قامشىنىڭ سابىنداي عانا قىسقا عۇمىردا باقىتقا جەتۋدىڭ باعاسىن باعالاۋعا ۇمتىلعاندار, ءبىز قايتسەك تە سول جولدى تابامىز دەپ تالپىنادى. وعان جەتۋدىڭ قاراپايىم عانا قاعيداسى نە دەگەنگە كەلگەندە, ونىڭ التىن ارقاۋى تۇسىنىستىك پەن سىيلاستىق ەكەنىن ۇعادى. بىراق اق پەن قارا ايقاسقان مىنا ومىردە جاقسىلىق اتاۋلىعا قول جەتكىزۋ ءۇشىن نەبىر كەدەرگىلەردى جارىپ شىعاتىنىنا, ولاردىڭ سەنىمى مول بولاتىن. بۇل تالپىنىستا ادامداردىڭ نيەتى مەن پەيىلى تۇزەلسە, ۇكىلەگەن ءۇمىت ۇزىلمەيدى. ارمان الاسارمايدى, قايتا بيىكتەپ وتباسىنا باقىت قۇسى ۇيا سالاتىنا قويىلىمدى كورىپ وتىرعاندا كوز جەتكىزەسىڭ. دەگەنمەن, سپەكتاكلدەگى وقيعالاردىڭ دامۋى وعان بىردەن قول جەتكىزە المايتىنىڭدى اڭعارتادى. تەك ادامنىڭ بويىنداعى رۋحتىڭ مىقتىلىعى, كەلەر كۇنگە دەگەن سەنىمنىڭ شەكسىزدىگى, ءبىر سوزبەن ايتقاندا ادام ءوزى بارلىق ىسكە شىداممەن كەلىپ, العا قويعان ماقساتقا جەتەم دەگەن وي ساناڭداعى قاجىر قايراتتى جوعالتپاي العا جەتەلەسەڭ عانا ءبارى بولاتىنىنا كورەرمەندى يلاندىرا الادى.
«بۇل قويىلىمداعى وقيعالار, كەيىپكەرلەر تاعدىرى قاراپايىم بولعانىمەن, قارابايىر ەمەستىگىن ەسكە سالا كەتكەنىمىز ءلازىم. سونى توگىلدىرە جازىپ, قوعامدا بولىپ جاتقان وزەكتى تاقىرىپتى قوزعاۋدىڭ ءوزى, سول ارقىلى جۇرتقا وي سالۋ باستى باعىت ەدى. جاسىراتىنى جوق, قازىر ۇيلەنۋدى وڭاي كورىپ, ءۇي بولىپ قالۋدىڭ قيىن ەكەنىن تەرەڭ ويلاماعان كەيبىر جاستار وزدەرى قالاپ العان جارلارىمەن العاشىندا ادەمى شاڭىراق كوتەرىپ, ارتىنان اجىراسىپ جاتادى. بۇل قاي قايسىمىزدى دا ويلاندىرىپ كەلەدى. مىنە, وسى ماسەلە مونو سپەكتاكلدىڭ نەگىزگى ارقاۋىن قۇراپ وتىر. نەگىزگى يدەياسى – جاستارعا وي سالۋ, ويلاندىرۋ. بۇگىن سەن جاسسىڭ, جاس وتاۋدىڭ يەسىسىڭ, ەرتەڭ اتا اناسىڭ, ۇرپاق ءوسىرۋىڭ, ەلگە قىزمەت ەتۋگە ءتيىستىسىڭ, ۋاقىت تەز وتەدى ەندەشە كەلەشەگىڭنىڭ كەمەل بولۋىنا تالپىن دەگەندى العا تارتادى. مەن وسى جەردە مىنا ءبىر جاقسى جۇمىس تۋرالى ايتا كەتسەم دەيمىن. ول ناقتىلاي تۇسسەم, الداعى ماۋسىمنىڭ 20-30 ارالىعىندا رەسەيدىڭ ەكاتەرينبۋرگ قالاسىندا الدا ايتقان مونو سپەكتاكلدىڭ اۆتورى نيكولاي كوليادانىڭ تىكەلەي ۇيىمداستىرۋىمەن «كوليادا-Plays» دەگەن فەستيۆال وتەدى. وعان الىس جاقىن ەلدەردىڭ 30-عا جۋىق تەاترى قاتىسىپ, وزدەرىنىڭ ونەرلەرىن جۇرت تالقىسىنا سالادى. ءبىز دە وسى ونەر بايگەسىنە ات سالىسۋ نيەتىندە «تاسباقا ءۇمىتىن» ۇكىلەپ قوسقالى وتىرمىز», دەيدى قويىلىمنىڭ رەجيسسەرى, تۇڭعىش پرەزيدەنت – ەلباسى قورى سىيلىعىنىڭ لاۋرەاتى, اكتەر داۋرەن سەرعازين.
ايتا كەتەرلىگى, بۇل پسيحولوگيالىق درامانى قازاق تىلىنە اۋدارعان ن.ساۋدانبەك ۇلى بولسا, باستى رولدەردى ساحناعا شىعارعاندار, ياعني ء ۇمىتتى − بەيبىت قۇسانباەۆ, ارماندى − داۋرەن سەرعازين, باقىتتى − ءمادينا ماي ءسوزى مەن بوياۋىن, كيىم ۇلگىلەرىن كەلىستىرە وتىرىپ جۇرتشىلىققا ۇسىندى. تاعى ءبىر ەسكە سالا كەتەتىن اتاۋلى ءىس – باستى كەيىپكەرلەردىڭ اتىن قازاقتىڭ ارداقتى ۇعىمدارىنا سايكەستەندىرىپ الۋى دەر ەدىك.
ايمان مۇقىشەۆا,
«ەگەمەن قازاقستان»
