى, پروفەسسور ءارى ءمۇسىنشى ازات بايارلين جاسايدى. ونىڭ جەتەكشىلىگىمەن استانا قالاسىندا ساكەن سەيفۋليننىڭ ەسكەرتكىشى, كوكشەتاۋدا - ابىلاي حان, ومبى قالاسىندا - شوقان ءۋاليحانوۆ ەسكەرتكىشى جانە تاعى باسقا جوبالار ىسكە استى. بۇگىندە ول قانىش ساتپاەۆتىڭ ەسكەرتكىشىن ماسكەۋ قالاسىندا ازىرلەۋدى ۇسىنىپ وتىر. سەبەبى, ول جاقتا قولادان ەسكەرتكىش قۇيۋ كاسىبى جاقسى دامىعان. جالپى, ستەپنوگورسك قالاسىندا اتالعان ەسكەرتكىشتى ورناتۋ جانە سونىڭ اينالاسىن اباتتاندىرۋ جۇمىستارىنا 35,6 ملن تەڭگە قاراستىرىلعان.
