«بولاشاققا» ۇمىتكەرلەر ىرىكتەۋ اشىق جاعدايدا جۇرگىزىلدى

كەشە ءبىلىم جانە عىلىم مينيسترلىگىندە «بولاشاق» باعدار­لا­ماسىنا ۇمىتكەرلەردى ىرىكتەۋ بوي­ىنشا تاۋەلسىز ساراپتاما كو­ميس­سياسىنىڭ اشىق وتىرىسى ءوت­­تى. اشىق وتىرىس بولاتىن سەبەبى, ول بۇقارالىق اقپارات قۇرا­ل­دا­رى وكىلدەرىنىڭ قاتىسۋىمەن جاريالى تۇردە ءوتتى. – بۇقارالىق اقپارات قۇرال­دا­رى وكىلدەرىنىڭ قاتىسۋىمەن «بو­لا­شاققا» ۇمىتكەرلەردى اشىق جاع­دايدا ىرىكتەۋ ۇدەرىسى وسى باع­دار­لاما باستالعان جىلدارى بولىپ ەدى. سونان كەيىن وتىرىستار جا­بىق جاعدايدا وتكىزىلىپ ءجۇردى. بۇ­عان نەگىزگى سەبەپ, ەلباسىنىڭ شەشىمىنە سايكەس جىلىنا كەمىندە 3 مىڭ جاستى «بولاشاق» باعدارلا­ماسى بويىنشا شەتەلدەرگە وقۋعا جىبەرگەن كەزىمىزدە ۇمىتكەرلەر سا­نىنىڭ كوپ ارتۋىنان تۋىنداعان ەدى. جىلىنا ءبىر كەزەڭنىڭ ىشىندە 4 مىڭ ۇمىتكەرگە دەيىن سىناقتان ءوتىپ ءجۇردى. سول تۇستا ىرىكتەۋ ۇدەرىسى اۋىرلاعاننان كەيىن اشىق جاعدايدا وتىرىستار وتكىزۋ بىرتە-بىرتە شەكتەلىپ قالدى. ەندى وسى ءداستۇردى قايتا جاڭعىرتقالى وتىر­مىز. مۇنان كەيىنگى ىرىكتەۋ ۇدە­رىستەرىنىڭ بارلىعى باق وكىل­دە­رىنىڭ قاتىسۋىمەن اشىق جاعدايدا جۇرگىزىلەدى. ارينە, باق وكىلدە­رىنىڭ قاتىسۋى سىناقتان وتكىزۋ ۇدەرىسىنە كەدەرگى كەلتىرمەۋى دە كەرەك. بۇل جاعىن دا ويلاستىراتىن بولامىز, – دەدى جۋرناليستەرگە بەر­گەن قىسقاشا سۇحباتىندا حا­لىقارالىق باعدارلامالار ورتا­لى­عىنىڭ باسشىسى ساياسات نۇربەك. ساياسات نۇربەكتىڭ ايتۋىنشا, بيىلعى جىلى ەلىمىزدە 2,5 مىڭ­نان استام ۇمىتكەر «بولاشاق» باع­دارلاماسى بويىنشا شەتەلدەردە وقۋعا ىنتا تانىتقان ەكەن. بى­لايشا ايتقاندا, ءبىر ورىنعا ءتورت ادام تالاسىپ وتىر. ۇمىتكەر سا­نىنىڭ ازايۋىنا «باكالاۆرياتقا» وقىتۋ ساتىسىنىڭ جابىلۋى اسەر ەتكەن. باعدارلاما بويىنشا ەندى تەك ماگيسترلىككە جانە دوكتو­ران­تۋراعا وقيتىندار مەن تاعى­لىم­داما بويىنشا ازىرلىكتەن وتەتىن­دەر جىبىرىلەتىن بولادى. بيىلعى جىلى ۇمىتكەرلەردى ىرىكتەۋ ۇدەرىسىنىڭ قالاي جۇرگى­زىلەتىندىگى جانە ونىڭ ءتارتىبى تۋرالى ءبىلىم جانە عىلىم مينيسترلىگى ستراتەگيالىق جوسپارلاۋ جانە اقپاراتتىق تەحنولوگيالار دەپارتامەنتى ديرەكتورىنىڭ ور­ىن­باسارى اقەركە ابىلايحان اي­تىپ بەردى. – تاۋەلسىز ساراپتاما كوميس­سياسىنىڭ قۇرامى مەملەكەتتىك ور­گانداردىڭ, ءىرى ۇلتتىق كومپا­نيا­لاردىڭ, جوعارى وقۋ ورىن­دا­رى­نىڭ, عىلىمي-زەرتتەۋ ينستي­تۋت­تا­رىنىڭ جانە «حالىقارالىق باع­دارلامالار ورتالىعى» اق-تىڭ وكىلدەرىنەن, ماماندان­دى­رىل­عان ساراپشىلاردان جانە ءۇمىت­كەردىڭ شەت ءتىلىن ءبىلۋ دەڭ­گەيىن ايقىن­داي­تىن شەتەلدىك ۇيىمدار وكىلدە­رى­نەن جاساقتالىپ وتىر. كوميسسيا جۇمىسىن جەتىلدىرۋ, بىلىكتىلىگىن ارتتىرۋ ماقساتىندا ونىڭ قۇرامى ايتالىقتاي ۇلعاي­تىلدى. وعان مينيسترلىكتەر مەن ۆەدومستۆولاردىڭ, حالىقارالىق