– ايدار, بىرنەشە كۇن بۇرىن عانا ءسىزدىڭ قۇرامادان كەتكەنىڭىزدى ەستىدىك. مۇنداي قادامعا نە سەبەپ بولدى؟
– مۇنىڭ ەكى سەبەبى بار. ءبىرىنشىسى, مەنىڭ ارقام مەن تىزەمنەن العان جاراقاتىما بايلانىستى بولسا, ەكىنشىسى – باسشىلارعا دايىندىعىم مەن كورسەتكىشتەرىمنىڭ ۇناماۋى.
– باسشى دەگەندە ءسىز كىمدى مەڭزەپ تۇرسىز؟
– شىنىمدى ايتسام, ول جاعىن ناقتى بىلمەيمىن. ماعان سولاي جەتتى. «كەت», دەپ تە ەشكىم ايتقان جوق. بىراق مەنىڭ ناتيجەلەرىم باسشىلىقتىڭ كوڭىلىنەن شىقپاعانىن ءتۇسىندىم.
– سوندا حالىقارالىق جارىستارداعى 5-6-ورىنداردىڭ ءوزى جەتكىلىكسىز دەگەن ءسوز بە؟
– سولاي شىعار. ماعان جالپىلاما باعا بەرىلدى. جەتكىلىكتى دارەجەدە جاتتىقپاي جۇرگەنىم دە ايتىلعان. ازياداعا مەن قاتىسقان جوقپىن. ال ۋنيۆەرسيادادا جۇلدەلى ورىندارعا ىلىگە الماعىنىمدى ءوزىڭىز دە ءبىلىپ تۇرسىز. ءسىز ايتقان ورىندار سونشالىقتى تومەن ناتيجە ەمەس شىعار, بىراق وعان ءوزىمنىڭ دە كوڭىلىم تولمادى. وزگە ارىپتەستەرىم مەدال تاعىپ تۇرعاندا, مەنىڭ قۇر قول بولعانىمدى جاۋاپتى ماماندار دا قۇپ كورمەگەن. سوعان قاراعاندا مەجە جوعارىلاعان سەكىلدى.
– ءسىز بۇل پىكىرمەن كەلىستىڭىز عوي؟ ايتپاعىم, سپورتشىلاردىڭ بارلىعى جاراقات الادى, سونان سوڭ سپورتقا قايتا ورالىپ جەڭىسكە جەتىپ جاتادى. بالكىم, ءالى ناتيجە دە جاقسارار ما ەدى...
– بۇل شەشىمگە مەن قالاي اسەر ەتە الامىن؟! قولىمنان كەلگەنشە جاتتىعىپ ءجۇردىم, ەگەر مۇنى دا از دەسە, مەن نە ىستەمەكپىن؟
– ال ءسىز بۇل تۋرالى قاي ۋاقىتتا ەستىدىڭىز؟
– ماۋسىم اياقتالعان سوڭ. بىزگە ەكى اپتالىق دەمالىس بەرگەن. سول ۋاقىتتا جينالىس ءوتىپ, مەنىڭ ماسەلەم تالقىلانسا كەرەك. باپكەر حابارلاسىپ, جىل سايىن جاسالاتىن كەلىسىمشارتتىڭ ۇزارتىلمايتىنىن ەسكەرتتى.
– باس باپكەر نە دەدى؟ قالۋ تۋرالى ۇسىنىس بولمادى ما؟
– بۇل تۋرالى ەشكىممەن ءسوز تالاستىرىپ جاتپادىم. ال باپكەر, كەرىسىنشە, مەنىڭ كەتكەنىمدى ءجون كورگەن ءتارىزدى. ول كىسى «ەگەر جاتتىعام دەسەڭ, ءوزىڭ بىلەسىڭ, بىراق ساعان ايلىق تولەنبەيدى», دەدى. وزگە باپكەرلەردىڭ دە وسى جولدى دۇرىس دەپ تاپقانىن جەتكىزدى. جاتتىعۋلاردا وزگەلەرگە قاراپ جۇرگەننەن نە وزگەرەدى, ۋاقىت جوعالتقانىم بولماسا. سوندىقتان قۇرامادان كەتتىم.
– ال شورت-ترەكتە قارجىلاندىرۋ ءتيىستى دەڭگەيدە بولدى دەي الاسىز با؟
– ءتيىستى دەڭگەي دەگەننىڭ ءوزى – سالىستىرمالىق ۇعىم. وليمپيادادان كەيىن سپورتتان كەتىپ, ءبىر جىلدان سوڭ ورالدىم. سوندىقتان كەيبىر جاعدايلاردان بەيحابار بولۋىم مۇمكىن. بىراق بۇرىنعىعا قاراعاندا جاقساردى دەۋگە بولاتىن شىعار.
