وسى كۇندەرى قازاقستان تەننيس فەدەراتسياسى 7-9 شىلدە ارالىعىندا دەۆيس كۋبوگىنىڭ شيرەك فينالدىق ماتچىندا ارگەنتينا قۇراماسىمەن كەزدەسەتىن ەلىمىزدىڭ باس كومانداسىنا قولداۋ كورسەتۋ ماقساتىندا جانكۇيەرلەردەن قۇرالعان توپتى جاساقتاۋ ءۇشىن «جانكۇيەر, سەن ارگەنتيناداعى ويىنعا كەرەكسىڭ!» اتتى شارا وتكىزۋدە.
بۇل شارانىڭ ماقساتى – جانكۇيەرلەر اراسىندا ارگەنتيناعا ارنالعان جولدامانى يەلەنۋ ءۇشىن ۇتىس ويىندارىن وتكىزىپ, سوندا جەڭىمپاز اتانعاندارعا بۋەنوس-ايرەس قالاسىنا بارىپ-كەلەتىن بيلەتتى, قوناق ءۇي ءتۇبىرتەگى مەن ستاديونعا كىرەتىن بيلەتتى تاپسىرۋ.
كەشە استاناداعى تەننيس فەدەراتسياسىنىڭ كەڭسەسىندە وسى اكتسيانىڭ اياسىندا وتكىزىلگەن العاشقى شارانىڭ قورىتىندىسى جاريالانىپ, ارگەنتيناعا جولدامانى يەلەنگەن ەكى جانكۇيەردىڭ ەسىمى بەلگىلى بولدى. ولار – ارال قالاسىنىڭ تۇرعىنى مەيرامبەك شالجانوۆ پەن استانالىق دامير ورازوۆ. جولداما يەلەرىمەن كەزدەسۋدە ۇتف ۆيتسە-پرەزيدەنتى ءادىل بورلىباەۆ اتالمىش اكتسيانىڭ ەرەجەلەرىمەن تانىستىرىپ, ونىڭ قورىتىندىسى قالاي شىعارىلعانىنان حاباردار ەتتى.
قازاقستان تەننيس فەدەراتسياسى مۇنداي شارانى ەلىمىز قۇراماسىنىڭ چەحيا كومانداسىمەن بولعان سوڭعى كەزدەسۋىنەن كەيىن وتكىزۋدى قولعا الدى. قازىر قتف ەلىمىزدىڭ باس كومانداسىن دەۆيس كۋبوگىنىڭ شيرەك فينالدىق ماتچىندا قولداۋ كورسەتۋ ءۇشىن جانكۇيەرلەردى ارگەنتيناعا كوپتەپ اپارۋدى ماقسات ەتىپ وتىر. وسىعان بايلانىستى تەننيس فەدەراتسياسى مامىر ايىنان باستاپ ۇلتتىق قۇراماعا بولىسىپ, ونىڭ ويىندارىن بارىنشا قولداعان جانكۇيەرلەر اراسىندا ارگەنتيناعا جولدامانى جەڭىپ الۋعا ارنالعان ءتۇرلى شارالار وتكىزە باستادى. مۇنداي شارالار الداعى كەزدە دە جالعاسادى. ال دەۆيس كۋبوگىنىڭ شيرەك فينالدىق ويىندارىنا ارنالعان العاشقى جولداما قازاقستان مەن چەحيا قۇرامالارىنىڭ اراسىندا وتكەن كەزدەسۋدە وتانداستارىمىزعا ەڭ كوپ قولداۋ كورسەتكەن جانكۇيەرلەرگە بەرىلدى. وسى ويىن كەزىندە جانە ودان كەيىن www.sport.kz سايتىندا ارگەنتيناعا جولداما العان مەيىرجان شالجانوۆ پەن دامير ورازوۆ كوماندامىزعا ەڭ كوپ قولداۋ كورسەتكەن ەكەن.
بۇعان دەيىن Beeline كومپانياسى مەن تەننيس فەدەراتسياسىنىڭ ۇيالى بايلانىس وپەراتورى مەن باق وكىلدەرى اراسىندا 7-9 شىلدە كۇندەرى بۋەنوس-ايرەستە وتەتىن ماتچتى تاماشالاۋ ءۇشىن كونكۋرستىڭ جاريالانعانىن حابارلاعانبىز. ونىڭ ەرەجەسىن تاعى دا ەستەرىڭىزگە سالا كەتسەك, باق اراسىنداعى كونكۋرستىڭ جەكەلەگەن نوميناتسياسىندا مەرزىمدى باسپاسوزدە جانە تەلەەفيردە 2011 جىلدىڭ 5-27 مامىر كۇندەرى ارالىعىندا شىققان ەڭ ۇزدىك ماتەريالداردىڭ ەكى اۆتورى جەڭىمپاز بولىپ تانىلادى. كوماندالىق نوميناتسيادا باق اراسىندا ەكى رەداكتسيا تاڭداپ الىنادى. مۇندا 2010 جىلدىڭ جەلتوقسان ايىنان باستاپ, 2011 جىلدىڭ 27 مامىرىنا دەيىن وتاندىق اقپارات قۇرالدارىندا تەننيس تۋرالى ەڭ كوپ جازعان ۇجىم جەڭىمپاز اتانادى.
ال Beeline ابونەنتتەرى اراسىندا وتەتىن بايقاۋدا 5-27 مامىر كۇندەرى ارالىعىندا دەمالىستاردى ەسەپتەمەگەندە كۇن سايىن www.beeline.kz مەن www.ktf.kz سايتتاردا, كومپانيانىڭ Facebook, Vkontakte جانە twitter الەۋمەتتىك جەلىلەرىندەگى رەسمي توپتارىندا تەننيس تۋرالى قويىلعان ەكى سۇراققا جانە كونكۋرستىڭ قورىتىندىسىنداعى 34 سۇراققا ەڭ كوپ جاۋاپ بەرگەن ءبىر ابونەنت دەۆيس كۋبوگىنىڭ شيرەك فينالدىق كەزدەسۋىن تاماشالاۋ ءۇشىن تەگىن بيلەتكە يە بولادى.
داستان كەنجالين.
