بۇل رەتتە باس قالامىزدا سوڭعى جىلدارى كوشە جولدارىن كۇردەلى جوندەۋدەن وتكىزۋ جانە جاڭا اۆتوكولىك جولدارىن سالۋ ماسەلەسى ءبىرشاما وڭتايلى شەشىم تاۋىپ كەلە جاتقانىن اتاپ ايتقان ءجون. سوڭعى بەس-التى جىل كولەمىندە قالا اۋماعىندا جول قۇرىلىسىن جەتىلدىرۋ بويىنشا اسا ءىرى جۇمىستار اتقارىلدى. استانا قالاسىنىڭ اۆتوكولىك جولدارى باسقارماسىنىڭ حابارلاۋىنشا, بۇگىنگى كۇنى قالانىڭ كوشە جانە جول-كولىك جۇيەسى 953 كوشەدەن تۇرادى, ونىڭ جالپى ۇزىندىعى 1049 شاقىرىمدى قۇرايدى. ونىڭ ىشىندە, اسفالت-بەتون جابۋى بار جولدار – 803 شاقىرىم (76,5 پايىز), قاتتى جابۋى جوق جولدار 246 شاقىرىم (23,5 پايىز). ينجەنەرلىك ينفراقۇرىلىم نىساندارىنا 8 جولايرىق, 17 اۆتوكولىك كوپىرى, 4 جاياۋ جۇرگىنشى كوپىرى, 9 جول وتكەلى كىرەدى.
قالانىڭ شەتكى اۋداندارىن دامىتۋ اياسىندا تەك 2011-2017 جىلدار ارالىعىندا عانا 101 شاقىرىم جول جانە 275 شاقىرىم ينجەنەرلىك جەلى سالىنىپ, پايدالانۋعا بەرىلدى. كۇيگەنجار, قازاقاۋىل, پريگورودنىي, قاراوتكەل, زارەچنىي جانە پرومىشلەننىي تۇرعىن الاپتارىندا جول سالۋ جۇمىستارى اياقتالدى. وتكەن جىلى ۇزىندىعى 41 شاقىرىمدى قۇرايتىن 57 كوشەدە ورتاشا جوندەۋ جۇمىستارى جۇرگىزىلدى. ال 275 كوشەدە اعىمداعى جوندەۋ جۇمىستارى, اتاپ ايتقاندا, 68 كوشەدە باعدارلىق ادىسپەن جوندەۋ, 207 كوشەدە شۇڭقىرلاردى جوندەۋ جۇمىستارى جۇرگىزىلدى. ءۇستىمىزدەگى جىلى 6 شاقىرىم جاڭا جول قۇرىلىسىن, 32 شاقىرىم ينجەنەرلىك جەلىلەردىڭ قۇرىلىسىن سالۋ جۇمىسى اياقتالماق.
سوڭعى ۋاقىتتا ەلوردامىزدىڭ جول-كولىك ينفراقۇرىلىمىن جاڭعىرتۋ ماقساتىندا بىرقاتار ماڭىزدى جوبالار ءىسكە اسىرىلدى. اتاپ ايتقاندا, «استانا LRT» جشس 2014 جىلى ITS جوباسىن پايدالانۋعا ۇسىندى. ITS جوباسى بىرنەشە كىشى جوبالىق جۇيەدەن تۇرادى. ولار: باعدارشام نىساندارىن بەيىمدەپ باسقارۋ; جۇرگىزۋشىلەردى حاباردار ەتۋ جۇيەسى; قوعامدىق كولىكتى ديسپەتچەرلىك قىزمەتپەن قامتاماسىز ەتۋ جۇيەسى; جول ءجۇرۋ اقىسىن تولەۋدىڭ ەلەكتروندى جۇيەسى; قالانىڭ اۆتوتۇراق كەڭىستىگىن باقىلاۋ جوباسى; جول قيىلىستارىن بەينەباقىلاۋ جۇيەسى. ITS جوباسى باس قالامىزداعى 6 كوشەدەگى 42 رەتتەلەتىن جول قيىلىسىن اۆتوماتتى باسقارۋدى جۇزەگە اسىردى. وسى جوبانى پايدالانۋ ناتيجەسىندە بۇل كوشەلەر قيىلىسىنىڭ ءوتكىزۋ قابىلەتى مەن كولىك اعىمدارىنىڭ قوزعالىس جىلدامدىعىن ورتا ەسەپپەن 21 پايىزعا دەيىن ارتتىرۋعا قول جەتكىزىلدى.
