باس كەيىپكەر اقساۋلە ءرولىن ء مادينا ايداربەكوۆا ورىنداسا, جاستىق ورلىگىمەن, سىربازدىعىمەن سۇيكىمى ارتقان كومپوزيتور نۇرتۋعاندى سۇلتان باقىتجان بەينەلەدى. كەيىپكەرلەردىڭ پسيحولوگيالىق مىنەزدەرى مەن جەكەلەگەن كورىنىستەرىن جەتكىزۋدە ميرحان تىلەۋلەس, ارداق تولەپبەرگەنوۆ, نيماتيللا زكرلاەۆ ۇلكەن ىزدەنىس ۇستىندە ەكەندىكتەرىن تانىتتى.
قويىلىمنىڭ ليبرەتتوسىن جازعان تىلەۋعازى بەيسەمبەك بولسا, رەجيسسەرى يۋري تولچكو, وپەرانى ورىنداۋشىلار – قازۇوۋ ستۋدەنتتەرى مەن ۋنيۆەرسيتەت كوللەدجىنىڭ سيمفونيالىق وركەسترى.
ادەتتە ادامي جىلى سەزىمدەر مەن ماحاببات تۋرالى ايتقاندا كوز الدىمىزعا اسەم الماتىنىڭ كەلە قالۋى زاڭدىلىق سياقتى كورىنەدى. مۇنداي جايماشۋاق كوڭىل كۇي مەن مامىراجاي ويىن-كۇلكىدەن استانا دا كەندە ەمەس ەكەن. سەرىكجان ءابدىنۇروۆ استانا قالاسىندا ءوربيتىن وقيعا نەگىزىندە جاندارى شىنايىلىقتى سۇيەتىن جاستاردىڭ جارقىن بەينەسىن جاساپتى.
بەيتانىس شاھاردىڭ تىنىس-تىرشىلىگىنەن حابارسىز نۇرتۋعاندى پويىزدان تۇسە قالعاندا-اق ەلوردانىڭ يۋ-قيۋ ءيىرىمى دەرەۋ ءيىرىپ وتكەن-ءدى. ءومىر سۇرۋگە قۇشتارلىق, دوستىق سياقتى ىزگى سەزىمدەر, باقىت جايلى ارماندار كومپوزيتوردىڭ پارتيتۋراسىندا كەرەمەت كورىنىس تاپقان.
– وپەرا استانانىڭ بۇگىنگى كەلبەتى مەن جاستار تاقىرىبىنا ارنالعان. تاريحي تاقىرىپتاردى جىرلايتىن وپەرا, بالەت, سيمفونيالار جەتەرلىك. وسى سەبەپتى استانا تاقىرىبىنا شىعارما ارناۋدى ءجون كوردىم. ءوزىم 1999 جىلى ەلورداعا العاشقىلاردىڭ ءبىرى بولىپ كەلگەنمىن. قالا كوز الدىمدا كۇن سايىن ءوسىپ كەلەدى. استانا جاستارىنىڭ تىنىس-تىرشىلىگى, ولاردىڭ جۇرەك قاعىسى, لەبى, وسىنىڭ بارلىعى مەن ءۇشىن باستى نازاردا, – دەدى س. ءابدىنۇروۆ.
وقيعا جەلىسى بويىنشا نۇرتۋعان مەن اقساۋلەنىڭ ماحابباتىنا اياستان دەگەن جىگىت جان-تانىمەن قارسى شىعادى. وسىدان ۇشجاقتى شيەلەنىس باستالادى. ارينە, قويىلىمدى «اباي», «ءبىرجان – سارا», «قىز جىبەك» سياقتى شىعارمالاردىڭ تەرەڭ كومپوزيتسيالىق قۇرىلىمىمەن سالىستىرۋعا كەلمەيدى. اۆتوردىڭ ءوزى مۇنى اتالمىش تۋىندىنىڭ تاريحي-قاھارماندىق جانردان الشاق بولۋىمەن تۇسىندىرەدى. «قازىرگى زامان بولعان سوڭ, وقيعانى تراگەدياعا اينالدىرماي, بارلىعىن بەيبىت شەشۋگە تىرىستىق», دەيدى ول.
وپەرا سينتەزدى جانر بولعاندىقتان, وركەستر, دراماتۋرگيا, حورەوگرافيا جانە بەينەلەۋ ونەرىنىڭ (دەكوراتسيا, كوستيۋم) جيىنتىعىنان تۋادى. مۋزىكانىڭ ەكپىنى مەن ديناميكالىق ىرعاعىن تاپ باسىپ, انسامبل ءۇيلەسىمىن شاشاۋ شىعارماي ۇيىستىرا بىلگەن ديريجەر دامير سانسىزباي تۇتاس وپەرانى ويناپ شىعۋدىڭ قيىن تۇستارىنا توقتالىپ ءوتتى:
– شىعارماعا جارتى جىل بويى دايىندالدىق. العاش رەت ۋنيۆەرسيتەت ستۋدەنتتەرىنىڭ ورىنداۋىمەن ساحنالانىپ وتىر. ءار ۆوكاليسپەن جەكە-جەكە جۇمىس ىستەدىك, – دەيدى ديريجەر.
وپەرادا ورىنداۋشىلىق ونەردىڭ ورنى بولەك. وبراز سومداۋدا اكتەرلىك شەبەرلىك ماڭىزدى كومپونەنتتەردىڭ ءبىرى. تۇساۋكەسەر بارىسىندا ۆوكالدىق پارتيانى ورىنداۋشىلار داۋىسىنىڭ كوركەمدىك ساپاسى مەن كۇشىنىڭ مۋزىكالىق تۇرعىدا ەسكەرىلمەي جاتقان كەيبىر تۇستارىن سيمفونيالىق وركەستر ءىلىپ اكەتىپ, كومكەرىپ كەتىپ وتىردى. ارينە, تالايلاردى تاڭعالدىرىپ جۇرگەن «استانا وپەرا» تەاترىنىڭ اتشاپتىرىم ساحناسىنىڭ جاڭاشىل, ءسانى مەن سالتاناتى جاراسقان باي دەكوراتسياسىنا قاراعاندا اۋەلگىدە ستۋدەنتتىك ساحنا تىم جۇپىنى كورىنگەنى راس. دەگەنمەن, تەاترداعى ماركەتينگ تۋرالى ايتقاندا مادريدتەگى «رەال» كورولدىك تەاترىنىڭ تاجىريبەسى ەسكە تۇسەدى. وعان قارجىنىڭ 60 پايىزىن مەملەكەت بولەدى دە, ول قالعان بولىگى دەمەۋشىلەر كومەگىمەن جينالادى. وپەرا – جەكەلەگەن مادەنيەتتەر اراسىن جاقىنداستىرا تۇسەتىن كەزدەسۋ الاڭى ەكەنىن ەسكەرسەك, كورولدىك وپەرا تەاترىنىڭ دەمەۋشىلەرمەن جۇمىس ستراتەگياسىنىڭ وسى ءبىر تۇسى ءبىزدىڭ ازاماتتاردى دا ويلاندىرسا دەيمىز.
ايا ءومىرتاي,
«ەگەمەن قازاقستان»
