ماقالانى وقۋ ءۇشىن, ودان بەلگىلى ءبىر قورىتىندى شىعارۋ ءۇشىن جازساق كەرەك-ءتى. ايتىلعان ماسەلە ايتىلعان جەردە قالادى...
بارلىعىن ىسىرىپ قويىپ, مىنا ورەسكەل قاتەنى قاراڭىز!
«ب.جىراۋ داڭعىلى 51/1».
«اگرارلىق نەسيە كورپوراتسياسى» اق مەكەمەسىنىڭ ماڭدايشاسىنا باتتيتىپ تۇرىپ شەگەلەگەن. زامانىندا «كومەكەي اۋليە» اتانىپ, ابىلاي حاننىڭ وڭ تىزەسىن باسقان كەڭەسشىسى, ايگىلى جىراۋ – بۇقارەكەڭنىڭ ارۋاعىنان ۇيالسا نەتتى؟ يا بولماسا, قالا اكىمى نۇرلان اۋباكىروۆ مىرزا بۇقار جىراۋ داڭعىلىمەن ءجۇرىپ كورمەگەن بە؟ نەمەسە...
ايگىلى پاتشا يۆان گروزنىيدىڭ ەسىمىن «ي.گروزنىي» دەپ جازىپ قويساق, قالاي شامدانار ەدى, قالاي كوزگە قوراش كورىنەر ەدى؟! تاريحتى ءبىلمەيتىن ءدۇمبىلەزدەردىڭ «ب.جىراۋىن» وقىپ جىلاۋىڭ كەرەك. بەلگىلى زاڭ تالاپتارىنا سايكەس بەكىتىلگەن كوشە اتاۋلارى جازىلعان تاقتايشالاردى قاتەسىز باسىپ, بىرىزدەندىرۋ ءتارتىبىن قاتاڭ قاداعالاۋعا الۋ شارت. قالانىڭ ساۋلەتىن, بابانىڭ ساۋلەسىن كولەگەيلەيتىن مۇنداي سوراقى قاتەلەردەن قاشان ارىلادى ەكەنبىز؟..
ميراس اسان,
«ەگەمەن قازاقستان»
قاراعاندى
