سالتاناتتى شاراعا باتىس قازاقستان وبلىسىنىڭ اكىمى التاي كولگىنوۆ, قازاقستان رەسپۋبليكاسى قورعانىس جانە اەروعارىش ءمينيسترى بەيبىت اتامقۇلوۆ, قازاقستان رەسپۋبليكاسى قورعانىس ءمينيسترىنىڭ ورىنباسارى, گەنەرال-مايور تالعات جانجۇمەنوۆ, قازاقستان رەسپۋبليكاسى قارۋلى كۇشتەرى اسكەري-تەڭىز قىزمەتىنىڭ باس قولباسشىسى جانداربەك جانۇزاقوۆ, «قازاقستان ينجينيرينگ» ۇلتتىق كومپانياسى» اق-تىڭ باسقارما ءتوراعاسى ەرلان ىدىرىسوۆ, قازاقستان قارۋلى كۇشتەرىنىڭ ارداگەرلەرى, «زەنيت» زاۋىتىنىڭ ۇجىمى, «ماڭعىستاۋ» كەمەسى ەكيپاجىنىڭ جەكە قۇرامى قاتىستى.
«ماڭعىستاۋ» – «زەنيت» زاۋىتىنىڭ كونۆەيەرىنەن شىققان 26 كەمە. ول قازاقستان رەسپۋبليكاسى قارۋلى كۇشتەرىنىڭ اسكەري-تەڭىز قىزمەتى ءۇشىن مەملەكەتتىك تاپسىرىس بويىنشا جاسالىنعان. بۇدان بۇرىنعى كەمەلەردەن ەرەكشەلىگى – بۇل كورابلدىڭ قارۋ-جاراعى جەتىلدىرىلگەن: سۋ استىنان كەلەتىن قاۋىپتى ديۆەرسيالىق ارەكەتتى, جۇزبەلى قارسىلاستى انىقتايتىن جانە قارسىلىق كورسەتەتىن قوندىرعى ورناتىلعان, كەمە قۇرىلىسى كەزىندە بۇعان دەيىن جاسالعان كورابلدەردە قىزمەت ەتۋشى اسكەري تەڭىزشىلەردىڭ اقىل-كەڭەستەرى ەسكەرىلگەن. وسىلايشا, ۇرىس كەمەسىنىڭ مانەۆر مۇمكىندىكتەرى ارتىپ, اسكەري قۋاتى كۇشەيىپ, ەكيپاج ءۇشىن جايلى بولا تۇسكەن.
– بۇگىن ورالدىقتار عانا ەمەس, بۇكىل قازاقستان ءۇشىن ەرەكشە كۇن. قازاقستان رەسپۋبليكاسى كەمە جاساۋ سالاسىنىڭ فلاگمانى – «زەنيت» زاۋىتى ەل تاۋەلسىزدىگىنىڭ 25 جىلىندا 25 كەمە جاساعان ەكەن. بۇل پرەزيدەنتىمىزدىڭ مودەرنيزاتسيا, ماشينا جاساۋ ونەركاسىبىن دامىتۋ دەگەن تاپسىرماسىنا سايكەس جاسالىپ وتىرعان جۇمىستار. زاۋىتقا مەملەكەتتىك تاپسىرىس بەرىپ, ەلىمىزدىڭ قورعانىس قابىلەتىن ۇنەمى ارتتىرىپ, قورعانىسقا ەرەكشە كوڭىل ءبولىپ وتىرعان ەلباسىمىزعا العىس ايتامىز, – دەدى التاي كولگىنوۆ.
