اقش ارنايى قىزمەتى ولتىرگەن «ءال-كايدا» لانكەستىك ۇيىمىنىڭ بۇرىنعى باسشىسى بەن لادەننىڭ ورنىنا جاڭا باسشى – ءتۇبى مىسىرلىق ايمان ءال-زاۆاحيري كەلگەنى تۋرالى اقپارات جاريالانعان بولاتىن. قۇراما شتاتتار ەندى ءال-ءزاۆاحيريدىڭ دە كوزىن جويۋعا دايىن ەكەنىن مالىمدەپ ۇلگەردى.
بىرلەسكەن شتابتار كوميتەتىنىڭ باستىعى ادميرال مايك ماللەننىڭ ايتۋىنشا, اقش ءال-زاۆاحيريگە دە بەن لادەننىڭ تاعدىرىن قايتالاتادى. ال پەنتاگون باسشىسى روبەرت گەيتستىڭ پىكىرىنە قاراعاندا, ءال-زاۆاحيريدە وپەراتسيالار وتكىزۋ بويىنشا بەن لادەندەگى سەكىلدى شامشىلدىق پەن تاجىريبە جوق. اقش تاراپى لاڭكەستىك ۇيىم جاڭا باسشىسىنىڭ قايدا ەكەنىن كورسەتەتىن اقپارات ءۇشىن 25 ميلليون دوللار سىياقى تىگىلگەنىن دە جاريا ەتتى.
گاز باعاسى تاعى دا تۇيىققا تىرەدى
رەسەي مەن قىتاي باسشىلارى دميتري مەدۆەدەۆ پەن حۋ تسزينتاونىڭ كرەملدەگى كەلىسسوزى بارىسىندا باعاداعى پىكىر قايشىلىعىنا بايلانىستى گاز كەلىسىم-شارتى بويىنشا ۋاعدالاستىققا تاعى دا قول جەتكىزىلمەي قالدى.
«گازپروم» قىتايمەن گاز ساتۋ جونىندەگى شارت تۋرالى 2000-جىلداردىڭ ورتاسىندا-اق ۋاعدا بايلاسقان ەدى. الايدا تاراپتار سودان بەرى «كوگىلدىر وتىننىڭ» باعاسىنا كەلىسە الماي كەلەدى. رەسەي جاعى قىتايعا «كوگىلدىر وتىندى» ەۋروپاعا جىبەرىلەتىن باعامەن (تەكشە مەترى 352 دوللار) ساتپاقشى بولسا, قىتاي ونى ورتالىق ازيادان كەلەتىن باعامەن (تەكشە مەترى 250 دوللار) العاندى قالايدى.
ليۆيا بويىنشا ەسەبى جولداندى
باراك وبامانىڭ اكىمشىلىگى ەل كونگرەسىنە ليۆياداعى اسكەري وپەراتسيالار تۋرالى بايانداما جولدادى. 30 بەتتەن تۇراتىن قۇجاتتا پرەزيدەنتتىڭ وپەراتسيالاردى زاڭدى نەگىزدە جۇرگىزىپ جاتقانى جانە ونى كونگرەستىڭ كەلىسىمىنسىز-اق جالعاستىرا الاتىنى اتاپ كورسەتىلەدى.
ءوز ۇستانىمىن دالەلدەي كەلە, بايانداما اۆتورلارى اقش-تىڭ ناتو وپەراتسيالارىندا شەكتەۋلى, كومەكشى ءرول عانا اتقارىپ وتىرعانىن, ليۆيا اۋماعىندا بىردە-ءبىر اقش اسكەريى جوق ەكەنىن كولدەنەڭ تارتادى. دەرەكتەرگە سايكەس, قۇراما شتاتتار كۇنى بۇگىنگە دەيىن ليۆيادا ءتۇرلى ماقساتتارعا 715,9 ميلليون دوللار شىعىنداپتى.
شەكارا بويىنا زىمىران ورنالاستىردى
وڭتۇستىك كورەيا باسشىلىعى كحدر شەكاراسى بويىنا زىمىران كەشەندەرىن ورنالاستىرعان. بۇل جەردە اڭگىمە پحەنياندى جەرمەن-جەكسەن ەتۋگە جەتەتىن امەريكانىڭ شاعىن قاشىقتىقتاعى بالليستيكالىق زىمىراندارى تۋرالى بولىپ وتىر.
ساراپشىلاردىڭ پىكىرىنشە, زىمىراندار پحەنياننىڭ ىقتيمال شابۋىلى جاۋاپسىز قالمايتىنىن كورسەتۋ ماقساتىندا ورنالاستىرىلعان. سولتۇستىكتىڭ وڭتۇستىكتەگى قانداستارىنا كحدر تۇرعىندارى اراسىندا ناسيحات پاراقشالارىن تاراتقانى جانە پوليگوندارداعى جاتتىعۋلاردا نىسانا رەتىندە سولتۇستىك كورەيانىڭ ىقتيمال مۇراگەرى كيم چون ىن بەينەسى پايدالانىلاتىنى ءۇشىن كەك قايتارامىز دەگەن قوقان-لوققىلارى دا سەبەپ بولعانعا ۇقسايدى.
