بۇل كورمەگە شىعارمالارى الەمنىڭ 20 تىلىنە اۋدارىلىپ, 7,7 ميلليون تارالىممەن وقىلىپ كەلە جاتقان كوركەمسوز شەبەرىنىڭ 130 ەڭبەگى قويىلعان. وقىرمانداردىڭ نازارىنا ۇسىنىلىپ وتىرعان وسىناۋ كىتاپ كورمەسى ءۇش بولىمنەن تۇرادى.
«ادام ءوز تاعدىرىنىڭ ۇستازى» ءبولىمى اۆتوردىڭ ءومىربايانى, وسكەن ورتاسى جايىندا ماعلۇماتتار بەرەتىن ەڭبەكتەر مەن فوتوسۋرەتتەرگە ارنالسا, العاش شىققان ەڭبەكتەرىنەن تارتىپ, بۇگىنگى كۇنگە دەيىنگى شىعارمالارى مەن الەم حالىقتارى تىلىنە اۋدارىلعان كىتاپتارى «جازۋشىلىق – قانعا سىڭگەن مىنەز, ساعىنىش پەن مۇڭ ەگىز» بولىمىنە توپتاستىرىلعان. «قالامگەردى قاتارى وسىرەدى» اتتى سوڭعى بولىمگە شىعارماشىلىق ءوسۋ جولى مەن ەڭبەكتەرى جايلى جازىلعان مونوگرافيالار قويىلعان.
14 جاسىنان باستاپ ءتىرى سوزبەن سۋرەت سالۋدى سەرىك ەتكەن اۆتوردىڭ قالامىنان 11 رومان, 22 حيكايات, 100-گە تارتا اڭگىمە تۋعان. زەرتتەۋشىلەر د.دوسجان شىعارماشىلىعىن ءۇش سالاعا ءبولىپ قاراستىرادى. بىرىنشىدەن, كونە عاسىر قويناۋىنان ەر تۇرىك رۋحىن تىرىلتكەن 60 جىلدار باسىنداعى تاريحي تاقىرىپتارى. وعان دالەل – «جىبەك جولى», «وتىرار», «فارابي» اتتى كىتاپتارى. ەكىنشى: بوداندىق بۇعاۋ مەن شەنەۋنىكتەر شارپىسۋىنان ۇلتتىق رۋحىن جوعالتىپ, مىنەز ەكولوگياسىنا ۇشىراعان ۇرپاقتار وبرازىنىڭ گالەرەياسى – «زاۋال», «داريا», «تابالدىرىعىڭا تابىن», «جولبارىستىڭ سۇرلەۋى», «كىسى اقىسى» كىتابىنان تابىلادى. سوڭعىسىنا عاجايىپ تۇلعالار عۇمىرىن كوركەمسوزبەن سويلەتكەن «مۇحتار جولى», «ابايدىڭ رۋحى» روماندارى ەنەدى. «اق وردا» رومانى, «استانانىڭ باس ارحيتەكتورى» دەرەكتى حيكاياسى تاۋەلسىزدىكتىڭ تاريحىن كوركەم كەستەلەسە, قالامگەردىڭ كەيىنگى كەزدەرى جازعان «كەشىرىم», «ادام اينا», «الەكساندريا كىتاپحاناسى» اڭگىمەلەرى مەن «جانىپ-ءسونۋ», «قىزىل كەنىش وقيعاسى», «جان ءتاتتى» حيكاياتتارى ادام تاعدىرىن ءار قىرىنان سۋرەتتەگەن.
جالپى, د.دوسجان XXI عاسىر – نارىق زامانىنىڭ كەيىپكەرلەرىن سومداپ جۇرگەن بىردەن-ءبىر جازۋشى. جيىندا ءسوز سويلەگەن ءا.كەكىلباەۆ وعان ء«سوزدىڭ ءتۇبىن قازىپ جازاتىن قازباگەر جازۋشى» دەپ باعا بەرسە, س.ورازالين قالامداس جازۋشىنىڭ شىعارماشىلىعى مەن ادامي قاسيەتتەرىنە توقتالدى. ارقاعا استانامىز العاش كوشىپ كەلگەندە قازاق 11% عانا ەدى, ال بۇگىندە قازاقتىڭ سانى 77%-عا جەتتى. استانادا 101 جازۋشى بار ەكەن. قازاقى ادەپ, ۇلتتىق پسيحولوگيا قالىپتاستى. ەلوردا رۋحاني ورتالىققا اينالىپ كەلە جاتىر, وسىعان تاۋبە دەيمىن, دەگەن قر پرەزيدەنتتىك مادەنيەت ورتالىعىنىڭ ديرەكتورى, عالىم مىرزاتاي جولداسبەكوۆ ودان ءارى وندىرتە جازىپ جۇرگەن جازۋشىعا شىعارماشىلىق تابىس تىلەدى.
مايگۇل سۇلتان,
ل.ن.گۋميلەۆ اتىنداعى ەۇۋ ستۋدەنتى
