بۇل اعا بۋىن ءۇشىن جىلى ەستەلىكتەر جانىن جادىراتقان جۇزدەسۋ بولسا, جاس بۋىنعا وتكەننىڭ ونەگەسىندەي تاعىلىمى مول كەزدەسۋگە اينالىپ سالا بەردى.
باسىلىم باسشىسى دارحان قىدىرالى گازەتتىڭ قوس ارداگەرىن ۇجىم اتىنان قۇتتىقتاپ, ولاردىڭ قازاق ءباسپاسوزىن دامىتۋعا قوسقان ۇلەسى زور ەكەنىن, اتقارعان ەڭبەكتەرى وقىرمان تاراپىنان دا, مەملەكەت تاراپىنان دا باعالانعانىن اتاپ ءوتتى. قايسار ءالىمنىڭ الاش ارىستارىنىڭ اتى اتالماي تۇرعان كەزەڭىندە اسىلدىڭ سىنىعى گۇلنار دۋلاتوۆامەن بىرگە قازاق كوسەمسوزىنىڭ نەگىزىن سالۋشىلاردىڭ بىرەگەيى مىرجاقىپتىڭ ءمايىتىن تۋعان جەرگە الىپ كەلۋگە اتسالىسقانىن, جۋرناليست-جازۋشى ءازىلحان نۇرشايىقوۆپەن ۇزاق جىلدار بويى حات جازىسقانىن, سول سياقتى جانات ەلشىبەكتىڭ دە جازعان ادەبي-مادەني شىعارمالارى مەن ۇلت باسپاسوزىندە تۇڭعىش رەت قۇراستىرعان سوزجۇمباقتارىمەن بۇگىنگى بۋىن مەكتەپتەن ەتەنە تانىس ەكەنىن جەتكىزدى. ال گازەتتىڭ بۇرىنعى باسشىسى, پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ ابيتۋريەنت كەزدە ءسوز زەرگەرى عابەڭدى كورگەنىن ەسكە الىپ, كوپ ۇزاماي 70 جاسقا تولعان قازاق ادەبيەتىنىڭ كلاسسيگى ع.مۇسىرەپوۆتىڭ مەرەيتويى الماتىداعى وپەرا جانە بالەت تەاترىندا سالتاناتپەن اتالىپ وتكەنىن, سول كەزدەگى عابەڭدەر تولعان جاس پەن قازىرگى جاڭا تۇرپاتتى قازاقستانداعى 70 جاستىڭ اراسىنداعى ولشەم وزگەرگەنىن, بۇگىندە بۇل ورتا جاسقا اينالعانىن, سوندىقتان قوس قالامگەردىڭ ءالى دە وقىرمانىنا بەرەرى مول ەكەنىن ايتتى.
ءباسپاسوز ارداگەرى ەرجۇمان سمايىل ەكى قالامگەرمەن دە «لەنينشىل جاس» گازەتى تابىستىرعانىن, ق.ءالىمنىڭ قوستانايداعى مەنشىكتى ءتىلشى رەتىندە قالىڭ وقىرمان ءىلتيپاتىنا بولەنگەنىن, ج.ەلشىبەكتىڭ جاستايىنان جاستار گازەتىنىڭ جاڭاشىل ماكەتشىسى بولعانىن اتاپ ءوتتى. اعا باسىلىمداعى جىلداردىڭ دا الىستاپ بارا جاتقانىن, ارىپتەستەرىن ءالى كۇنگە دەيىن ساعىنىپ وتىراتىنىن ايتتى. گازەتتىڭ تاعى ءبىر ارداگەرى جۇماگۇل سولتيەۆا بولسا, قوس قالامگەرمەن ۇزاق جىل بىرگە ەڭبەك ەتكەنىن, ەكى ارىپتەسىنىڭ دە ەلگە سىڭىرگەن ەڭبەگى ەرەن ەكەنىن جەتكىزدى. «لەنينشىل جاس» گازەتىندە جۇرگەنىمىزدە باس رەداكتورىمىز سەيداحمەت بەردىقۇلوۆ قوستاناي وڭىرىنەن تولاسسىز جازىپ جاتاتىن قايساردى ء«بىزدىڭ مىق شەگەمىز» دەپ اتاسا, جاناتتى «گەنەرال», ياعني, «قازاق ماكەتىنىڭ گەنەرالى» دەپ اتايتىن ەدى, دەدى ول. باسقوسۋدا سونىمەن بىرگە گازەت قىزمەتكەرى قورعانبەك امانجول ارىپتەستەرىنە ارنالعان جىر جولدارىن وقىپ بەرسە, جاس ءتىلشى ءارى ايتىسكەر اقىن راۋان قايدار ارناۋ ايتىپ, ءبىر سەرپىلتىپ تاستادى.
