وڭدى ىستەر بار. بىراق توقمەيىلسۋگە بولمايدى

كەشە ءماجىلىس توراعاسىنىڭ ورىنباسارى ۆلاديمير بوبروۆتىڭ جەتەكشىلىگىمەن «قازاقستان رەسپۋبليكاسىنداعى ءبىلىم مەن عىلىمنىڭ دامۋى» تاقىرىبىندا ۇكىمەت ساعاتى بولىپ, وندا ءبىلىم جانە عىلىم ءمينيسترى ءسوز سويلەدى. باقىتجان جۇماعۇلوۆ ءوز سوزىندە ءبىلىم بەرۋدى دامىتۋ يندەكسى (بدي) بويىنشا سوڭعى ءۇش جىلدا قازاق­ستان 129 ەلدىڭ ىشىندە كوشباس­شى­لاردىڭ تورتتىگىنە ەنگەندىگىن ەرەكشە اتاپ ءوتتى. بۇل كورسەتكىش بوي­ىنشا بەلارۋس 26-ورىندا, گرۋزيا – 30, تاجىكستان – 31, قىرعىزستان – 42, ارمەنيا – 43, وزبەكستان – 48, ۋكراينا – 53 جانە مولدوۆا 59- ورىندا كورىنەدى. بىلتىر ادامي دامۋ يندەكسى (ادي) بويىنشا قازاق­ستان العاش رەت دامۋ دارەجەسى جوعا­رى ەلدەردىڭ تىزبەسىنە ەنىپ, 66- ورىندى يەلەنگەن. «بيىلعى جىلى جاريالانعان ۇلتتىق ءال-اۋقات بوي­ىنشا بەدەلدى حالىقارالىق رەيتينگ ناتيجەلەرى بويىنشا قازاقستان الەم­نىڭ 110 ەلىنىڭ ىشىندە 50-ورىن­دا», دەدى باقىتجان تۇرسىن ۇلى. رەيتينگتەگى ورىندار نەگىزگى سەگىز يندەكس بويىنشا انىقتالسا, ونىڭ ءبىرى – ءبىلىم بەرۋ ساپاسى. ءبىلىم بەرۋ يندەكسى بويىنشا قازاقستان 110 ەلدىڭ ىشىندە 46-شى ورىندا تۇر ەكەن. ەكىنشى بلوك ءبىلىم جانە عى­لىم سالاسىنىڭ نەگىزگى ءناتي­جە­لەرىنە ارنالدى. مينيستر وسى رەتتە ەلىمىزدە مىقتى قۇقىقتىق بازا قۇرى­لىپ, ءبىلىم بەرۋدى دا­مىتۋدىڭ تاياۋ­داعى ون جىلدىققا ارنالعان مەملەكەتتىك باع­دارلاماسى ازىرلەنگەن­دى­گىن تىلگە تيەك ەتتى. سوڭعى 10 جىلدا ءبىلىم بەرۋدى قارجى­لان­دىرۋ 7,5 ەسە ارتقان. عىلىمدى قارجىلاندىرۋ دا وسكەن. «بالاپان» باعدار­لاماسى بەلسەندى تۇردە ىسكە اسى­رىلۋدا. سوڭعى 5 جىل ىشىندە 490 جاڭا مەكتەپ سالى­نىپتى. نازارباەۆ زياتكەرلىك مەكتەپتەر جەلىسى قۇرىلۋدا. ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىن ىسكە اسىرۋدىڭ باسىم باعىتتارى دا نازاردان تىس قالعان جوق. مينيستر وسى ورايدا مەملەكەتتىڭ مۇعالىم مارتەبەسىن ارتتىرۋدا ماڭىزدى قادام جاسا­عاندىعىنا ەرەكشە توقتالدى. 1 قىركۇيەكتەن باستاپ مۇعالىمدەر مەن وندىرىستىك وقىتۋ شەبەرلەرى بىلىكتىلىك ساناتى ءۇشىن بازالىق لاۋازىمدىق جالاقىدان 100 پاي­ىزعا دەيىن قوسىمشا تولەماقى الا­دى. وسى ماقسات ءۇشىن رەسپۋب­ليكالىق بيۋدجەتتەن قوسىمشا 5,3 ملرد. تەڭگە بولىنگەن. مينيستر ءبىلىم مەن عىلىم سالاسى بويىنشا ەلىمىزدە اتقارى­لىپ جاتقان باسقا جۇمىستار جايىنان دا قۇلاعدار ەتىپ, بولاشاق جوسپارلار تۋرالى دا جان-جاقتى اڭگىمەلەدى. ۇكىمەت ساعاتىندا ە.نىع­ما­تۋ­لين, ش. مىرزاحمەتوۆ, ۆ.نەحوروشەۆ, ر.حالمۇرادوۆ, ز.باليەۆا, ق.ىدىرىسوۆ, ت.ب. دەپۋتاتتار مينيسترگە ەلىمىزدەگى ءبىلىم مەن عىلىمعا قاتىستى سۇراقتار قويدى. وتى­رىستى ۆ.بوبروۆ قورىتىندىلادى. اسقار تۇراپباي ۇلى.