وتىرىس بارىسىندا ۇلتتىق كوميسسيانىڭ ماقساتتارى مەن مىندەتتەرى, مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا ۇسىنىلعان باعىتتاردى ىسكە اسىرۋ جولدارى تالقىلاندى.
ۇلتتىق كوميسسيا پرەزيدەنت جارلىعىمەن قوعامدىق سانانى جاڭعىرتۋ باعدارلاماسىن ىسكە اسىرۋ, ەلدىڭ ودان ءارى ىلگەرىلەمەلى مادەني-گۋمانيتارلىق دامۋىن قامتاماسىز ەتۋ ماقساتىندا قۇرىلعان بولاتىن.
ءوزىنىڭ سوزىندە ءا.جاقسىبەكوۆ قوعامدىق سانانى جاڭعىرتۋ تەك جاۋاپتى عانا ەمەس, سونداي-اق, ناتيجەسىنە ەلىمىزدەگى ساياسي جانە ەكونوميكالىق جاڭعىرۋلار تاۋەلدى ەڭ كۇردەلى ۋچاسكە بولىپ تابىلاتىنىن اتاپ كورسەتتى. «مەملەكەت باسشىسى ءححى عاسىردا تابىسقا جەتۋ ءۇشىن ۇلتىمىزدىڭ, ءاربىر قازاقستاندىقتىڭ دامۋ باعىتىن ايقىنداپ بەردى. بۇل تەك جاڭا ينستيتۋتتار قۇرىپ, قۇقىقتىق نورمالار قابىلداۋ عانا ەمەس. بۇل جەردە اڭگىمە قوعامداعى قارىم-قاتىناستاردى جۇيەلى جاڭارتىپ وتىرۋ تۋرالى بولىپ وتىر», دەپ اتاپ ءوتتى ءا.جاقسىبەكوۆ.
«مۇنداي ماقسات الدىمىزعا ءبىزدىڭ تاريحىمىزدا بۇعان دەيىن قويىلىپ كورگەن ەمەس. وعان جەتۋ ادەتتەن تىس كوزقاراس پەن ەرەكشە سيپاتتاعى شەشىمدەردى تالاپ ەتەدى. بۇعان قوسا, بۇكىل ورتالىق جانە جەرگىلىكتى مەملەكەتتىك ورگانداردىڭ, قوعامدىق سەكتوردىڭ جۇدىرىقتاي جۇمىلۋى قاجەت», دەپ اتاپ كورسەتتى قازاقستان رەسپۋبليكاسى پرەزيدەنتى اكىمشىلىگىنىڭ باسشىسى. وسىعان وراي, دەپ ءتۇسىندىردى ول, ۇلتتىق كوميسسيا قۇرامىنا مينيسترلەر, اكىمدەر, جەتەكشى قوعامدىق-ساياسي, عىلىمي, ءبىلىم بەرۋ بىرلەستىكتەرى مەن ساراپشىلىق ۇيىمداردىڭ وكىلدەرى ەنىپ وتىر.
كوميسسيا مۇشەسى, قازاقستان جازۋشىلار وداعىنىڭ ءتوراعاسى ن.ورازالين قازاقستان رەسپۋبليكاسىنىڭ پرەزيدەنتى ن.نازارباەۆتىڭ «بولاشاققا باعدار: رۋحاني جاڭعىرۋ» ماقالاسىنىڭ تاۋەلسىز قازاق ەلىنىڭ 25 جىلداعى جەتكەن جەتىستىكتەرىنىڭ توعىسقان تۇسىندا حالىقتىڭ كۇتكەن قۇجاتى بولعانىن تىلگە تيەك ەتتى.
ەلباسىنىڭ بۇل يدەياسى قازىر شىن ماعىناسىنداعى ۇلتتىڭ پاسپورتىن انىقتايتىن ۇعىمعا اينالعانىن اتاپ وتكەن ول: «ۇلتتىق پاسپورت – ءبىزدىڭ مادەنيەتىمىز, ۇلتتىق پاسپورت – ءبىزدىڭ ءتىلىمىزدىڭ تۇتاستىعى, ۇلتتىڭ بىرەگەيلىگى», دەپ باسا ايتتى.
وسى رەتتە ن.ورازالين «ۇلتتىق اۋدارما بيۋروسىنا» قاتىستى دا ءوز ۇسىنىسىن ءبىلدىرىپ, بۇل قۇرىلىمنىڭ قازاقستاننىڭ, ۇلتتىڭ مادەني-رۋحاني, ادەبي جادىگەرلەرىن شەتەلدە ناسيحاتتاۋدا ءرولى دە, ماڭىزى دا زور بولاتىنىن ايتتى.
سونداي-اق, ول: «ۇلتتىق كوميسسيا جۇمىسىن حالىققا ءتۇسىندىرىپ, ناسيحاتتاۋدا زيالى قاۋىمدى, سونىڭ ىشىندە قالامگەرلەردى جاپپاي تارتۋىمىز كەرەك دەپ ويلايمىن. مۇنداي تاجىريبە بۇرىن دا بولعان, رۋحاني جاڭعىرۋ باعدارلاماسىن ىسكە اسىرۋدا بۇل تاجىريبەنىڭ ىقپالى زور بولاتىنى ءسوزسىز», دەپ ءسوزىن تۇيىندەدى.
