سان ءتۇرلى مادەني شارالاردىڭ ۇيتقىسى بولىپ جۇرگەن پرەزيدەنتتىك مادەنيەت ورتالىعىندا مادەنيەت مينيسترلىگىنىڭ ۇيىمداستىرۋىمەن قاسىم امانجولوۆتىڭ 100 جىلدىق مەرەيتويىنا ارنالعان «دۇنيەگە كەلەر ءالى تالاي قاسىم » اتتى ادەبي-سازدى كەش بولىپ ءوتتى. ونى ورتالىق ديرەكتورى مىرزاتاي جولداسبەكوۆ جۇرگىزىپ وتىردى.
داۋىلپاز اقىن تويىنا ارنالعان كەشتى اشقان مادەنيەت ءمينيسترى مۇحتار قۇل-مۇحاممەد پرەزيدەنتتىك مادەنيەت ورتالىعى بۇگىندە شىن مانىندە قازاق رۋحانياتىنىڭ التىن ۇياسىنا اينالعانىن, ءدال وسى جەردە وتكەن شوقان ءۋاليحانوۆتىڭ, باۋىرجان مومىش ۇلىنىڭ, كەنەن اتامىزدىڭ مەرەيتويلارى, ەندى مىنە, حح عاسىردىڭ ۇلى اقىنى قاسىم اعامىزدىڭ 100 جىلدىق تورقالى تويىنا ۇلاسىپ وتىرعانىن ايتا كەلە, «حح عاسىردىڭ باسىندا ماعجان سالعان جاڭا ءداستۇردى عاسىر ورتاسىندا قايتا جاڭعىرتقان – قاسىم امانجولوۆ. ول كوزى تىرىسىندە دە, ودان كەيىن دە ومىردەن قاعاجۋ كورسە دە, ونەردەن قاعاجۋ كورمەي, قازاق ادەبيەتى تورىنەن ويىپ تۇرىپ ورىن العان ادام. قاسىم پوەزياسى وزىنەن كەيىنگى تۇتاس ءبىر اقىندار شوعىرىن دۇنيەگە اكەلدى. سول ۇلكەن اسەردىڭ ارقاسىندا مۇقاعالي باستاعان ۇلى اقىندار ءوسىپ شىقتى», – دەدى. سونداي-اق ول قاسىمنىڭ ۇلى وتان سوعىسىندا جازعان وتتى جىرلارى كەشەگى اقتامبەردى, قازتۋعان, ماحامبەتتەردەن بەرى تارتاتىن پاتريوتتىق پوەزيانى بۇرىن-سوڭدى بولماعان بيىككە كوتەرگەنىن, ءتىپتى ورىس پوەزياسىنىڭ وزىق ۇلگىلەرىنەن اسىپ ءتۇسكەنىن دە نازاردان تىس قالدىرمادى.
كەشتە اقىن ولەڭدەرىنە جازىلعان ايتۋلى اندەر مەن ول تۋرالى ەستەلىكتەردەن كورىنىستەر ورىندالدى. قاسىمنىڭ سۇيگەن جارى ساپەن (ساقىپجامال) اپايدىڭ ەستەلىگىن قازاقستاننىڭ حالىق ءارتىسى گۇلجان اسپەتوۆا ناقىشىنا كەلتىرە ورىنداپ, جيىلعان جۇرت جۇرەگىن ءبىر تەربەتسە, قازاقستاننىڭ ەڭبەك سىڭىرگەن ءارتىسى مەيىرحان ادامبەكوۆ «اق ساۋلە» ءانىن دومبىراعا قوسىلىپ تەبىرەنە شىرقادى. سونداي-اق بەلگىلى كۇيشى-سازگەر سەكەن تۇرىسبەكوۆ سۇگىردىڭ «قوسباسار» كۇيىن قوس ىشەكتە كۇمبىرلەتتى.
ادەمى اۋەن مەن سۇلۋ سازدى اڭساپ كەلگەن ەلوردا جۇرتى مەن قوناقتارىن وزىندىك داۋىسىمەن ءتانتى ەتكەن ايگىلى ءانشى سارا تىنىشتىعۇلوۆانىڭ ورىنداۋىنداعى اقىننىڭ «جىر جازامىن جۇرەگىممەن» شىعارماسى ەرەكشە كوڭىل-كۇيگە بولەدى. بولاشاعىنان مول ءۇمىت كۇتتىرەتىن بالعىن اقىن جامبىل دۇيسەنوۆتىڭ «قاسىمعا ارناۋ» ولەڭى ەشكىمدى دە بەيجاي قالدىرمادى.
ەي, تاكاپپار دۇنيە,
ماعان دا ءبىر قاراشى.
تانيسىڭ با سەن مەنى,
مەن قازاقتىڭ بالاسى! – دەپ دۇنيەگە سىيماي كەتكەن تۋما دارىننىڭ تويى الداعى ۋاقىتتا ءوز جالعاسىن ەلىمىزدىڭ وزگە وڭىرلەرىندە دە تابا بەرمەك.
ءابدىراحمان قىدىربەك.
سۋرەتتەردى تۇسىرگەن ورىنباي بالمۇرات.
