«مەن بۇگىنگى زامانداستارىمىزدىڭ جەتىستىكتەرىنىڭ تاريحىنا دا نازار اۋدارۋدى ۇسىنامىن. بۇل يدەيانى «قازاقستانداعى 100 جاڭا ەسىم» جوباسى ارقىلى ىسكە اسىرعان ءجون. ەلىمىزدىڭ تاۋەلسىزدىك جىلناماسى جازىلا باستاعانىنا نەبارى 25 جىل بولدى. بۇل – تاريح تۇرعىسىنان قاس-قاعىم ءسات دەسەك تە, ەلىمىز ءۇشىن عاسىرعا بەرگىسىز كەزەڭ... شىن مانىندە, قازاقستاننىڭ ءاربىر جەتىستىگىنىڭ ارتىندا الۋان ءتۇرلى تاعدىرلار تۇر. «قازاقستانداعى 100 جاڭا ەسىم» جوباسى – تاۋەلسىزدىك جىلدارىندا تابىسقا جەتكەن, ەلىمىزدىڭ ءار وڭىرىندە تۇراتىن ءتۇرلى جاستاعى, سان الۋان ەتنوس وكىلدەرىنىڭ تاريحى. جوبادا ناقتى ادامداردىڭ ناقتى تاعدىرلارى مەن ءومىرباياندارى ارقىلى بۇگىنگى, زاماناۋي قازاقستاننىڭ كەلبەتى كورىنىس تابادى», دەگەن ەلباسى ماقالاسىنداعى وسى ءبىر جولدار جوبانىڭ بولاشاق ۇرپاق ءۇشىن قانشالىقتى ماڭىزدى ەكەنىن ايعاقتاسا كەرەك.
ەلباسىنىڭ رۋحاني جاڭعىرۋعا قاتىستى تاپسىرمالارىن جۇزەگە اسىرۋعا بايلانىستى ارنايى جۇمىس توپتارى قۇرىلعان بولاتىن. سولاردىڭ قاتارىندا اقپارات جانە كوممۋنيكاتسيالار مينيسترلىگى قازاقستان حالقى اسسامبلەياسى حاتشىلىعىمەن بىرىگىپ, «قازاقستانداعى 100 جاڭا ەسىم» جوباسىنىڭ باستى ورگانى رەتىندە بەلگىلەنگەن-ءدى. وتكەن جۇما كۇنى اقپارات جانە كوممۋنيكاتسيالار ءمينيسترى داۋرەن اباەۆتىڭ جەتەكشىلىگىمەن اتالعان جوبا جونىندەگى جۇمىس توبىنىڭ وتىرىسى ءوتتى.
اقپارات جانە كوممۋنيكاتسيالار ءمينيسترى داۋرەن اباەۆ: «تابىستى بولۋ – اتاقتى بولۋ دەگەن ءسوز ەمەس. تابىستى ادامداردىڭ ءبارى تانىمال ەمەس. سوندىقتان, ءبىزدىڭ جوبامىزدىڭ ماقساتى – ولاردىڭ ەلگە, قوعامعا سىڭىرگەن ەڭبەگىن كورسەتۋ, كوپشىلىككە تانىستىرۋ. جوبانىڭ اتى ايتىپ تۇرعانداي, ءبىز قازاقستانعا ءالى تانىلىپ ۇلگەرمەگەن جاڭا ەسىمدەردى ىزدەپ تابۋىمىز كەرەك. وسى باعىتتا جۇمىس جۇرگىزىپ جاتىرمىز», دەدى.
ءوز سوزىندە اقپارات جانە كوممۋنيكاتسيالار ءمينيسترى جۋرناليستەر قاۋىمىنا ارنايى قايىرىلدى. ولاردىڭ كاسىبي قىزمەتى بارىسىندا ءارتۇرلى تاعدىرلى جاندارمەن جۇزدەسىپ, تانىمال بولماسا دا تاعىلىمدى ءىس جاساعان كەيىپكەرلەرمەن ءجيى كەزدەسەتىنىن تىلگە تيەك ەتتى. جۋرناليستەردىڭ جازعان ماقالالارىنان, جاساعان رەپورتاجدارىنان ۇندەمەي ءجۇرىپ ۇلكەن ءىس تىندىرىپ جاتقان ازاماتتاردى سارالاپ, جاڭا ەسىمدەردى تابۋعا بولاتىندىعىن قاپەرگە سالدى.
