زەرتحانانى تانىستىرۋ شاراسىنا «قازپوشتا» اق يننوۆاتسيالار جانە اقپاراتتىق تەحنولوگيالار جونىندەگى ديرەكتورى ناريمان مۇقىشەۆ, دەرەكتەردى باسقارۋ دەپارتامەنتىنىڭ ديرەكتورى باقتيار مۇحامەتقاليەۆ, سۇلەيمەن دەميرەل ۋنيۆەرسيتەتىنىڭ وقۋ ءىسى جونىندەگى ءبىرىنشى پرورەكتورى سالتانات امىرعاليەۆا, كومپيۋتەرلىك عىلىمدار كافەدراسىنىڭ مەڭگەرۋشىسى ءمادينا ءاليمانوۆا, جوعارى وقۋ ورنىنان كەيىنگى ءبىلىم بەرۋ دەپارتامەنتىنىڭ ديرەكتورى ماقسات مۇسابەكوۆ, كورپوراتيۆتىك دامۋ مەنەدجەرى ماحمۇت تومانوۆ قاتىستى.
«3D-باسپا – قازىرگى كەزدە مەديتسينا, قۇرىلىس, جوبالاۋ جانە باسقا دا سالالاردا قارقىندى دامىپ كەلە جاتقان رەۆوليۋتسيالىق تەحنولوگيا ەكەنى ءسوزسىز. قازاقستاندا دا وسى تەحنولوگيانى دامىتۋدىڭ ماڭىزدىلىعىن تۇسىنە وتىرىپ, ءبىز بۇگىن قازپوشتادا 3D-باسپا زەرتحاناسىن اشتىق. ءبىزدىڭ باستى ماقساتىمىز – 3D-باسپامەن نەعۇرلىم كوپ ادامداردى تانىستىرىپ, ولاردىڭ كەز كەلگەن شىعارماشىلىق يدەيالارىن ىسكە اسىرۋعا كومەكتەسۋ. بۇل زەرتحانا ەكونوميكانىڭ وسى باعىتىن دامىتۋ جولىنداعى ۇلكەن قادام بولادى دەپ ويلايمىن», دەدى ناريمان مۇقىشەۆ.
سۇلەيمەن دەميرەل ۋنيۆەرسيتەتىنىڭ اعاتاەۆ اسىلجان, توقمانوۆ باۋىرجان سىندى ونەرتاپقىش ستۋدەنتتەرى جاساعان 3D پرينتەردى جالعا الۋ ارقىلى اتالمىش زەرتحانا جۇمىسىنا ستۋدەنتتەردى جۇمىلدىرا وتىرىپ, ولارعا تەحنيكالىق قولداۋ كورسەتۋدى, شىعىس ماتەريالدارىمەن قامسىزداندىرۋدى موينىنا العان «قازپوشتا» ەندى 3D ونىمدەرىنە تاپسىرىس الا باستاماق. ال ۋنيۆەرسيت ستۋدەنتتەرى ءوز كەزەگىندە, 3D-زەرتحانا بازاسىندا جاڭا تەحنولوگيالاردى سىناقتان وتكىزىپ, ءوز جوبالارىن اقشاعا اينالدىرۋ مۇمكىندىگىنە يە بولماق.
ۆيرتۋالدى 3D-ۇلگىلەردىڭ نەگىزىندە كولەمدى زاتتاردى باسىپ شىعاراتىن 3D-پرينتەر جاي قاعاز پاراعىن باسىپ شىعاراتىن كادىمگى پرينتەرگە قاراعاندا ءۇش ولشەمدى اقپاراتتى كوزبەن كورىپ, قولمەن ۇستاۋعا, ناقتى ءبىر فيزيكالىق پىشىندەردى, بۇيىمداردى جاساپ شىعارۋعا مۇمكىندىك بەرەدى.
«قازپوشتانىڭ» الماتى ورتالىعىندا اشىلعان بۇل 3D-زەرتحاناسى قازاق تىلىندە برايل قارپىمەن كىتاپتار شىعارۋ, كادەسىيلار, كىلت ىلمەكتەرى, ويىنشىقتار, كوزىلدىرىك جيەكتەمەلەرى جانە وزگە دە بۇيىمداردى, تۇتىنۋشىلار تاپسىرىس بەرگەن 3D-ۇلگىلەردى باسىپ شىعارۋدى نەگىزگى باعىتتار ەتىپ الماق.
زەرتحانا قىزمەتتەرىن كەز كەلگەن ازامات قولدانا الاتىنىن ايتقان پوشتا قىزمەتكەرلەرى تەك الدىمەن postmarket.kz سايتىنا كىرىپ, قاجەتتى مودەلدىڭ ۇلگىسىن تاڭداپ, باسىپ شىعارۋعا تاپسىرىس جىبەرۋ جەتكىلىكتى دەيدى. باسىپ شىعارىلعان ۇلگىنى قازپوشتا قىزمەتكەرلەرى وتىنىمدە كورسەتىلگەن مەكەن-جاي بويىنشا جونەلتپەك.
«سايتتا كورسەتىلگەن ۇلگىلەردەن وزگە, 3D-ۇلگىنىڭ نۇسقاسىن نەمەسە جاي عانا سۋرەتتى جىبەرۋگە بولادى. ولاردىڭ نەگىزىندە ستۋدەنتتەر ءۇش ولشەمدى ۇلگى جاساپ, تاپسىرىستى ورىندايدى. 3D-ۇلگىلەردىڭ قۇنى كليەنتتەر تاپسىرىس بەرگەن كەزدە ەسەپتەلەدى», دەيدى سالتانات امىرعاليەۆا.
«قازپوشتا» اق الداعى ۋاقىتتا استانا قالاسىندا دا 3D زەرتحاناسىن اشۋدى قولعا الماق.
ميرا بايبەك,
«ەگەمەن قازاقستان»
