30-31 شىلدەدە استاناداعى «مەترو» ساۋدا ورتالىعىنىڭ اۋماعىندا اۋىل شارۋاشىلىعى مينيسترلىگى, استانا قالاسىنىڭ اكىمدىگى جانە «قازاگرو» ۇلتتىق باسقارۋشى حولدينگى» اق-تىڭ رەسمي قولداۋىمەن بەسىنشى رەت ەلىمىزدىڭ اگروونەركاسىپتىك جەتىستىكتەرىنىڭ «قاراوتكەل- 2011» رەسپۋبليكالىق جارمەڭكەسى بولىپ ءوتتى. داستۇرگە ساي رەسپۋبليكانىڭ بارلىق ايماقتارىنان كەلگەن كاسىپكەرلەر مەن شارۋا قوجالىقتارى ەلوردا تۇرعىندارى مەن قوناقتارىنا ءوز تاۋارلارىن ۇسىندى.
مالمەن كوزىن اشقان قازاق ءۇشىن مۇندا جينالعان جۇرتشىلىقتى العاشقى كەزەكتە قىزىقتىرعانى, ارينە, ءتورت ت ۇلىكتىڭ ءتۇرلەرى ەدى. ەلىمىزدىڭ بارلىق ايماقتارىنان دەرلىك اكەلىنگەن اسىل تۇقىمدى مالدار ءتۇرى وتە كوپ بولدى. استانا ىرگەسىندەگى قوسشى اۋىلىنان ورىن تەپكەن «اسىل ت ۇلىك» اق بازاسىندا وسىرىلگەن ءمۇيىزدى ءىرى قارالار مەن سەمەيدىڭ «گۇل-رايحان» شارۋا قوجالىعىنان كەلگەن شوپان اتا تولدەرى قاراعان جاننىڭ قىزىعۋشىلىعىن تۋدىرماي قويمايدى. سونداي-اق, اسىل تۇقىمدى ەتتى باعىتتاعى جىلقىلار دا جارمەڭكەگە كەلگەندەردىڭ نازارىن وزدەرىنە اۋدارا بەردى. مۇنان وزگە ءۇي قۇستارىنىڭ ءبىر توبى دا جارمەڭكە سورەسىنەن ورىن الىپتى.
اتى ايتىپ تۇرعانداي, اۋىلشارۋاشىلىق جارمەڭكەسى بولعان سوڭ مۇندا ءوندىرىلەتىن ءونىم تۇرلەرى دە نازاردان تىس قالمايتىندىعى بەلگىلى. بۇل رەتتە جامبىل وبلىسى, جامبىل اۋدانى, گرودەكوۆو اۋىلىنان ات ارىلتىپ كەلگەن جەكە كاسىپكەر ەركىنبەك توققۇلوۆتىڭ ۇسىنعان ءسۇت ونىمدەرىنەن جاسالعان تاعامدارىن ايتقان ءجون. كاسىپكەر جەتى ادامدى جۇمىسپەن قامتىسا, ورتاشا جالاقى 20 مىڭ تەڭگەنى قۇرايدى ەكەن. وبلىسقا باعىتتالعان ونىمدەرى قازىرگى كۇندەرى تۇتىنۋشىلار تاراپىنان جىلى باعالار الىپ جاتقانعا ۇقسايدى. اۋىلدىق جەردە تۇرىپ, تۇرعىنداردى جۇمىسپەن قامتۋدا جۇمىس جاساپ جاتقان كاسىپكەرگە العىستان باسقا ايتار جوق. ال تاراز قالاسىنداعى «دانەگۇل» جشس ءسۇت ونىمدەرى, سونىڭ ىشىندە, قويۋلانعان ءسۇت ءونىمدەرىمەن اينالىسسا, كاسىپورىندا وتىزدان استام ادام جۇمىسپەن قامتىلعان. تاۋارلارىنىڭ جىلدىق اينالىمى 59 ملن. تەڭگەنى قۇرايدى.
ديقاندىقپەن اينالىساتىن اۋىل حالقى ءۇشىن اۋاداي قاجەت تەحنيكانىڭ كوپتەگەن ءتۇرى دە وسىندا كورىنىس تاپقان. «اگروماش حولدينگ» اق ۇسىنعان اتالمىش تەحنيكالار شارۋاشىلىقتىڭ بارلىق تۇرىنە قىزمەت ەتۋگە دايار تۇر. الەمنىڭ ءبىرقاتار ەلدەرىمەن ءارىپتەستىك بايلانىس ورناتقان كومپانيانىڭ قىزمەتى قاشاندا حالىققا ءازىر ەكەنى جارمەڭكەنى ارالاعاندا انىق بايقالدى. سونىمەن قاتار, اتىراۋ وبلىسىنان كەلگەن «امانگەلدى» وندىرىستىك كووپەراتيۆى ونىمدەرىنىڭ بارلىق جاعىنان حالىققا ىڭعايلاپ جاسالعانى دا ەشكىمدى بەي-جاي قالدىرمادى.
«قاراوتكەل-2011» جارمەڭكەسى اياسىندا II حالىقارالىق «KazMeat&Milk-2011» مال شارۋاشىلىعى فورۋمى وتسە, اۋىل شارۋاشىلىعى مينيسترلىگى وكىلدەرى مەن تاۋەلسىز ساراپشىلار تاراپىنان ۇزدىك اۋىلشارۋاشىلىق تاۋار وندىرۋشىلەرى انىقتالدى. جارمەڭكەگە قاتىسۋشىلاردىڭ ءۇزدىكتەرى ۇيىمداستىرۋ القاسىنىڭ اتىنان «قاراوتكەل-2011» التىن مەدالىمەن ماراپاتتالدى. وسىلايشا جارمەڭكە ساراپشىلار مەن اگروكاسىپورىنداردىڭ تاجىريبە الماسۋلارىنا مۇمكىندىكتەر بەرىپ, اۋىلشارۋاشىلىق ونىمدەرىنىڭ باسەكەلەستىككە قابىلەتتىلىگىن ارتتىرۋعا, سونداي-اق, ءونىم وندىرۋشىلەر مەن ساۋدا جەلىلەرىنىڭ ىسكەرلىك بايلانىستارىن ورناتۋعا وزىندىك سەرپىن بەردى.
ءابدىراحمان قىدىربەك, سۋرەتتەردى تۇسىرگەن اعىباي اياپبەرگەنوۆ.