«استانا قالاسىنىڭ اۆتوتۇراق كەڭىستىگىن باقىلاۋ» جوباسىنىڭ باستى ماقساتى قالامىزدا كولىكتەردى تۇراققا قويۋدىڭ وسكەلەڭ مادەنيەتىن قالىپتاستىرۋ بولىپ تابىلادى. جاسىراتىنى جوق, قالا كوشەلەرىندە قالاي بولسا, سولاي تۇراققا قويىلعان اۆتوكولىكتەردەن اياق الىپ جۇرە المايسىز. بۇل كەلەڭسىزدىكتەر كوشەدە اۆتوكولىكتەردىڭ ءجۇرىپ-تۇرۋىن قيىنداتىپ, جول قاۋىپسىزدىگى ەرەجەسىنىڭ ورەسكەل بۇزىلۋىنا اكەلىپ سوعادى. «استانا قالاسىنىڭ اۆتوتۇراق كەڭىستىگىن باقىلاۋ» جوباسى ەكى كەزەڭمەن جۇزەگە اسىرىلۋدا. ءبىرىنشى, كەزەڭدە نۇرلى جول بۋلۆارىندا 910 اۆتوتۇراق ورنى قالىپتاستىرىلسا, وتكەن جىلدىڭ سوڭىنا دەيىن قالامىزدا 9 مىڭ اقىلى اۆتوتۇراق ورنى ىسكە قوسىلدى. تۇيىندەي ايتساق, بۇل زاماناۋي جوبالاردىڭ باستى ماقساتى – كوشەلەردەگى كولىك كەپتەلىستەرىن جويىپ, قالا اۋماعىندا كەدەرگىسىز كولىك قاتىناسىن قالىپتاستىرىپ, جول-كولىك قىزمەتىنىڭ ساپاسىن ارتتىرۋدا استانالىقتاردىڭ جوعارى مادەنيەتىن قالىپتاستىرۋ بولىپ وتىر.
قازىرگى تاڭدا ا. بايتۇرسىنوۆ اتىنداعى جانە ج. ناجىمەدەنوۆ اتىنداعى كوشەلەردە تاۋەلسىزدىك داڭعىلىنان جاڭا ۆوكزالعا دەيىن ۇزىندىعى 4,7 شاقىرىمعا سوزىلعان 6 جولاقتى جول سالىنىپ جاتىر. بۇل جاڭا جولدىڭ ەسەپتىك وتكىزۋ قابىلەتى 5,5 مىڭ اۆتوكولىكتى قۇرايدى. جاڭا ۆوكزالدىڭ الدىنداعى ا82 كوشەسىندە جانە ۆوكزالدىڭ ارتىنداعى ا62 كوشەسىندە جولاۋشىلارعا بارىنشا ىڭعايلى اباتتاندىرۋ جۇمىستارى جۇرگىزىلۋدە. كولىك ستراتەگياسىنىڭ تيىمدىلىگى تەك جول-كولىك ينفراقۇرىلىمىن دامىتۋمەن عانا شەكتەلمەسە كەرەك. بۇل ورايدا, قالا كوشەلەرىندەگى قوعامدىق كولىك قاتىناسىنىڭ جانە جولاۋشىلارعا كورسەتىلەتىن قىزمەت ساپاسىنىڭ دا ايرىقشا ماڭىزى بار ەكەندىگى داۋسىز. وسىعان وراي, قالامىزداعى قوعامدىق كولىك قاتىناسىن جاقسارتۋ جانە جولاۋشىلارعا بارىنشا ءتيىمدى دە ساپالى قىزمەت كورسەتۋ جايى بارعان سايىن جۇيەلى تۇردە جەتىلدىرىلىپ كەلەدى. ەكسپو-2017 حالىقارالىق مامانداندىرىلعان كورمەسىن وتكىزۋ كەزىندە ەلىمىزدىڭ بارلىق وڭىرلەرىنەن كەلەتىن جولاۋشىلار اۆتوبۋسىنىڭ تاسقىنى ارتادى دەپ كۇتىلۋدە. الدىن الا جاسالعان كەستە بويىنشا, بۇل كەزەڭدە قالامىزعا كۇن سايىن 118 جولاۋشىلار اۆتوبۋسى كەلمەك. جولاۋشىلارعا قولايلى جاعداي جاساۋ جانە ولاردىڭ قاۋىپسىزدىگىن قامتاماسىز ەتۋ ءۇشىن قالاارالىق تاسىمال جۇيەسىنە ءتورت كولىكتىك حاب ارقىلى قىزمەت كورسەتىلەتىن بولادى. بۇل حابتاردا (ساپارجايلاردا) جولاۋشىلارعا جوعارى ءدارەجەدەگى قىزمەت كورسەتىلىپ, بارىنشا قولايلى جاعداي جاسالماق.