ءوز كەزەگىندە مەرەيتوي يەلەرى زور قۇرمەت كورسەتكەن ءتول رەداكتسيالارىنىڭ ۇجىمىنا ريزاشىلىقتارىن ءبىلدىرىپ, مارقايعان كوڭىلمەن عۇمىرلارىنىڭ التىن ارقاۋىنا اينالعان گازەتتەگى جىلدارى تۋرالى اڭگىمە ءوربىتتى.
– سول كەزدە تورعاي وبلىسى قايتادان اشىلدى دا, وسى وڭىردەگى مەنشىكتى ءتىلشى رەتىندە 43 جاسىمدا «ەگەمەنگە» كەلدىم. شەراعاڭ جۇمىسقا الار كەزدە بەتىمە قاراپ وتىرىپ «كارى ەمەس پە؟» دەگەنى ەسىمدە. بۇيرىققا قول قويىپ جاتىپ, ەلگە بارعان سوڭ نە جازاتىنىمدى سۇرادى. تامىز ايى ەدى. ەگىن وراعى قىزۋ ءجۇرىپ جاتىر. سونى ايتىپ ەدىم, وراق ماۋسىمىن ەكىنىڭ ءبىرى جازاتىنىن, ال مەنىڭ وبلىس جابىلعاندا جەزقازعانعا كوشىرىلگەن قازاق تەاترى تۋرالى جازۋىم كەرەكتىگىن ەسكەرتتى. ەلگە كەلگەن سوڭ وبلىس باسشىسى ۋكينگە ايتىپ ەدىم, ول وراقتى نەگە جازبايسىڭ, قازىر كۇيىپ تۇرعان شارۋا وسى, دەدى. مەن مۇنىڭ شەراعاڭنىڭ تاپسىرماسى ەكەنىن ايتىپ ەدىم, وبلىس باسشىسى ۇندەمەي وتىرىپ قالدى, دەيدى جىلى ەستەلىكتەرىمەن بولىسكەن ق.ءالىم. ال «سوتسياليستىك قازاقستانعا» 27 جاسىندا كەلگەن ج.ەلشىبەك گازەتتى باسۋعا كۇندەلىكتى قانشا توننا قاعاز جۇمسالاتىنىن جانە گازەت باسىلاتىن باسپاحانانىڭ ء«داۋىر» اتالۋى شەراعاڭنىڭ تىكەلەي ىقپالىمەن بولعانىن اتاپ ءوتىپ, بۇگىندە زاماناۋي تەحنولوگيانىڭ جەتىستىگىمەن وقىرماندار سانى ينتەرنەتتە دە ارتىپ وتىرعانىنا, گازەتتىڭ بارلىق بەتى ءتۇرلى-ءتۇستى بوياۋمەن جارقىراپ شىعىپ جاتقانىنا, باسىلىمنىڭ ۋاقىت تالابىمەن ۇيلەسىمدى ۇندەسكەنىنە ايرىقشا قۋاناتىنىن ايتتى.
دۋمان اناش,
«ەگەمەن قازاقستان»
