تۇركيادا پارلامەنت سايلاۋى بولىپ ءوتتى. وندا الدىن الا دەرەك بويىنشا, ادىلەتتىلىك جانە دامۋ پارتياسى جەڭىسكە جەتكەن. بيۋللەتەندەردىڭ 40 پايىزى ەسەپتەلگەننەن كەيىن ءادپ سايلاۋشىلاردىڭ 53 پايىز داۋىسىن العان.
بيۋللەتەندەردىڭ بارلىعى ەسەپتەلىپ بولعاننان كەيىن, جوعارىداعى مالىمەتكە ۇلكەن وزگەرىس ەنبەيدى دەپ كۇتىلۋدە. ءسويتىپ, كوسەمى قازىرگى ۇكىمەت باسشىسى تايىپ ەردوعان بولىپ تابىلاتىن ءادپ جاڭا ۇكىمەت جاساقتاۋ مۇمكىندىگىن يەلەنىپ وتىر. ودان كەيىنگى ورىنداردا وپپوزيتسيالىق رەسپۋبليكالىق حالىقتىق پارتيا تۇر – 23 پايىز. قالعان پارتيالاردىڭ كورسەتكىشتەرى 10 پايىزدان اسپايدى. جالپى ەلدەگى پارلامەنتتىك سايلاۋعا 15 پارتيا قاتىستى.
اقش كەمەسى الاڭداۋشىلىق تۋعىزدى
رەسەي سىرتقى ىستەر مينيسترلىگى قارا تەڭىزدە اقش-تىڭ «مونتەرەي» كرەيسەرىنىڭ پايدا بولۋىنا بايلانىستى الاڭداۋشىلىق ءبىلدىردى. كەمە ۋكراينا سۋلارىنا اقش-پەن بىرلەسىپ وتكىزىلەتىن «سي بريز-2011» وقۋ-جاتتىعۋلارىنا بايلانىستى ەنگەن بولاتىن.
«مونتەرەي» جەرورتا تەڭىزىنە ءۇستىمىزدەگى جىلدىڭ 11 ناۋرىزىندا باعىتتالعان ەدى. ول اقش ەۋروپادا ورنالاستىرىپ وتىرعان زىمىرانعا قارسى قورعانىس جۇيەسىنىڭ ءبىر بولىگى بولماق. كەمە ءبىر مەزگىلدە 190 شاقىرىم راديۋستاعى 100-دەن استام نىساندى باقىلاي الادى. «ءبىز شەكارامىزعا تىم جاقىن جەردە اقش-تىڭ ستراتەگيالىق ينفرقۇرىلىمى ەلەمەنتىنىڭ پايدا بولۋىن نازاردان تىس قالدىرمايمىز», دەپ مالىمدەدى رەسەي سىرتقى ىستەر مينيسترلىگى.
ناتو-نىڭ بولاشاعى ب ۇلىڭعىر ما؟
اقش قورعانىس ءمينيسترى روبەرت گەيتس الداعى 30 ماۋسىمعا بەلگىلەنگەن ءوزىنىڭ وتستاۆكاسى الدىندا قازىرگى ءۇردىس ساقتالعان جاعدايدا ناتو ءومىر سۇرۋگە قابىلەتسىز ۇيىمعا اينالۋى ىقتيمال دەپ مالىمدەدى.
پەنتاگون باسشىسىنىڭ سوزىنە قاراعاندا, اليانس ەسەبىنىڭ 75 پايىزىن تولەيتىن ۆاشينگتونعا بۇل جۇكتى الىپ ءجۇرۋ بارعان سايىن اۋىرلاي تۇسۋدە. ونىڭ ايتۋىنشا, اليانس قىزمەتىن جالعاستىرۋى ءۇشىن ناتو-نىڭ باسقا ءمۇشەلەرى قورعانىسقا قارجىنى كوبىرەك سالۋى ءتيىس. ايتپەسە, دەيدى ول, اليانستىڭ بولاشاعى ب ۇلىڭعىر. گەيتس سونداي-اق «قىرعي-قاباق سوعىس» ۋاقىتى اياقتالعاننان كەيىن اقش-تىڭ ناتو-عا سالعان قارجىسى ءوزىن مۇلدەم اقتاماۋدا.
بسۇ-عا كىرۋگە ءبىر عانا ەل كەدەرگى
گرۋزيا رەسەيگە قاتىستى ءوز تالاپتارىنان باس تارتقان جوق. ءبىز ءماسكەۋگە بۇكىلالەمدىك ساۋدا ۇيىمىنا كىرۋگە كەلىسىمىمىزدى بەرۋگە دايىنبىز. بىراق رەسەي ءبىزدىڭ تالاپتارىمىزدى ورىنداۋى ءتيىس, دەپ مالىمدەدى گرۋزيا سىرتقى ىستەر مينيسترىنىڭ ورىنباسارى نينو كالاندادزە.
