ءبىزدىڭ ەلىمىزدىڭ اۋماعىندا قىزمەت ەتىپ جۇرگەن باسقا ەلدىڭ اسكەري ازاماتتارى دا كوپ ەدى, ولاردىڭ كەيبىرەۋلەرى ءوزىنىڭ قول استىنداعى ماتەريالدىق-تەحنيكالىق قۇندىلىقتاردى ۇرلاپ نەمەسە ساتىپ كەتۋ سياقتى ىستەرمەن اينالىسقانى دا جاسىرىن ەمەس. ءتىپتى, ءبۇلدىرىپ, قيراتىپ كەتۋگە تىرىسقان قاسكۇنەمدەر دە بولدى. ءبىر جاعىنان اسكەر قۇرىلىپ, بارلىق كۇشتەر سوعان شوعىرلاندىرىلىپ جاتقاندا, وسىندايلاردىڭ قىلمىستى ىستەرىن اشۋعا دا تۋرا كەلدى.
سونىڭ بارىنە توتەپ بەرىپ, پرەزيدەنت – قارۋلى كۇشتەردىڭ جوعارعى باس قولباسشىسى نۇرسۇلتان نازارباەۆ پەن ارميا گەنەرالى, العاشقى قورعانىس ءمينيسترى ساعادات نۇرماعامبەتوۆتىڭ باسقارۋىمەن بارلىق ماسەلەلەر ۇلكەن قيىنشىلىقپەن ەپتەپ شەشىلىپ جاتتى. ءوزىمنىڭ سول كەزدە قازاقستان ارمياسىنىڭ قۇرىلۋ تاريحىنىڭ ورتاسىندا جۇرگەنىمدى وسى كۇنى ماقتان ەتەمىن.
الدىمەن قازاقستان وفيتسەرلەرىن دايىندايتىن اسكەري جۇيەنىڭ ءتۇرلى سالاسىنا باعىتتالعان اسكەري وقۋ ورىندارى قۇرىلدى. وسىعان دەيىن قازاقستاندا وفيتسەرلەر دايىندايتىن ەكى عانا جوعارى وقۋ ورنى بار ەدى. ولار الماتىنىڭ جالپى جوعارى كوماندالىق جانە الماتى شەكارا ۋچيليششەلەرى بولاتىن.
ارميا گەنەرالى ساعادات نۇرماعامبەتوۆ جوعارعى كەڭەستىڭ كەلىسىمىمەن مەنى كادر دايىنداۋ ءىسىن دۇرىس جولعا قويۋ ءۇشىن الماتىنىڭ جوعارى جالپى اسكەري كوماندالىق ۋچيليششەسىنە باسشى ەتىپ تاعايىندادى. بۇل قازاقستان قارۋلى كۇشتەرىن قۇرۋ ءۇشىن جاريالانعان 1992 جىلعى جارلىقتان كەيىن بولعان وقيعا ەدى. مەن وسى قىزمەتتە 10 جىل بويى ىستەپ, قولىمنان كەلگەن بارلىق مۇمكىندىگىمدى قازاقستان اسكەرىنىڭ وفيتسەرلەرىن دايىنداۋعا ارنادىم. بۇرىن ءبىر-اق سالانىڭ وفيتسەرلەرىن دايىندايتىن وقۋ ورنىن ەندى تانكيستەر, ارتيللەريستەر, اسكەري تەحنيكا ينجەنەر-وفيتسەرلەرىن, بايلانىسشىلار دايىندايتىن كوپسالالى وقۋ ورنىنا اينالدىردىق.
وقۋ ورنىنىڭ ماتەريالدىق-تەحنيكالىق بازاسىن نىعايتۋعا بارلىق كۇش-جىگەرىمدى سالدىم. مەملەكەت باسشىسى ءبىزدىڭ تالاپتارىمىزدىڭ وڭ شەشىلۋىنە نازار اۋدارىپ, ۇنەمى قولداپ وتىردى. سوڭىنان اسكەري اكادەمياعا اينالعان وقۋ ورنىندا ديسسەرتاتسيالىق كەڭەس اشىلىپ, بىلىكتى مامانداردىڭ عىلىمي اتاق الۋىنا جول اشىلدى. مەن تاريح عىلىمدارىنىڭ الدىمەن كانديداتى, ءبىراز جىلدان كەيىن دوكتورى عىلىمي اتاعىن قورعادىم. بۇگىنگى تاڭدا ءبىزدىڭ وقۋ ورنىمىزدى بىتىرگەن تالاي تۇلەك اسكەرىمىزدىڭ باسشىلىق قىزمەتتەرىندە ءجۇر. ءبارى دە بىلىكتى ماماندار, جوعارى شەندى وفيتسەرلەر بولعان. ولارمەن كەزدەسكەندە كەۋدەمدى ماقتانىش سەزىمى كەرنەيدى.
