لاس-ۆەگاستاعى جەڭىس

شارشى الاڭدا تاعى دا بەيبىت شۇمەنوۆ. الدىندا عانا كوك­ورىم شاعىندا, وليمپيادا ويىن­دارىنىڭ جەڭىمپازى بولعاننان كەيىن كاسىپقوي بوكسقا اۋىسىپ كەتكەن اعىلشىندىق امير حان ءوز قارسىلاسىن تاس-تالقان ەتكەن. ەندىگى كەزەك شىمكەنتتەگى بەل­گىلى مەتسەنات, كاسىپكەر ءامىر­حان­نىڭ بالاسى بەيبىتتە. نەۆادا شتاتى. اتاقتى لاس-ۆەگاستىڭ حا­لىقارالىق سپورت ارەناسىنىڭ تورىنە تىگىلگەن شارشى الاڭ. ەكى جۇيە بويىنشا الەم چەمپيونى بەيبىت شۇمەنوۆ WBA التىن بەل­دىگىنە كوزىن ساتقان دەنني سانتياگو جۇدىرىقتاسپاق. دەن­­ني­دىڭ الەم چەمپيونىنىڭ التىن بەلدىگىن تاعىنۋدى ارمانداپ ءجۇر­گەنى بۇگىن ەمەس. قار­سى­لاس­تارىن قوعاداي جاپىرىپ اق­تىق سىنعا ءۇش رەت شىقتى. بىرىندە انتونيو تارۆەر مەسەلىن قاي­تاردى. ەكىنشىسىندە دجو ەر­دەي­دەن وڭباي جەڭىلدى. قالاي دەگەندە دە بەيبىتتەن 11 جىل بۇرىن كويلەك توز­دىرعان سانتياگو بۇل جولى شي­رى­عىپ كەلىپتى. “شۇمەنوۆتەن گورى مەن ءتاجى­ريبەلىمىن. الەم چەمپيونى بولۋ­عا دايىندىعىم جاقسى. ەگەر بۇل جولى جولىم وڭعارىلماسا, قول­عابىمدى شەگەگە ىلەمىن”. كوكجال سانتياگو سولاي دەپتى. قوڭىراۋ سوعىلىسىمەن دەن­ني باس-كوزگە قاراماي العا ۇم­تىلدى. تىڭ كەزىندە شا­رۋا­نى ىڭعايىنا كەلتىرمەك نيەتتە. بەيبىت شەگىنە ايقاس سالدى. ايتسە دە قازاق بوكس­شىسىنىڭ جىلدام­دى­عى, ال­ىمدىلىعى انىق بايقالىپ تۇردى. “ساۋت-پوينت” قوناق ءۇيى­نىڭ تۇندىگى سوققىلاردىڭ لەبىنەن جەلپىلدەيدى. ەكىنشى راۋند. ءۇشىنشى راۋند. ءتورتىنشى راۋند. قوس قو­لىن ەكى جاعىنا جاستىق قى­لىپ الىپ, العا ۇمتىلعان دەن­نيدىڭ ماڭ­دا­يى قازاق ۇلى­نىڭ شويىن جۇ­دى­رىعىنان تاسقا تيگەندەي بولسا دا قاي­تار ەمەس. ونىڭ دا سوق­قى­لارى اراگىدىك بولسا دا ءوتىپ ءجۇر. بەسىنشى راۋندتىڭ سو­ڭى­نا تامان بەيبىتتىڭ ۇرعان سوققىسىن سول جاعىنا قيسايا بەرە وتكىزىپ جىبەرگەن دەنني وڭ قولىن شىرەنە سەرمەدى. ءبىزدىڭ ۇلان ءسال شالقاي­ىڭ­قىراپ كەتتى. وسىنىڭ ءوزى بەيبىتتىڭ ىزا­سى­نا قاتتى ءتيدى بىلەم. ەندى ول دەن­نيدى تىقسىرا باستادى. شار­شى الاڭدا 31 رەت جەڭىس تويىن تويلاپ, سونىڭ 19-ىندا قارسى­لاسىن نوكاۋتقا جىققان, تەك 5 رەت قانا جەڭىلىستىڭ ءدامىن تاتقان امە­ري­كالىق جىگىتتىڭ جەڭىستەن كۇدەر ۇزە باستاعاندىعى