ال كوميسسيا مۇشەسى, اقتوبە وبلىسىنىڭ اكىمى ب.ساپارباەۆ ءوز سوزىندە بىلاي دەدى: «جەرگىلىكتى جەرلەردە, وڭىرلەردە مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ماقالاسى قىزۋ تالقىلانىپ, قولداۋ تاۋىپ جاتىر. حالىق بۇل باستامانى ساياسي-ەكونوميكالىق جاڭعىرۋلاردىڭ زاڭدى جالعاسى دەپ قابىلداۋدا».
سونىمەن قاتار, ب.ساپارباەۆ «قازاقستاننىڭ جاڭا 100 تۇلعاسى» جوباسىنا دا قاتىستى پىكىرىن ءبىلدىردى. جەرگىلىكتى جەرلەردەگى, وڭىرلەردەگى اتاقتى, تانىمال تۇلعالار رەسپۋبليكالىق, مەملەكەتتىك دەڭگەيدە ناسيحاتتالسا دەگەن ويىن ايتتى. سونداي-اق, ول «تۋعان جەر» جوباسىنا توقتالىپ, اقتوبە وبلىسىندا ىسكە اسىرىلىپ جاتقان ەكونوميكالىق-الەۋمەتتىك جوبالاردىڭ باسى-قاسىندا وتاندىق كاسىپورىنداردىڭ, جەرگىلىكتى ازاماتتاردىڭ تۇرعانىن اتاپ ءوتتى.
ۇلتتىق كوميسسيا وتىرىسىنىڭ بارىسىندا, جۇمىس توپتارىنىڭ جەتەكشىلەرى اتالدى.
مەملەكەتتىك ءتىلدى لاتىن قارپىنە كوشىرۋ جونىندەگى جۇمىس توبىن ءتىل ءبىلىمى ينستيتۋتىنىڭ ديرەكتورى ە.قاجىبەك; «جاڭا گۋمانيتارلىق ءبىلىم. قازاق ءتىلىندەگى 100 جاڭا وقۋلىق» جوباسى بويىنشا جۇمىس توبىن ءبىلىم جانە عىلىم مينيسترى ە.ساعاديەۆ پەن «Wikibilim» قوعامدىق قورى قامقورشىلار كەڭەسىنىڭ توراعاسى ر.كەنجەحان ۇلى; «تۋعان جەر» جوباسى بويىنشا جۇمىس توبىن پرەزيدەنت اكىمشىلىگى باسشىسىنىڭ ورىنباسارى و.ورازالين مەن ەۋرازيا ۇلتتىق ۋنيۆەرسيتەتىنىڭ رەكتورى ە.سىدىقوۆ; «قازاقستاننىڭ كيەلى جەرلەرىنىڭ گەوگرافياسى» جوباسى بويىنشا جۇمىس توبىن مادەنيەت جانە سپورت ءمينيسترى ا.مۇحامەدي ۇلى مەن تاريح جانە ەتنولوگيا ينستيتۋتىنىڭ ديرەكتورى ح.ءابجانوۆ; «جاھانداعى زاماناۋي قازاقستاندىق ءمادەنيەت» جوباسى بويىنشا جۇمىس توبىن پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى ا.بالاەۆا مەن سىرتقى ىستەر ءمينيسترى ق.ءابدىراحمانوۆ; «قازاقستاننىڭ 100 جاڭا تۇلعاسى» جوباسى بويىنشا جۇمىس توبىن قحا حاتشىلىعىنىڭ مەڭگەرۋشىسى د.مىڭباي مەن اقپارات جانە كوممۋنيكاتسيالار ءمينيسترى د.اباەۆ باسقاراتىن بولدى.
ەندى ءاربىر جۇمىس توبى ءبىر ايلىق مەرزىمدە قاجەتتى رەسۋرستىق قامتاماسىز ەتۋدى ەسكەرە وتىرىپ, وزدەرىنىڭ ءىس-قيمىل الگوريتمىن ۇسىنادى. بۇعان قوسا, قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ءىس-شارالار جوسپارى مەن كوميسسيا جۇمىسىن رەگلامەنتتەيتىن ۇلتتىق كوميسسيا تۋرالى ەرەجە قارالدى.
ۇلتتىق كوميسسيا ءتوراعاسى جۇمىس توپتارىنىڭ جەتەكشىلەرىنە ءوز جۇمىستارىنا الدىڭعى قاتارلى ساراپشىلاردى تارتۋدى تاپسىردى. «سونداي-اق, ساياسي پارتيالاردى, «اتامەكەن» ۇلتتىق كاسىپكەرلەر پالاتاسىن, ساراپشىلار مەن عالىمداردى بۇل ۇدەرىسكە بەلسەندى قاتىسۋعا شاقىرامىن. كوميسسيا قازاقستاننىڭ بارلىق ازاماتتارىنىڭ ۇسىنىستارىن قاراۋعا دايىن», دەدى ءا.جاقسىبەكوۆ.