جيرينوۆسكيدى قىزىل ءتۇس جالىقتىردى
رەسەي ليبەرال-دەموكراتيالىق پارتياسىنىڭ سەركەسى ۆلاديمير جيرينوۆسكي الداعى شاقىرىلىمنان باستاپ مەملەكەتتىك دۋما دەپۋتاتتارىنىڭ كۋالىكتەرىن قارا كوك نەمەسە قارا قوڭىر ءتۇستى ەتىپ جاساۋدى ۇسىندى.
قىزىل ءتۇس ابدەن جالىقتىردى. ءتىپتى اشۋ-ىزاڭدى كەلتىرەدى. مۇنى مەن ەمەس, دارىگەرلەر دالەلدەگەن. قىزىل ءتۇس – بۇل باعدارشام, تاپجىلماي تۇرۋعا ءماجبۇر ەتەدى, قىزىل ءتۇس سونداي-اق اپات, ءورت, تاعى باسقالار, دەپ نەگىزدەدى ءوزىنىڭ ۇستانىمىن ۆ.جيرينوۆسكي. ەسەسىنە, دەيدى ول, كوك ءتۇس شىعارماشىلىق ويلاۋ قابىلەتىڭدى جاقسارتادى.
جاپپاي توبەلەس ورىن الدى
رەسەيدىڭ ءنوۆوسىبىر قالاسىندا ونداعان ەڭبەك ميگرانتتارىنىڭ قاتىسۋىمەن جاپپاي توبەلەس ورىن الدى. جەرگىلىكتى قۇقىق قورعاۋ ورگاندارىنىڭ سوزدەرىنە قاراعاندا, جانجال تۇرعىن ءۇي قۇرىلىسىنداعى جۇمىس ورنى ءۇشىن تۋىنداعان.
قۇرىلىسقا العاش بولىپ قىرعىزستاندىق جۇمىسشىلار جەتكەن. بىراق, وزبەكستاندىقتارعا كىمنىڭ ءبىرىنشى ەكەنى جاي جاناما باسىمدىق سياقتى عانا كورىنگەن. توبەلەسكە ءبىر جاعىنان – 15, ەكىنشى جاعىنان شامامەن 30 ادام قاتىسقان. توبەلەستەن ءۇش قىرعىزستاندىق پىشاق جاراقاتىن الىپ اۋرۋحاناعا جاتقىزىلسا, باسقا زارداپ شەككەندەر تۋرالى مالىمەت جوق. وقيعا بويىنشا قىلمىستىق ءىس قوزعالعان.
قىسقا قايىرىپ ايتقاندا:
* گرەكيانىڭ جاڭا قارجى ءمينيسترى بولىپ بۇعان دەيىن قورعانىس ءمينيسترى قىزمەتىن اتقارعان ەۆانگەلوس ۆەنيزەلوس تاعايىندالدى. العاشقىسىنا ءۇش قايناسا سورپاسى قوسىلمايتىن ۆەدومستۆونى ونىڭ قالاي باسقاراتىنى بەلگىسىز. * وش قالاسىنداعى جەكە مەنشىك بازارىنىڭ ساۋداسىن ويلاپ, سول توڭىرەكتە ونى-مۇنى ساتىپ تۇرعاندارمەن توبەلەسكەن قىرعىزستان پارلامەنتىنىڭ بۇرىنعى دەپۋتاتى كامچىبەك جولدوشباەۆتىڭ ۇستىنەن قىلمىستىق ءىس قوزعالدى. * مەكسيكانىڭ مونتەررەي قالاسىندا ءبىر كۇن ىشىندە 33 ادام قازا تاپتى. رەسمي تۇلعالاردىڭ سوزدەرىنە قاراعاندا, ولاردىڭ بارلىعى قىلمىستىق توپتارعا تىكەلەي قاتىسى بار ادامدار بولىپ تابىلادى. * ستەنلي كۋبوگىنىڭ فينالىندا كانادانىڭ ۆانكۋۆەر قالاسىنىڭ «ۆانكۋۆەر كەناكس» كومانداسى اقش-تىڭ بوستون قالاسىنىڭ «بوستون بريۋينز» كومانداسىنان جەڭىلىپ قالعان ەدى. وسىعان وراي ۆانكۋۆەردەگى جاپپاي تارتىپسىزدىكتەر سالدارىنان جارالانعان 150 ادام دارىگەرلىك كومەككە جۇگىنگەن.ينتەرنەت ماتەريالدارى نەگىزىندە ازىرلەندى.
