ۇيىمدار شەڭبەرىندەگى ۇيىسۋ

كەشە سىرتقى ىستەر مينيسترلىگىندە اتالعان ۆەدومستۆونىڭ رەسمي وكىلى اسقار ابدراحمانوۆتىڭ قاتىسۋىمەن ءداستۇرلى اپتالىق بريفينگ ءوتتى. رەسمي وكىل ءوز سوزىندە الماتىدا شانحاي ىنتىماق­تاستىق ۇيىمىنا ءمۇ­شە مەملەكەتتەر ۇلتتىق ۇيلەستى­رۋشىلەر كەڭەسىنىڭ كەزەكتى وتىرىسى ءوتىپ جاتقانىن, ءما­جىلىسكە قاتى­سۋشىلار بيىلعى جىلدىڭ 14 مامى­رى كۇنى الماتىدا وتەتىن شانحاي ۇيى­مىنا مۇشە مەملەكەتتەر سىرتقى iستەر مينيسترلەرىنىڭ  كەڭەسىنە جانە 15 ماۋ­سىم­دا استانادا وتەتىن ۇيىم­­­نىڭ 10 جىلدىعىنا ارنالعان مەرەي­تويلىق سامميتكە دايىندىق بارى­سى تالقىلانىپ جاتقانىنا توقتالدى. ال 14 مامىردا الماتىدا وتەتىن شانحاي ۇيىمىنا مۇشە مەملەكەتتەر سىرتقى ىستەر مينيسترلەرى كەڭەسىنىڭ كەزەكتى وتىرىسى اياسىندا ۇيىم قۇرىلۋىنىڭ ون جىلدىعىنا ارنال­عان مەرەيتويلىق سامميتكە دايىندىق بارىسىن تالقىلاۋ, وزەكتى حالىق­ارا­لىق جانە ايماقتىق ماسەلەلەر بو­يىنشا پىكىر الماسۋ كوزدەلىپ وتىر. مينيسترلەر  شانحاي ۇيىمى قىزمە­تىنىڭ اعىمداعى ماسەلەلەرىن قاراس­تىرىپ, ونىڭ شەشىمدەرىنىڭ جۇزەگە اسىرىلۋ تەتىگىن قامتاماسىز ەتەتىن بولادى. سونىمەن قاتار, كوپجاقتى ىنتىماق­تاستىقتى دامىتۋ جانە جەتىلدىرۋ ماسەلەلەرىن شىۇ-عا مۇشە مەملەكەتتەر باس­شىلارى كەڭەسىنىڭ قاراۋىنا ۇسىنۋى ءتيىس, دەدى ا.ابدراحمانوۆ. بريفينگ بارىسىندا سونداي-اق 12 جانە 14 مامىر ارالىعىندا ناتو باس حاتشىسىنىڭ ورتالىق ازيا جانە كاۆكاز جونىندەگى ارنايى وكىلى دجەيمس اپپاتۋرايدىڭ استاناعا جۇ­مىس ساپارى بولاتىندىعى ايتىلدى. بىرقاتار مينيسترلىكتەر مەن ۆەدومستۆولاردا وتكىزىلۋى جوسپارلانعان كەزدەسۋلەر بارىسىندا شەتەلدىك مەيمان قازاقستان مەن سولتۇستىك-اتلان­تيكا اليانسى اراسىنداعى ءارىپ­تەستىك ءىس-قيمىلدارىنىڭ جەكە جوسپارى اياسىن­داعى ىنتىماقتاس­تىقتى تالقى­لاپ, ورتالىق ازياداعى اعىمداعى ساياسي جاعداي جونىندە پىكىر الما­سادى ەكەن. بريفينگ بارىسىندا 13-14 مامىر كۇندەرى رەسەي فەدەراتسياسى­نىڭ سىرت­قى ىستەر ءمينيسترى سەرگەي لاۆروۆتىڭ قازاقستانعا جۇمىس ساپا­رىمەن كەلەتىنى دە بەلگىلى بولدى. باعدارلاماعا سايكەس, كورشى ەلدىڭ سىرتقى ساياسات ۆەدوم­ستۆوسىنىڭ جەتەكشىسىن قازاق­ستان پرەزيدەنتى نۇر­سۇل­تان نازارباەۆ قابىل­دايدى. سون­داي-اق, رەسەيلىك ديپلومات­تىڭ قازاق­ستان سىرتقى ىستەر ءمينيسترى ەرجان قازىحانوۆپەن كەلىس­سوزى جوسپار­لانعان كورىنەدى. تاراپتار ساياسي, ساۋدا-ەكونومي­كا­لىق جانە مادەني-گۋمانيتارلىق سالا­لارداعى قازاقستان-رەسەي ىنتى­ماق­تاستىعىنىڭ قازىرگى جاعدايى مەن دامۋ بولاشاعىن قاراستىرىپ, حالىق­ارالىق كۇن تارتىبىندەگى وزەكتى ماسە­لەلەردى جانە تمد, ەۋرازەق, اوسشك جانە بۇۇ سياقتى حالىق­ارالىق بىرلەستىكتەر اياسىنداعى ەكى­جاقتى ىنتى­ماقتاس­تىقتى تالقىلاپ, ورتالىق ازيادا تۇراقتىلىق مەن قاۋىپسىزدىكتى نىعايتۋ شارالارى مەن كاسپي تەڭىزى ماسە­لەلەرى توڭىرەگىندە پىكىر الما­ساتىن بولادى», دەدى رەسمي وكىل. ءلايلا ەدىلقىزى.