وسىدان جارتى عاسىر بۇرىنعى:
«اتاعى جوق ەسەنيندەر…
جىن قىسقان…
جاڭعىرادى جاتاقحانا ولەڭى.
مەنىڭ جيىرما جاسىم مۇڭ قۇشقان…
ءتۇن ورتاسى…
كوشە بويلاپ كەلەدى.
جاۋىنداتىپ كەلەدى,
داۋىلداتىپ كەلەدى,
ءان-جىر كەشىپ كەلەدى,
جاڭبىر كەشىپ كەلەدى,
جەلپ-جەلپ ەتىپ جەلەگى,
مەنىڭ جيىرما جاسىم كەلەدى...» – دەگەن بوزبالا جىردىڭ جەتپىستىڭ جالىنا قول ارتقان شاعىڭدا ەل تاراپىنان ۇلكەن قۇرمەتپەن وقىلىپ جاتسا – اقىن رەتىندە ارقانى كەڭگە سالۋىڭا تولىق نەگىز بار دەگەن ءسوز.
«قازاقستان پيونەرىنەن» مادەنيەت مينيسترلىگىنە اۋىساردا گازەتتىڭ باس رەداكتورى فاريزا اپكەسى قاتتى رەنجىپتى. ايتپاعى تۇسىنىكتى, مەملەكەتتىك قىزمەت پوەزياڭا كەرى اسەر ەتۋى مۇمكىن. قازاق پوەزياسىنىڭ پاديشاسىن الاڭداتقان دا ءا دەگەندە سۇيسىنتە كەلگەن ولەڭنىڭ تازالىعى بولسا كەرەك. ولەڭ مەن كوگەندى شاتاستىرىپ المايتىنىنا سەنگەنى شىعار, اقىرى ريزاشىلىعىن بەرىپ, شىعارىپ سالىپتى. ون تومدىقتىڭ تۇساۋكەسەرىندەگى سالتاناتتى جيىندا جازۋشى كادىربەك سەگىزباەۆتىڭ: «مەن مەملەكەتتىك قىزمەتتە جۇرسە دە ءوندىرىپ جازعان, قوس تىزگىندى تەڭ ۇستاعان ەكى ادامدى بىلەمىن. ءبىرى – ءابىش كەكىلباەۆ, ەكىنشىسى – وسى نۇرلان», – دەگەن ءسوزى دە كوپ نارسەنى اڭعارتادى.
اقىن, جازۋشىلار وداعى باسقارما توراعاسىنىڭ ءبىرىنشى ورىنباسارى عالىم جايلىبايدىڭ جيىننىڭ اشىلۋىندا ايتقان: «بيىلعى جىلى نۇرەكەڭنىڭ قاتارلارى 70 جاسقا كەلە باستادى. وسى جىلى قازاقتىڭ 38 بەلگىلى قالامگەرلەرىنىڭ مەرەيتويى وتەدى ەكەن. ونىڭ ىشىندە ومىردەن وتكەندەرى دە بار. بەلينسكي پۋشكين جايلى جازعان ماقالاسىندا «اقىندىق – ۇجىمدىق قۇبىلىس. ونى ورتا تاربيەلەيدى» دەگەن وي ايتىلادى. بۇل وتە راس ايتىلعان. ءبىر قالامگەردى زەرتتەپ ايتۋ ءۇشىن ونىڭ قاتارلارىن قاراۋ كەرەك», – دەگەن ءسوزى دە وسىدان شىقسا كەرەك.
