بريتان سوتى ءابىلازوۆتىڭ ايىپتارىن ادىلەتسىز دەپ تاپتى

بريتان سوتى قازاقستاندىق بتا بانكتىڭ ونىڭ بۇرىنعى باسشىسى مۇحتار ءابىلازوۆتىڭ اتىنا جازعان تالاپ ارىزىنىڭ ساياسي استارى بار دەپ مويىنداۋدان باس تارتتى جانە بانكتىڭ بۇرىنعى باسشىعا تاققان كىنالارىنىڭ زاڭدىلىعىن راستادى. ريا نوۆوستي اگەنتتىگىنە كەلىپ تۇسكەن كورولدىك سوتتىڭ كوممەرتسيالىق ءبولىمىنىڭ سۋدياسى نايدجەل ءتيردىڭ شەشىمىندە وسىلاي دەپ اتاپ كورسەتىلگەن. ول جاۋاپ بەرۋشى جاقتىڭ لوندوندا تۇرىپ جاتقان ابىلازوۆكە قارسى تالاپ  ارىزدىڭ ساياسي استارى بار جانە ونىڭ ارتىندا قازاقستاننىڭ قازىرگى باسشىلىعى تۇر دەپ كورسەتىلگەن اپەللياتسياسىن قاراعان بولاتىن. 2009 جىلى بتا بانكتىڭ قازاقستاندىق «سامۇرىق-قازىنا» ەگەمەندى قورىنىڭ باقىلاۋىنا كوشكەنى بەلگىلى. «مەن تالاپ ارىزدىڭ ءادىل ەمەستىگى جانە سوت پروتسەسىن بۇرمالاۋ تۋرالى ايتىلعاندار بىرقاتار سەبەپتەرگە بايلانىستى شىندىققا سايكەسپەيدى دەگەن قورىتىندىعا كەلدىم», دەپ اتاپ كورسەتىلگەن سۋديا شەشىمىندە. بريتان سوتى, بىرىنشىدەن, بتا بانكتىڭ, ءوزىنىڭ باس اكتسيونەرىنە («سامۇرىق-قازىنا») جانە قازاقستان پرەزيدەنتىنە تاۋەلسىز, دەربەس زاڭدى بىرلىك رەتىندە قالىپ وتىرعانىن مويىندادى. ەكىنشىدەن, بانكتىڭ ول «سامۇرىق-قازىنا» قورى­نىڭ باقىلاۋىنا كوشپەي تۇرىپ-اق ابىلازوۆكە قارسى تالاپ ارىز بەرۋگە ءوز سەبەپتەرى بولعان. ابىلازوۆكە قاتىستى قىلمىستىق ءىس 2009 جىلى, مەملەكەت بتا بانكتىڭ كاپيتالىنا ەنگەننەن كەيىن قوزعالدى. قىلمىستىق ءىس قوزعالعاننان كەيىن ءابىلازوۆ ەلدەن قاشىپ كەتتى, ءوزىن قۋدالاۋدىڭ ساياسي استارى بار دەگەن جەلەۋمەن ول بۇگىندە ۇلىبريتانيادا تۇرىپ جاتىر. وسىلايشا بتا بانكتىڭ بۇرىنعى باسشىسىنا قارسى سوماسى 4 ميلليارد دوللاردان اساتىن ءىستى ودان ءارى جالعاستىرا بەرەتىن بولادى. وسى ورايدا, اتالمىش بانكتىڭ بۇكىل اكتيۆىنىڭ قازىرگى كۇنى سوت بەلگىلەگەن KPMG كومپانياسىنىڭ باسقارۋىندا تۇرعانىن ايتا كەتۋ قاجەت. ءابىلازوۆتىڭ زاڭسىز جىمقىرعان قارجىسىنىڭ سوماسى شامامەن 7 ميلليارد دوللاردى قۇرايدى. قازاقستاندىق بيزنەسمەنگە جەتى رەت سوتتىڭ تالاپ ارىزى بەرىلدى, بىراق كاسىپكەردىڭ ءوزى ولاردىڭ ءبارىنىڭ دە ساياسي استارى بار دەگەن ءسوزىن قايتالاۋدان تانباي كەلەدى. ءسوز سوڭىندا وسى كەلتىرىلگەن اقپاراتتى ريا نوۆوستي اگەنتتىگىمەن ءبىر مەزگىلدە رەسەي قۇقىقتىق جانە سوت اقپاراتتارى اگەنتتىگىنىڭ, «دياپازون» ون-لاين گازەتىنىڭ, Kazakhstan Today اگەنتتىگىنىڭ حابارلاعانىن ايتا كەتۋ كەرەك.