بايلانىس قارقىنى باسەڭدەگەن جوق

كەشە قازاقستان پارلامەنتى ءماجىلىسىنىڭ توراعاسى ورال مۇحامەدجانوۆ رۋمىنيانىڭ ەلىمىزدەگى توتەنشە جانە وكىلەتتى ەلشىسى ەميل راپچامەن كەزدەستى, دەپ حابارلادى وسى پالاتانىڭ ءباسپاسوز قىزمەتى. الەمدىك قارجى داعدارى­سى­نىڭ اسەرىنە قاراماستان, ەكى ەل اراسىنداعى ەكونوميكالىق باي­لا­نىس باسەڭدەگەن جوق, قايتا قار­قىن الدى. ايتالىق, 2009 جىلى قازاقستان مەن رۋمىنيا ارا­سىن­داعى ساۋدا اينالىمى 878 ملن. اقش دوللارى كولەمىندە بولعان ەدى. ال 2010 جىلعى كورسەتكىش 1,4 ملرد. اقش دوللارىن قۇ­را­دى. ۇستىمىزدەگى جىلدىڭ العاشقى ايلارى دا وڭ ناتيجە بەرىپ وتىر. كەزدەسۋدە تاراپتار ساۋدا-ەكو­نو­مي­كالىق بايلانىستىڭ قارقىن الىپ, الدىڭعى جىلمەن سالىس­تىر­عاندا 20 پايىزعا وسكەنىنە توقتالىپ ءوتتى. ورال مۇحامەدجانوۆ: «قازاق­ستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ رۋمىنياعا بارعان ساپارى جانە رۋمىنيا پرەزيدەنتى ترايان با­سەس­كۋدىڭ ءبىزدىڭ ەلگە جاساعان ساپارى قوس مەملەكەتتىڭ ىنتى­ماق­تاستىق قارىم-قاتىناسىنىڭ ارتا تۇسۋىنە سەرپىن بەردى. ءالى دە بايلانىستىڭ جاقسى بولا تۇسە­تى­نىنە ءۇمىت ارتامىز», – دەدى. ءوز كەزەگىندە ەميل راپچا قازاقستان الەم نازارىنداعى ەل ەكەنىن, استانادا حالىقارالىق ما­ڭىزدى باسقوسۋلاردىڭ ءجيى ءوتۋى ساياسي-ەكونوميكالىق بايلا­نىس­تار­دىڭ ءورىس الۋىنا جول اشاتى­نىن ايتىپ ءوتتى. سونىڭ ءبىرى جۋىردا وتكەن ەۋروپا قايتا قۇرۋ جانە دامۋ بانكى باسقارۋشىلار كەڭەسىنىڭ وتىرىسى ەكەنى انىق. ەكى ەل پارلامەنتىندە ىنتى­ماق­تاستىق جونىندەگى دەپۋتاتتىق توپ بار. قازاقستان پارلامەنتىندەگى توپتىڭ قۇرامىنا 22 دەپۋتات ەنگەن. تاراپتار ەكى ەلدىڭ مادەني-رۋحاني بايلانىستارىن دامىتۋ تۋرالى ويلارىمەن ءبولىستى. ەلشى ءماجىلىس توراعاسىنا رۋ­مىنيا پارلامەنتى دەپۋتاتتار پالاتاسىنىڭ ءتورايىمى روبەرتا الما اناستاسەنىڭ شاقىرۋىن تا­بىس ەتىپ, زاڭ شىعارۋشىلىق ءتا­جىريبەسىمەن الماسۋ ماقساتىندا ءوز ەلىنە ساپارمەن بارۋعا شاقىردى.