جاقىندا قازاقستان رەسپۋبليكاسىنىڭ ۆەنا قالاسىنداعى حالىقارالىق ۇيىمدار جانىنداعى جاڭادان تاعايىندالعان تۇراقتى وكىلى قايرات ءابدىراحمانوۆ بىرىككەن ۇلتتار ۇيىمىنىڭ ونەركاسىپتىك دامۋ جونىندەگى (يۋنيدو) باس ديرەكتورى كاندە يۋمكەللاعا سەنىم گراموتاسىن تاپسىردى.
تالعات جۇماعۇلوۆ, «ەگەمەن قازاقستان» – ۆەنادان.
ءراسىم كەزىندەگى اڭگىمەدە قازاقستان مەن يۋنيدو اراسىنداعى ءوزارا ءىس-قيمىل ماسەلەلەرىنىڭ كەڭ اۋقىمى تالقىلاندى. ۇيىمنىڭ ماڭىزدى ءرولى, سونداي-اق ونىڭ دامۋشى جانە وتپەلى كەزەڭدە ەلدەرگە تيگىزەتىن پايداسى اتاپ ءوتىلدى. يۋنيدو باسشىسىنىڭ نازارى قازاقستان ۇكىمەتىنىڭ ەكونوميكانى ءارتاراپتاندىرۋ باعىتىندا ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ قابىلدانۋىنا اۋدارىلدى. ەلىمىزدىڭ تەحنيكالىق ىنتىماقتاستىقتىڭ ناقتى جوبالارىن ىسكە اسىرۋعا قىزىعۋشىلىعى قۇپتالدى. ال ك.يۋمكەللا 2010 جىلى شىلدە ايىنىڭ باسىندا قازاقستانعا جاساعان ساپارىن جىلى لەبىزبەن ەسكە الدى. بۇل يۋنيدو باسشىسىنىڭ ورتالىق ازياعا جاساعان تۇڭعىش ساپارى ەدى. باس ديرەكتور دامۋشى ەلدەر يندۋستريالىق ساياساتتى ىسكە اسىرۋ جولىندا ەگجەي-تەگجەيلى جوسپارلاپ, ماقساتتى ارەكەت جاساۋلارى ءتيىس, دەدى. وسى ورايدا قازاقستاننىڭ شيكىزات باعىتتىلىعىنان قۇتىلىپ, ەكونوميكانى ءارتاراپتاندىرۋعا بارلىق مۇمكىندىگى بار. ك.يۋمكەللا يۋنيدو-نىڭ بارىنشا قولعابىس كورسەتۋدى جالعاستىرا بەرەتىنىنە سەندىردى. سونداي-اق 22-24 ماۋسىمدا ۆەنا قالاسىندا وتەتىن يۋنيدو ەلدەرىنىڭ ونەركاسىپتىك دامۋ جونىندەگى كەڭەسىنىڭ 39-شى ماجىلىسىنە دايىندىق تۋرالى حاباردار ەتتى.