ال قازاقستان حالقى اسسامبلەياسى توراعاسىنىڭ ورىنباسارى دارحان مىڭباي ءوز سوزىندە جوبانىڭ جۇيەلى جۇزەگە اسۋى ءۇشىن جان-جاقتى تالقىلاۋ كەرەكتىگىن تىلگە تيەك ەتىپ, ونىڭ ەل ەرتەڭى ءۇشىن وزەكتى بولارىن العا تارتتى.
«قازاقستانداعى 100 جاڭا ەسىم» – بۇل شىندىعىندا دا بۇرىن-سوڭدى بولماعان جوبا. ول ەلىمىزدىڭ دامۋىنا ۇلەس قوسقان ادامداردى كەڭىنەن ناسيحاتتاۋعا مۇمكىندىك بەرەدى. بىراق ولاردى ىرىكتەۋ بارىسىندا بىرجاقتى قاراماي, ازاماتتىڭ تۇلعالىق قابىلەتىنە دە باسا نازار اۋداراتىن بولامىز. تۇلعانىڭ بويىندا ىسكەرلىك, ادامگەرشىلىك, ءبىلىم, مادەنيەت دەگەن ۇعىمدار بولۋى مىندەتتى. ونىڭ جۇرەگىندە وسىنداي قاسيەتتەر بولعاندا عانا ول باسقالارعا ۇلگى بولا الادى. جۇمىس توبى وسىلاردى قالاي انىقتايمىز دەگەن سۇراقتىڭ جاۋابىن تابۋ جولىندا جۇمىس جاسايدى», دەدى قازاقستان حالقى اسسامبلەياسى توراعاسىنىڭ ورىنباسارى.
جوباعا ۇمىتكەرلەردى ىرىكتەۋ بارىسىندا ەلىمىزدىڭ بارلىق ايماقتارى قامتىلاتىن بولادى. جالپى, جوباعا قاتىستى ۇسىنىستار 2017 جىلدىڭ 5 ماۋسىمىنا دەيىن قارالادى. جوباعا قاتىستى «ەL.kz» سايتىنىڭ اياسىندا «قازاقستاننىڭ بەت-بەينەسى بولعىم كەلەدى» ايدارىن اشۋ جوسپارلانىپ وتىر. «قازاقستانداعى 100 جاڭا ەسىمدى» ىرىكتەۋ ءۇشىن «ەL.kz» پورتالىندا جاڭا فۋنكتسيا ىسكە قوسىلادى. ول ناعىز مۋلتيمەديالىق پورتالعا اينالادى. پورتالدا 100, 200 نەمەسە 500 ەمەس, بارلىق تابىستى ادامداردى ورنالاستىرساق دەگەن ۇسىنىس بار. كەز كەلگەن ادام قالاعان ۋاقىتىندا سايتقا كىرىپ, قازاقستاننىڭ جاڭا ەسىمدەرىمەن تانىسا الادى», دەدى داۋرەن اباەۆ.
ارنايى جۇمىس توبىنىڭ وتىرىسىنا قاتىسۋشىلار جاڭا ەسىمدەردى ىرىكتەۋ, سارالاۋ ساتىندە سان ءتۇرلى سالانىڭ تىزگىنىن ۇستاعان بىلىكتى ماماندار مەن ەرەن ەڭبەگىمەن كوزگە تۇسكەن جانداردىڭ قامتىلۋى كەرەكتىگىن ءبىراۋىزدان ماقۇلدادى. باسقالاي ايتقاندا, اتالعان جوباعا قاتىسۋشىلاردىڭ قاي-قايسىسى دا قازاقستاندىقتارعا ۇلگى بولاتىنداي تۇلعا بولۋى ءتيىس. سونىمەن, اقپارات جانە كوممۋنيكاتسيالار مينيسترلىگى قازاقستان حالقى اسسامبلەياسىمەن بىرىگىپ «قازاقستانداعى 100 جاڭا ەسىم» جوباسىن جۇزەگە اسىرۋدى باستادى. ەندەشە, ءبىز دە ىسكە ءسات دەيمىز.
راۋان قايدار,
«ەگەمەن قازاقستان»
سۋرەتتى تۇسىرگەن ەرلان وماروۆ