ءبىلىم اگەنتتىك­تە­رى­نىڭ, قازاقستان­داعى شەتەلدىك ەلشى­لىكتەردىڭ وكىل­دەرى ەنگىزىلدى, – دەدى ول ءوز سوزىندە. مۇنان كەيىن باق وكىلدەرى ۇمىتكەرلەردى ىرىكتەۋ ءجۇرىپ جاتقان بولمەگە كىرىپ, سىناقتان وتكىزۋ ۇدەرىسىمەن كوزبە-كوز تانىستى. كوميسسيا الدىندا بولىپ شىققان ۇمىتكەرلەردى ءوز قالاۋلارى بوي­ىنشا اڭگىمەگە تارتىپ, ولاردىڭ پىكىرلەرىن ءبىلدى. سولاردىڭ ءبىرىن ءبىز دە سوزگە تارتقان ەدىك. – مەنىڭ اتى-ءجونىم – كەن­جە­عۇل سوتسيال ۇلى. مەن زاعيپ جان­مىن. بىراق سوعان قاراماستان ءومىر­دەن ءوز ورنىمدى الۋعا تالپى­نىپ, ساباقتى جاقسى وقىدىم. الماتى قالاسىنداعى زاعيپتار مەكتەبىن, سونان كەيىن ءال-فارابي اتىنداعى قازاق ۇلتتىق ۋني­ۆەر­سي­تەتىنىڭ تاريح فاكۋلتەتىن ءبىتىردىم. ەندى «بولاشاق» باعدارلا­ما­سىنىڭ نەگىزىندە اقش-تاعى ينديانا ۋنيۆەرسيتەتىندە ماگيستر­لىك ءبىلىم الماق ويىم بار. وسى­نىڭ الدىندا تىلدىك جانە پسيحو­لوگيالىق تەستتى جاقسى تاپسىرىپ, جاڭا عانا تاۋەلسىز ساراپتاما كو­ميسسياسىنىڭ الدىندا اڭگىمە­لە­سۋ­دەن ءوتتىم. كوپتەگەن سۇراقتارعا جاۋاپ بەرۋگە تۋرا كەلدى. ءسۇ­رىن­بەگەن سەكىلدىمىن. بىراق قورىتىن­دىسى ءازىر ماعان بەلگىسىز. ول 10 تامىزدان كەيىن بەلگىلى بولادى, – دەدى ول. كەنجەعۇل قازاق, ورىس, اعىل­شىن تىلدەرىندە سايراپ تۇر ەكەن. ءبىز ونىڭ تالابى مەن بىلىمىنە, ەڭ باستىسى, ەرلىگىنە ءسۇيسىنىپ, ىشتەي ساتتىلىك تىلەدىك. بىراق كوڭىلىمىزدە تۇرعان «شەت ەلگە جالعىز ءوزىڭ بارىپ وقىماقسىڭ با, سەنىڭ دەن­ساۋلىق جاعدايىڭا اۋىرلىق بول­ماي ما» دەگەن سۇراقتى دا امال­سىز بولسىن قويىپ قالدىق. – ءيا, جالعىز ءوزىم بارىپ وقي­مىن. بىراق مەن ول جاقتا جالعىز بولمايمىن. ول جاقتا دوستارىم بار. ەڭ باستىسى, ارقامنان سۇيەپ تۇرعان ەلىم بار عوي. جاڭا ءسىزدىڭ سۇراعىڭىزدى مەنەن كوميسسيا مۇشەلەرى دە سۇرادى. مەن سوندا اعايلار مەن اپايلارعا ينديانا ۋنيۆەرسيتەتىن نەگە تاڭداپ وتىر­عاندىعىمدى ايتىپ بەردىم. بۇل ۋنيۆەرسيتەتتە جانە دامىعان ەل­دەردىڭ باسقا دا بىرقاتار جوعارى وقۋ ورىندارىندا ءبىز سەكىلدى ءمۇ­گەدەك ادامداردىڭ وقۋىنا قولاي­لى جاعداي جاسالعان. ارناۋلى باع­دارلاما بويىنشا وقىتادى. ءبارىن ايتا بەرسە كوپ انگىمە. ەڭ باستىسى, بۇل جەردە ءبىزدىڭ ەلى­مىز­دىڭ زاڭدارى مەن سەكىلدى جاستارعا «بولاشاق» باعدارلاماسى ارقىلى وقۋعا مۇمكىندىك بەرەدى, – دەدى ول. سونىمەن «بولاشاق» باعدار­لا­ماسى بويىنشا ۇمىتكەرلەردى ىرىك­تەۋ ماسەلەسى ەندى باق وكىل­دەرىنىڭ قاتىسۋىمەن اشىق جاع­دايدا وتەتىن بولدى. ۋاقىت وتكەن سايىن العا باسىپ, ءار جۇرەكتە ءۇمىت وتىن لاۋلاتقان ەلىمىزدە بۇل جاڭالىقتىڭ دا وزىندىك ماڭىزى از ەمەس دەپ ەسەپتەيمىز. «بولاشاق» باعدارلاماسى شىنايى دا اشىق جۇرگىزىلگەن جاعدايدا عانا ناعىز بولاشاققا اينالاتىندىعىنا سەنىم زور. ىسكە ءسات, دەيمىز ەندەشە. سۇڭعات ءالىپباي.