جوعارى ءبىلىمدى وفيتسەرلەر دايىنداۋداعى ەڭبەگىمىز جوعارى باعالانىپ, گەنەرال-لەيتەنانت اتاعىن العان مەنى 2002 جىلى پرەزيدەنت ءوزىنىڭ جارلىعىمەن قورعانىس ءمينيسترىنىڭ ورىنباسارى قىزمەتىنە اۋىستىردى. بۇل قىزمەتتە دە باسقا مىندەتتەرىممەن قاتار, كادرلار دايىنداۋ سالاسىن باقىلادىم. اكادەميادان اسكەري ۋچيليششەنى ءبولىپ, قازىرگى اقمولا وبلىسىنىڭ ششۋچينسك قالاسىنا اۋىستىردىق. ال اكادەميانىڭ ورنىندا قۇرلىق اسكەرلەرى وفيتسەرلەرىن دايىندايتىن وقۋ ورنى قۇرىلدى. اقتوبە قالاسىنداعى بۇرىنعى ازاماتتىق اۋە اۆياتسياسى ماماندارىن دايىندايتىن وقۋ ورنى اسكەري-اۋە كۇشتەرىنىڭ وفيتسەرلەرىن دايىنداۋعا اۋىستىرىلعان. وسى جانە الماتىداعى راديوەلەكترونيكا بايلانىسى اسكەري ينستيتۋتتارىنىڭ ماتەريالدىق-تەحنيكالىق بازالارى جەتىلدىرىلدى. ولارعا وسى زامانعى ۇزدىك تەحنيكالار الىنىپ, ازاماتتىق بىلىكتى ماماندار قىزمەتكە شاقىرىلدى. كۋرسانتتاردىڭ جاتىن ورنى مەن قامتاماسىز ەتىلۋى بارىنشا ارتتىرىلدى.
پەتروپاۆل قالاسىندا 2000 جىلى ىشكى اسكەرلەر وفيتسەرلەرىن دايىندايتىن جوعارى وقۋ ورنى اشىلعان. بۇل وقۋ ورنى دا ءوزىنىڭ مىندەتىن ابىرويمەن اتقارىپ كەلەدى. ال ششۋچينسك قالاسىندا زامانا تالابىمەن سەرجانتتار دايىندايتىن كادەت كورپۋسى جۇمىس ىستەيدى. بۇلاردان باسقا, الماتى, شىمكەنت, قاراعاندى قالالارىنداعى سالالىق مەكتەپتەرىمىز, استانا قالاسىنداعى «جاس ۇلان» مەكتەبى جوعارى اسكەري ورىندارىنا تۇسۋگە جاستاردى دايىندايدى. وسى وقۋ ورىندارىنىڭ قۇرىلۋ, جاراقتالۋ جانە جەتىلدىرىلۋ جۇمىستارىنا كەزىندە بەلسەنە اتسالىسىپ, ءوزىمنىڭ ءبىلىمىم مەن تاجىريبەمدى اياماي جۇمسادىم دەپ ايتا الامىن.
بۇگىنگى تاڭدا استانا قالاسىنداعى تۇڭعىش پرەزيدەنت – ەلباسى ن.نازارباەۆ اتىنداعى ۇلتتىق قورعانىس ۋنيۆەرسيتەتى اسكەري عىلىمنىڭ دامۋىنا شەكسىز ۇلەس قوسىپ وتىرعانىن ايتا كەتۋىم كەرەك. وقۋ ورنىنىڭ قابىرعاسىندا سالانىڭ جوعارى بىلىكتى ماماندارى ءتۇرلى تاقىرىپتارعا زەرتتەۋ جۇمىستارىن جۇرگىزەدى.
2006 جىلدىڭ قاڭتار ايىندا ەلباسى ءوزىنىڭ جارلىعىمەن مەنى قازاقستان رەسپۋبليكاسى ۇلتتىق ۇلانىنىڭ قولباسشىسى لاۋازىمىنا تاعايىندادى. بۇل – وزىندىك ەرەكشەلىگى بار ايرىقشا اسكەري ءبولىم. ونىڭ مىندەتتەرىنىڭ قاتارىنا پرەزيدەنت پەن مەملەكەتتىك بيلىك جانە باسقارمالاردىڭ جوعارعى ورگاندارىن جانە ت.ب. كۇزەتۋ; مەملەكەتتىك تۋ مەن ەلتاڭبانىڭ ەتالوندارىنىڭ ساقتالۋىن قامتاماسىز ەتۋ; شەتەل مەملەكەت باسشىلارىن كۇتىپ الۋ, شىعارىپ سالۋ كەزىندە, قازاقستان مەملەكەتتىك مەيرامدارى مەن سالتاناتتارىندا جورالعىلىق راسىمدەردى ورىنداۋ جانە ت.ب. ەنەدى.