– جەتكىلىكسىز جاتتىعۋ جاساۋ دەگەندى قالاي تۇسىنۋگە بولادى؟ سوندا ءسىز جاتتىعۋعا كوماندالاس ارىپتەستەرىڭىزدەن قاراعاندا ازىراق ۋاقىت بولەسىز بە؟
– وزگەلەردەن از ەكەنىن جاسىرمايمىن. سەبەبى, مەنىڭ اعزام بەرىلگەن تاپسىرمالار جۇكتەيتىن اۋىرتپالىقتارعا توزە المايدى. سوندىقتان ءوز مۇمكىندىگىمە قاراي جاتتىعاتىنمىن.
– ءسىز ۆانكۋۆەر جانە سوچي وليمپيادالارىنىڭ قاتىسۋشىسىز. ال بۇگىنگى قۇراماداعى ەڭ تاجىريبەلى سپورتشىعا قاتىستى بۇل شەشىم قانشالىقتى ءادىل دەپ سانايسىز؟
– اياق استى ايتىلعان اقپارات قوي. بىراق بۇعان مەن ءادىل, نە ادىلەتسىزدىك دەپ باعا بەرە المايمىن. «جەكە مۇددە جوق, تەك بيزنەس» دەيتىن تىركەستەگىدەي, ەشكىمدى ايىپتامايمىن.
– ءبىزدىڭ ەلدە شورت-ترەكشىلەردى دايارلايتىن بىلىكتى ماماندار از. بالكىم وسى سالادا باعىڭىزدى سىناپ كورۋ كەرەك پە ەدى...
– مۇنداي ۇسىنىس تۇسكەن جوق. بىلايشا ايتقاندا, مەنىڭ الدىمدا سپورتتان كەتۋدەن باسقا امال قالمادى. ەگەر مەنى بۇل سالادا قاجەت دەپ تاپپاسا, ءارى قاراي داميتىن, وسەتىن سالا, جالپى بولاشاعىم تۋرالى ويلانۋىم كەرەك.
– ءسىز بۇعان دەيىن دە سپورتتان كەتىپ, قايتا ورالدىڭىز. ول كەزدەردە نە سەبەپ بولعان ەدى؟
– راس, ەكى رەت شورت-ترەكپەن قوش ايتىسقانمىن. العاشقىسىندا, 2011 جىلى شارشاعاندىقتان, ءارى جوعارى وقۋ ورنىنا ءتۇسىپ جاتقاندىقتان كەتسەم, ەكىنشىسىنە كورەيلىك باپكەرمەن بولعان كيكىلجىڭ سەبەپ. ول مەنىڭ بويىمدا الەۋەتتىڭ بارىن كوردى دە, اۋىرتپالىقتى ۇدەتە ءتۇستى. ال مەنىڭ وعان شامام جەتپەيتىن. جاتتىعۋ جاساۋدان باس تارتقانىمدا, ول كىسى قول جۇمسادى. سونان سوڭ مەن قۇقىق قورعاۋ ورگاندارىنا شاعىمداندىم. مۇنى ەستىگەن باپكەرلەر مەنى كوماندادان شەتتەتتى. كورەيلىك مامان قىزمەتىنەن كەتكەن سوڭ, قۇراماعا قايتا شاقىردى. مەن كەلىسىمىمدى بەردىم.
– ال ءسىزدىڭ كەتەتىنىڭىزدى ەستىگەن وزگە جىگىتتەر نە دەدى؟
– ولارمەن بۇل تۋرالى ءالى سويلەسكەن جوقپىز. ەستىگەن دە شىعار, ويتكەنى گوللانديادا ءوتىپ جاتقان وقۋ-جاتتىعۋ جيىندارىنا بارعان جوقپىن عوي. نەگىزى قارىم-قاتىناسىمىز جامان ەمەس ەدى. بۇعان دەيىنگى نيدەرلاندىدا وتكەن جاتتىعۋ جيىندارىندا ءبىر بولمەدە تۇردىق. دەگەنمەن ولاردان قولداۋ كۇتتىم دەپ تە ايتا المايمىن. ولار نە وزگەرتە الادى؟!
– جوسپار دەپ قالدىڭىز. بولاشاققا قاتىستى قانداي ماقساتىڭىز بار؟
– قازىر سول تۋرالى ويلاپ ءجۇرمىن. باسقا سالاعا اۋىسۋىم دا مۇمكىن. ەكىنشى ماماندىققا وقۋعا تۇسسەم بە دەگەن جوسپار دا بار.
– سپورتتا جۇمىسسىز قالامىن دەپ قورقاسىز با؟
– مۇنى قورقىنىش دەگەننەن گورى تاجىريبە دەگەن دۇرىس شىعار. سول تاجىريبە كورسەتكەندەي, بۇل سالا تۇراقسىز بولىپ شىقتى. ءبىر-اق كۇندە سەنىمەن قوش ايتىسۋى مۇمكىن.
سۇحباتتاسقان ءمادينا اسىلبەك
استانا