ونىڭ ايتۋىنشا, رەسەيگە گرۋزين تارابىنىڭ قويعان مىناداي تالاپتارى بار: ءبىرىنشى كەزەكتە گرۋزيا ءوز اۋماعى سانايتىن گرۋزين-رەسەي شەكاراسىنىڭ ابحاز جانە وڭتۇستىك وسەتين بولىكتەرىندە مولدىرلىك بولۋى شارت. بۇل ماسەلە قايتا قارالمايدى. كالاندادزەنىڭ سوزىنە قاراعاندا, گرۋزيا پرەزيدەنتى ميحايل سااكاشۆيلي رەسەيدىڭ ەشقانداي شارتسىز بسۇ-عا كىرۋىنە كەلىسىمىن بەردى دەگەن اقپارات شىندىققا سايكەس كەلمەيدى. وسى ارادا ايتا كەتەتىن ءبىر ءجايت – بسۇ-عا مۇشە 153 ەلدىڭ ءبىرى كەلىسىمىن بەرمەسە, ەش مەملەكەت ۇيىمعا مۇشەلىككە وتە المايدى.
جاساندى تۇربا قۇبىرى تابىلدى
بەلورۋسسيادا مەملەكەتتىك شەكارا ارقىلى تارتىلعان جاساندى مۇناي قۇبىرى تابىلعان. ءمالىمەتتى رەسپۋبليكا مەملەكەتتىك قاۋىپسىزدىك كوميتەتى تاراتتى. مۇناي قۇبىرى مۇقيات جاسىرىلعان ەكەن. وتىن سورعى ارقىلى بالتيا ەلدەرىنىڭ بىرىنە باعىتتالىپ كەلىپتى. قۇبىردى كىم توسەگەنى ازىرشە بەلگىسىز.
مقك قىزمەتكەرلەرى شەتەلگە زاڭسىز وتىن شىعارۋدىڭ تاعى ءبىر ارناسىن جاپقان. ۆيتەبسك وبلىسىنداعى لوكوموتيۆ دەپولارى ءبىرىنىڭ ەكى ءماشينيسى جانار ماي شىعىنىن اسىرا كورسەتىپ, كەيىن ونىڭ قالدىعىن شەتەلدە ساتىپ كەلگەن. جالپى, بەلورۋسسيادا وتىن ەۋرووداققا كىرەتىن كورشى مەملەكەتتەرگە قاراعاندا ەكى ەسەگە جۋىق ارزان.
ەڭ كوپ شاراپ وندىرەتىن قاي ەل؟
يتاليا 2007 جىلى فرانتسياعا جول بەرگەن الەمدەگى ەڭ كوپ شاراپ وندىرەتىن ەل اتاعىن وزىنە قايتارىپ الدى. 2010 جىلى يتاليا 9,96 ميلليارد ليتر شاراپ وندىرسە, فرانتسيا كورسەتكىشى 4,62 ميلليارد ليتر بولعان ەكەن.
فرانتسيادا شاراپ ءوندىرىسى قىسقارىپ كەتسە, يتاليا بۇرىنعى دەڭگەيدى ۇستاپ قالۋعا قول جەتكىزگەن. سونىمەن قاتار, يتاليانىڭ شامپان وندىرىسىندە دە جۇلدىزى جوعارىلاپتى. ياعني, بىلتىر 420 ميلليون ليتر وسى ىشىمدىك ءتۇرىن شىعارعان. فرانتسيانىكى بولسا, 400 ميلليون ليتر شاماسىندا. ەۋروپاداعى ءۇش كوشباسشى ەل قاتارىندا اتالعان ەكى مەملەكەتپەن قاتار يسپانيا بار.
قىسقا قايىرىپ ايتقاندا:
* تاجىكستان وزبەك شەكاراشىلارىن ءوزىنىڭ اسكەري قىزمەتشىسىن ۇرلاپ كەتتى دەپ ايىپتادى. وقيعا 7 ماۋسىم كۇنى ورىن الىپتى. وزبەك جاعىنىڭ ايتۋىنشا, تاجىك شەكاراشىسى شەكارا بۇزىپ قانا قويماي, وق اتقان. ال تاجىك جاعىنىڭ مالىمدەۋىنشە, وزبەك شەكاراشىلارى تاجىك جاعىنا ءوتىپ بارىپ, «ۇرلىق جاساعان». اسكەري قىزمەتشى ەكى ەل شەكارا قىزمەتى وكىلدەرىنىڭ كەلىسسوزى ناتيجەسىندە بوساتىلسا كەرەك.
* رەسەي ۇلتشىلدارى ءار ايدىڭ 11-ءى كۇنى ماسكەۋدەگى مانەج الاڭىندا وزدەرىنىڭ شەرۋلەرىن وتكىزىپ تۇرادى. ماۋسىمنىڭ 11-ىندە دە سولاي بولدى. جەرگىلىكتى ۇلتشىلدار رۇقسات بەرىلمەگەن ميتينگكە شىقتى. ارتىنشا ءبارى تۇتقىندالدى. قاماۋعا الىنعان 12 ادامنىڭ اراسىندا «ورىستار» قوزعالىسىنىڭ كوسەمى ۆلاديمير ەرمولاەۆ پەن الەكساندر بەلوۆ جانە «ورىستىڭ قوعامدىق قوزعالىسىنىڭ» وكىلى ۆلاديمير تور بار.
ينتەرنەت ماتەريالدارى نەگىزىندە ازىرلەندى.