پرەزيدەنت 1995 جىلدىڭ 5 جەلتوقسانداعى زاڭ كۇشى بار جارلىعىمەن رەسپۋبليكالىق ۇلاننىڭ تىكەلەي قازاقستان رەسپۋبليكاسى پرەزيدەنتىنە باعىناتىنىن جانە قازاقستان رەسپۋبليكاسىنىڭ قارۋلى كۇشتەرى قۇرامىنا كىرمەيتىنىن ايقىندادى. وسى قىزمەتتى مەن التى جىلداي اتقاردىم. ال 2012 جىلدان باستاپ پارلامەنت ماجىلىسىنە دەپۋتات بولىپ سايلاندىم. سوڭعى بەس جىلدا پارلامەنتتىڭ حالىقارالىق ىستەر, قورعانىس جانە قاۋىپسىزدىك كوميتەتىندە قىزمەت جاساپ كەلەمىن. قورعانىس سالاسىنا قاتىستى بارلىق زاڭنامالىق اكتىلەرگە ارالاسىپ, قولدان كەلگەنىنشە ءوزىمنىڭ كومەگىمدى كورسەتۋدەمىن. سونداي-اق, اسكەري قىزمەتكەرلەردىڭ الەۋمەتتىك تۇرعىدان قامتاماسىز ەتىلۋىنە بايلانىستى زاڭ جوبالارىن جەتىلدىرۋگە بەلسەندى تۇردە قاتىسىپ, ءوزىمنىڭ ۇسىنىستارىم مەن پىكىرلەرىمدى قوسىپ وتىرامىن. سوندىقتان بۇل جەردە دە مەن اسكەري سالادان اۋلاق كەتكەن جوقپىن دەپ ايتا الامىن.
قازىر قارۋلى كۇشتەردىڭ الدىندا وتە ۇلكەن جاۋاپتى مىندەتتەر تۇر.
جىل سايىن اسكەري پاركىمىزدى تەحنيكانىڭ سوڭعى ۇلگىلەرىمەن بەلگىلى ءبىر دەڭگەيدە جاڭارتىپ كەلەمىز. بۇل ۇدەرىس الداعى 8-9 جىلدا قارۋلى كۇشتەرىمىزدى الەمدىك وزىق, اسكەري كۇشتەر تالاپتارىنا ساي جاراقتاندىرۋعا مۇمكىندىك بەرەدى. بۇل جەردە مىنا ءبىر جايعا نازار اۋدارۋ كەرەك. الەمنىڭ بىردە-ءبىر ەلىنىڭ ارمياسى قازىرگى زامانعى اسكەري تەحنيكا 100 پايىز قامتاماسىز ەتىلمەگەن. ويتكەنى, ءاربىر تەحنيكانىڭ بەلگىلى ۋاقىتتا اۋىستىرىلۋى ءتيىس. مەرزىمى كەلگەندە كونسترۋكتورلار ولاردى ودان ءارى جەتىلدىرىپ, قۋاتىن ارتتىرىپ وتىرادى. سول تۇرعىدان كەلگەندە, ءبىزدىڭ قارۋلى كۇشتەرىمىزدە دە ستراتەگيالىق ماڭىزدى كورسەتكىشتەر ۇنەمى انىقتالىپ وتىرادى. ال بۇل – اسكەرلەرىمىز ەڭ وزىق تەحنيكامەن جاراقتاندىرىلا بەرەدى دەگەن ءسوز.
قازىر مەملەكەت تاراپىنان اسكەريلەر ءۇشىن بارلىق جاعداي جاسالعان. قارۋلى كۇشتەردىڭ بولىمدەرى ۇنەمى ءتۇرلى دەڭگەيدە وقۋ-جاتتىعۋلار وتكىزىپ, اسكەري شەبەرلىگىن, كاسىبي بىلىكتىلىگىن كوتەرىپ وتىرادى. ءبىز – ۇجىمدىق قاۋىپسىزدىك شارتى ۇيىمىنا مۇشەمىز. جىل سايىن وسى ۇيىمعا مۇشە مەملەكەتتەر اسكەرلەرىمەن بىرگە اسكەري جاتتىعۋلارعا قاتىسامىز. جىلدام ءارى شالت
قيمىلدايتىن ۇتقىر اسكەرىمىزدىڭ شەبەرلىكتەرى سول جاتتىعۋلاردا انىق بايقالادى. زاماناۋي تەحنيكا مەن قارۋ, بىلىكتى اسكەري مامان كەز كەلگەن جاعدايدا العا قويعان ماقساتىنا جەتە الادى.
اباي تاسبولاتوۆ,
پارلامەنت ءماجىلىسىنىڭ دەپۋتاتى, گەنەرال-لەيتەنانت