قورعانىس جانە اەروعارىش مينيسترى بەيبىت اتامقۇلوۆ ءوز سوزىندە «زەنيت» زاۋىتىنىڭ مۇمكىندىگى بۇگىندە بۇدان دا ۇلكەن كەمەلەردى جاساۋعا جەتەتىنىن ايتتى. «تاۋەلسىزدىكتىڭ العاشقى جىلدارىندا زاۋىت ۇجىمىن ساقتاپ, بىلىكتى مامانداردى ۇستاپ قالعان باسشىلارعا كوپ راحمەت! ءبىز ءبۇگىن قازاقستاندا كەمە جاساۋ ءوندىرىسى قالىپتاستى دەپ نىق سەنىممەن ايتا الامىز. ارينە, ورال قالاسىنىڭ گەوگرافيالىق ورنالاسۋى بىزگە ءبىراز كەدەرگى كەلتىرۋدە. سوندىقتان كاسپي تەڭىزىنىڭ جاعاسىنان زاۋىت فيليالىن اشۋ جوسپارى قاراستىرىلۋدا» دەدى مينيستر.
– «زەنيت» زاۋىتىنان شىققان كەمەلەر ءبىزدىڭ كاسپي تەڭىزىندەگى سۋ شەكاراسىن ابىرويمەن قورعاپ ءجۇر. ءبىزدىڭ اسكەري تەڭىز كۇشتەرىمىز كاسپي تەڭىزى ايماعىنداعى مەملەكەتتەر اراسىندا وتەتىن اسكەري-تەڭىز جاتتىعۋلارى كەزىندە تۇراقتى تۇردە الدىڭعى قاتاردان كورىنەدى. بۇل – قازاقستاندىق ءونىمنىڭ الەمدىك ستاندارتتارعا سايكەس, زاماناۋي تالاپتارعا لايىق ماشينا ەكەندىگىن دالەلدەيدى, – دەدى قورعانىس ءمينيسترىنىڭ ورىنباسارى, گەنەرال-مايور تالعات جانجۇمەنوۆ ءوز سوزىندە.
راسىندا دا, بىرلەسكەن اسكەري جاتتىعۋلار كەزىندە قازاقستاندىقتار رەسەي فەدەراتسياسىنان كەيىن ەكىنشى ورىن الادى ەكەن.
– ارينە, رەسەي فەدەراتسياسى كەمە جاساۋ ءوندىرىسىنىڭ 300 جىلدىق تاريحى بار. ءبىزدىڭ وتاندىق ءوندىرىس 1993 جىلدان باستالعان. سونىڭ وزىندە ماماندار قازاقستاندىق كەمەلەردىڭ وتە يكەمدى, ۇرىس تالابىنا ساي ەكەندىگىن ايتىپ ءجۇر. بۇگىنگى ۇرىس كەمەسىنىڭ ەرەكشەلىگى – سۋ استى, سۋ ءۇستى جانە تەڭىز نىساندارىن جويۋعا ارنالعان قارۋ-جاراقپەن جابدىقتالعان. ءبىز وتە قۋانىشتىمىز, كەۋدەمىزدى ماقتانىش سەزىمى كەرنەپ تۇر, – دەدى «ماڭعىستاۋ» زىمىراندى-ارتيللەريالىق كەمەسى كاپيتانىنىڭ كومەكشىسى, اعا لەيتەنانت ولجاس باتىربەكوۆ.
ايتا كەتۋ كەرەك, قازاقستان رەسپۋبليكاسىنىڭ كاسپي تەڭىزىندەگى شەكاراسىن قورعاۋ ماقساتىندا شىعارىلا باستاعان زىمىراندى-ارتيللەريالىق كەمەلەردىڭ العاشقىسى 2012 جىلى 25 ساۋىردە سۋعا تۇسىرىلگەن بولاتىن. 0250 جوباسىمەن باستالعان بۇل كورابل – «قازاقستان» اتاۋىن يەمدەندى. ودان كەيىن 2013-2014 جىلدارى زاۋىت كونۆەيەرىنەن «ورال» جانە «سارىارقا» ۇرىس كەمەلەرى تەڭىز قىزمەتىنە اتتانعان. بۇگىندە ولاردىڭ ءبارى دە كاسپي تەڭىزىندە وتانىمىزدىڭ شەكارا قىزمەتىندە شەپتە تۇر.
قازبەك قۇتتىمۇرات ۇلى,
«ەگەمەن قازاقستان»
ورال