«ان ارىس» باسپاسىنان شىققان ون تومدىق شىعارمالار جيناعى مەن ماسكەۋدىڭ «ميك» باسپاسى شىعارعان ورىس تىلىندەگى كىتاپتىڭ تۇساۋكەسەرىنە ارنالعان كەش «عارىش مىنەزدى جىرلار» تاقىرىبىندا ءوتتى. ولەڭدەر, پەسالار, سۇحباتتار مەن ءار جىلدارى جازىلعان ماقالالار مەن ەسسەلەر ەنگەن جيناقتىڭ تۇساۋىن قازاقستاننىڭ حالىق ءارتىسى ءسابيت ورازباەۆ, مەملەكەت جانە قوعام قايراتكەرى كەڭەس اۋحاديەۆ, جازۋشى, مەملەكەتتىك سىيلىقتىڭ لاۋرەاتى ءسابيت دوسانوۆ كەستى.
جازۋشىلار وداعى باسقارما توراعاسىنىڭ ورىنباسارى, «قالامگەر-مەديا» ورتالىعىنىڭ ديرەكتورى جاناربەك ءاشىمجان جۇرگىزگەن كەشتە اقىن جايلى ەستەلىكتەر, قۇتتىقتاۋ سوزدەر از ايتىلعان جوق. مارال ىسقاقباي, بەكسۇلتان نۇرجەكەەۆ, كادىربەك سەگىزباەۆ, سماعۇل ەلۋباي, ءشومىشباي ساريەۆ, قۋانىشباي قۇرمانعاليەۆ باستاعان زامانداستارى ون تومدىق ەڭبەك ورازالين شىعارماشىلىعىنىڭ ءبىر بەلەسى ەكەنىن, ىرىكتەلگەن ەڭبەك ەكەنىن ايتتى. مۇرات اۋەزوۆ «يزبراننوە» جيناعىنا ەنگەن ولەڭدەردىڭ ساپالى اۋدارىلعانىنا توقتالدى. ولجاس سۇلەيمەنوۆتىڭ العى سوزىمەن شىققان جيناققا ەنگەن ولەڭدەردى س.مناتساكانيان, ن.چەرنوۆا, ۆ.انتونوۆ, ل.شاشكوۆا, ا.ماتۆەەۆ, ق.باقبەرگەنوۆ, ب.جىلقىباەۆ, و.جانايداروۆ سىندى اۋدارماشىلار تارجىمالاعان. ولەڭدەرىنىڭ وزگە تىلدە دە تۇسىنىكتى, تارتىمدى اۋدارىلعانىن اقىننىڭ ءوز اۋزىنان دا ەستىدىك.
– ءوز ولەڭىڭدى وزگەنىڭ اۋزىنان تىڭداپ وتىرىپ, كەيدە «وسى ولەڭدى راسىندا مەن جازىپ پا ەدىم؟» دەگەن ءبىر سەزىم يەكتەيدى. بۇل ون تومدىق ءبىر جىلدىڭ ەمەس, مەنىڭ بۇكىل عۇمىرىمنىڭ, بار شىعارماشىلىعىمنىڭ جىلناماسىنداي. وتكەن جىلداردىڭ ءبىر ەسەبى رەتىندە وسى ون تومدىقتى جەتپىس جىلدىق مەرەيتويعا ورايلاستىرىپ, وزدەرىڭىزگە ۇسىنىپ وتىرمىن, – دەدى نۇرلان مىرقاسىم ۇلى قورىتىندى سوزىندە.
ت.جۇرگەنوۆ اتىنداعى قازاق ۇلتتىق ونەر اكادەمياسى «ساحنا ءسوزى» كافەدراسىنىڭ مەڭگەرۋشىسى, پروفەسسور, قازاقستاننىڭ ەڭبەك سىڭىرگەن قايراتكەرى داريعا تۇرانقۇلوۆانىڭ شاكىرتتەرى ساحنالاعان اقىن ولەڭدەرى كەشتىڭ ءارىن كىرگىزە ءتۇستى. ۇلتتىق كىتاپحانا قورى نۇرلان ءورازاليننىڭ ءومىرى مەن شىعارماشىلىعىنا ارنالعان كىتاپ كورمەسىن ۇيىمداستىردى.
الماس ءنۇسىپ,
«ەگەمەن قازاقستان»
الماتى