جانا­رى­نان سەزىلىپ قالعان. قوس كوزدىڭ استى سوققىلاردان بۇيرەكتەي بۇل­تيا­دى. سەنىمسىزدىك بار. توعىزىنشى راۋندتىڭ 44-ءشى سە­­كۋندىندا بەيبىت ارىستانداي اي­­بات شاقىرىپ, دەننيدى كەرمە ارقاعا قۋىپ كەلىپ قامادى. كۇن­دەي كۇركىرەگەن قازاق جىگىتى شوق­پار جۇدىرىقتى جاڭبىرداي جاۋ­دىر­دى. دەننيدىڭ باسىنا قارا بۇلت ءۇي­ىرىلدى, نايزاعاي وينادى. قور­عا­لار جەرى جوق. باسىن تىق­قان قوس قولى دا كومەكتەسە ال­ما­دى. ەندى كەشىكسە ەدەنگە ەس-ءتۇسسىز وڭباي قۇ­لا­رىن سەزگەن رەفەري ۇشىپ كەلىپ ور­تاعا كيلىكتى. دەن­ني ءالسىز قار­سى­لىق ءبىلدىردى. تەح­نيكالىق نوكاۋت. ءامىرحان كوكەمىزدى قۇتتىق­تا­دىق. “قالاي بولار ەكەن دەپ ءجۇ­رەگىم اۋزىما تىعىلعان. جوق, مە­نىڭ ۇلىم مىقتى ەكەن. حالقى­نىڭ نامىسىن بەرمەدى”. قاھار­لان­سا جان شىداتپايتىن جىگىت اعاسى ۇلى رينگكە شىققاندا دەگبىرسىزدەنىپ كەتەدى. سان رەت باي­قاعانبىز. اسىلىندە, انالاردىڭ جۇرەگى نازىك بولادى دەپ جاتادى. ءاي, قاي­دام. باتىر ۇل تۋعان انالار­دىڭ ءوزى باتىر. سيدنەيدە مۇح­تارحان توبەسىمەن كوك تىرەگەن رۋبالكابامەن جەكپە-جەككە شىق­قان­دا قاعىلەزدەۋ اكەسى كوزىن ءسۇر­تىپ, ۇيدە وتىرا الماي قورا اينا­لىپ كەتىپتى. ال اناسى بولسا مال­داس قۇرىپ وتىرىپ الىپ, قوس قولىن كەزەك-كەزەك سەرمەپ: “ۇر, مۇحتارحان, ۇر!” دەپ ەكرانعا كىرىپ كەتە جازداعان دەيدى. بولعان وقيعا. مۇحتارحاننىڭ اعاسى ەرحان ايتقان. سول سياقتى بەيبىتتىڭ اناسى ساۋلە اپكەمىز­دىڭ دە ۇلى شارشى الاڭعا شىق­قان­دا بوساعان ءساتىن كورمەپپىز. ۇلى­نا قاتتى سەنەتىن بولۋى كەرەك. بەيبىتتى ءىنىسى شىڭعىس بولىپ قۇتتىقتاپ جاتقاندا شارشى الاڭ­عا WBC جۇيەسى بويىنشا الەمنىڭ ەكس-چەمپيونى جان پاسكال قارعىپ شىقتى. قۇتتىقتاپ تۇرىپ كۇش سىناسۋعا شاقىردى. ءوزىنىڭ تۋىپ-وسكەن كاناداسىنا. بەيبىت ءوزىنىڭ قازاقستاندىق ەكەنىن ايتىپ, ەكى جاققا دا ورتاق لاس-ۆەگاستا وتكىزۋدى ۇسىندى. – بۇكىل قازاق حالقى بولىپ تىلەۋىمدى تىلەپ وتىرعانىن بىلەمىن. سوندىقتان دا جەڭىلۋگە حاقىم جوق ەدى. امەريكانىڭ تورىندە قازاق بايراعىنىڭ جەلبىرەگەنىن دۇنيە ءجۇزى كوردى. ۇلتىمنىڭ ءبىر كەرەگىنە جاراعانىمدى ماقتا­نىش كورەمىن, – دەپتى باتىر ۇل اكە­سىمەن تەلەفون ارقىلى تىلدەسكەندە. بارەكەلدى! باقتيار تايجان.