ارداگەرلەردى ارداقتاۋ باعىتىنداعى ءىس-شارالار وڭىردە مامىر ايىنىڭ العاشقى كۇندەرىنەن باستالىپ كەتتى دەۋگە بولادى. وبلىس اكىمى دانيال احمەتوۆ 5 مامىر كۇنى وسكەمەندە وڭىردەگى ۇلى وتان سوعىسىنىڭ 30 ارداگەرىنە ەلباسى اتىنان 500 مىڭ تەڭگەلىك سەرتيفيكاتتى سالتاناتتى تۇردە تاپسىرىپ, مەرەكەلىك داستارقان جايىپ, وسى كۇنى قالاداعى بىرنەشە سوعىس ارداگەرىن ۇيىنە ارنايى بارىپ قۇتتىقتاپ, وسىنداي سىي-سياپاتتى تابىس ەتتى.
ەرتەڭىندە كوكپەكتى اۋدانىنداعى 3 بىردەي كەڭەس وداعىنىڭ باتىرى شىققان پودگورنوە اۋىلىنا بارىپ, اۋدان-اۋىل تۇرعىندارىن مەرەكەمەن قۇتتىقتاپ, بىرنەشە سوعىس ارداگەرىنە جوعارىدا اتالعان 500 مىڭ تەڭگەلىك سەرتيفيكاتتى تاپسىردى. سونىمەن قاتار وسى كۇنى سەمەيدەگى بىرنەشە سوعىس ارداگەرىنىڭ ۇيىنە بارىپ, سىي-قۇرمەت كورسەتتى. وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى ەلەنا ستارەنكوۆا مۇنداي سىياقى وبلىستا تۇراتىن 328 ارداگەرگە تاپسىرىلاتىنىن ايتتى. ال تىل ارداگەرلەرىنە قالا مەن اۋدان اكىمدىكتەرى مۇمكىندىگىنشە قارجىلاي جانە ماتەريالدىق تۇرعىدان قولداۋ كورسەتەدى.
مەرەكە قارساڭىندا ايماقتىڭ تۇكپىر-تۇكپىرىندە ومىردەن وتكەن, ەرلىگىمەن ەل ەسىندە قالعان ارداگەرلەردىڭ ەسىمدەرىن ۇلىقتاۋ ماقساتىندا بىرقاتار تاعىلىمدى ءىس-شارالار قولعا الىندى. ماسەلەن, سەمەيدەگى دالنيايا كوشەسىنە كەڭەس وداعىنىڭ باتىرى زاكاريا بەلىباەۆتىڭ, ال كاتونقاراعاي اۋىلىنداعى لەنين اتىنداعى ورتا مەكتەپكە سەيىتقامزا لاستاەۆتىڭ ەسىمى بەرىلدى.
وسكەمەندە كەڭەس وداعىنىڭ باتىرى تولەگەن توقتاروۆتىڭ قۇرمەتىنە كوشە مەرەكەسى ۇيىمداستىرىلىپ, قالا تۇرعىندارى باتىردى ەسكە الىپ, تۇرلى مادەني-تانىمدىق ءىس-شارالار وتكىزدى. اياگوز اۋدانىندا كەڭەس وداعىنىڭ باتىرى مۇقاتاي ابەۋ ۇلىنىڭ عاسىرلىق مەرەيتويىنا وراي سارىقامىس اۋىلىنداعى باتىر ەسىمى بەرىلگەن مەكتەپتە مۇراجاي, ەلدى مەكەندە «ەرلىك داڭقى» ساياباعى اشىلدى.
ال ەندى بۇگىنگى كۇنگە كەلسەك. وسكەمەندىكتەر ۇلى جەڭىس مەرەكەسىن تاڭ بوزىنان بەرى اتاپ ءوتىپ جاتىر دەسەك ارتىق ايتپاعان بولارمىز.
«داڭق پولكى» اكتسياسى اياسىندا 10 مىڭنان استام قالا تۇرعىندارى تاڭعى ساعات 10-دا وزەن ۆوكزالىنا جينالىپ, «داڭق» مەموريالىنا دەيىنگى ارالىقتى جاياۋ ءجۇرىپ ءوتتى. مايدانگەرلەردىڭ سۋرەتتەرىن كوتەرىپ, شەرۋدى باستاعان تۇرعىندار اراسىندا وبلىس اكىمىمەن قاتار ءوڭىردىڭ وزگە دە لاۋازىمدى تۇلعالارى بولدى. ەرتىس جاعاسىنداعى الاڭقايعا جينالعان قالا جۇرتشىلىعىن ايماق باسشىسى دانيال احمەتوۆ مەرەكەمەن قۇتتىقتاپ, جىلى لەبىزىن ءبىلدىردى.
«قىمباتتى ارداگەرلەر! قۇرمەتتى شىعىسقازاقستاندىقتار! سىزدەردى ۇلى وتان سوعىسىنداعى جەڭىس كۇنىمەن شىن جۇرەكتەن قۇتتىقتايمىن. وبلىسىمىزدىڭ قالالارى مەن اۋداندارىنان مايدانعا 170 مىڭنان استام ادام شاقىرىلعان بولاتىن. شىعىس قازاقستاننىڭ 109 جاۋىنگەرى «كەڭەس وداعىنىڭ باتىرى» اتاعىن يەلەندى. ۇلى وتان سوعىسى جىلدارى الىستاعان سايىن اكەلەرىمىز بەن اتالارىمىزعا دەگەن قۇرمەتىمىز ودان ءارى ارتا تۇسپەسە كەمىمەك ەمەس. وتان ءۇشىن وتقا تۇسكەن جاندارعا باسىمىزدى يەمىز. مەرەكەلەرىڭىز قۇتتى بولسىن, قىمباتتى جەرلەستەر», - دەدى وبلىس اكىمى.
بۇدان كەيىن ايماق باسشىسى باستاعان لاۋازىمدى تۇلعالار, باسقارما, كاسىپورىن باسشىلارى مەن ءارتۇرلى ۇيىمداردىڭ جەتەكشىلەرى, ارداگەرلەر مەن جاستار «ماڭگىلىك الاۋعا» گۇل شوقتارىن قويدى.
ءدال وسى جەردە اسكەري تەحنيكالاردىڭ كورمەسى ۇيىمداستىرىلىپ, سوعىس ارداگەرلەرىنە سولدات بوتقاسى تاراتىلدى. سونىمەن قاتار تەاتردىڭ اكتەرلەرى تىرى ەسكەرتكىشكە اينالىپ, قالا تۇرعىندارىن ەرەكشە قۋانىشقا بولەدى.
قالاداعى مەرەكەگە ارنالعان ءىس-شارالار ءالى دە جالعاسۋدا. كەشكە قاراي «داڭق» مەموريالىندا «بۇل تىرىلەر ءۇشىن قاجەت» اتتى تەاترلاندىرىلعان كورىنىس ۇيىمداستىرىلىپ, «مايشام جاق» اكتسياسى وتەتىن بولادى.
ازامات قاسىم,
«ەگەمەن قازاقستان»
وسكەمەن
