بالا بەيمەزگىل جۇرسە – قىلمىستىڭ قۇربانى بولادى

رەسپۋبليكادا ءوتىپ جاتقان «ءتۇن­گى قالاداعى بالالار» اكتسياسىن قوس­تا­ناي وبلىسىنىڭ پوليتسەيلەرى مەن ءبىلىم بەرۋ سالاسى قىزمەت­كەر­لەرى دە قول­داپ, ونىڭ شەڭبەرىندە ءتۇرلى شارالار وتكىزدى. جاقىندا وب­لىس ورتالىعىن­داعى №18 مەكتەپتە بالالار مەن جاسوسپىرىمدەر تاربيە­سىنە قاتىستى «دوڭگەلەك ۇستەل» ءما­جىلىسى ءوتتى. بۇل شاراعا تەك ماماندار عانا ەمەس, بالالاردىڭ وزدەرى دە قاتىستى. گۇلزات بورانباەۆا ءبىراز جىلداردان بەرى وسى مەكتەپتە ۋچاسكەلىك ينسپەكتور بولىپ قىزمەت ىستەيدى. تاجريبەسى مول. ول جۇمىس­تىڭ جەمىستى بولۋى ەڭ الدىمەن بالالارمەن ءتىل تابىسۋ دەپ بىلەدى. «دوڭگەلەك ۇستەلگە» قاتىسقانداردى مەكتەپ وقۋشىلارىنىڭ قۇقىقتىق ءبىلىمى تاڭقالدىردى. ۇلدار مەن قىز­دار رەسپۋبليكامىزدىڭ قىل­مىس­تىق پرو­تسەسسۋالدىق كودەكسىنىڭ كەز كەلگەن بابىن كوزىن جۇمىپ وتىرىپ ايتىپ بەرەدى. وزدەرىنىڭ قۇقىعى مەن مىندەتتەرىن جەتىك بىلەدى. ارينە, بۇل ولارمەن كۇندەلىكتى جۇمىس ىستەيتىن ۋچاسكەلىك ينسپەكتور گۇلزات بورانباەۆانىڭ ەڭبەگى­نىڭ ناتيجەسى. – زاڭ بويىنشا كامەلەتكە تول­ماعان بالالار قىس ايلارىندا ءتۇن­­گى ساعات 22-دەن, جاز ايلا­رىن­دا 23-تەن كەيىن كوشەدە, ويىن-ساۋىق وتەتىن ورىنداردا جۇرمەۋى ءتيىس. بۇل ءجو­نىن­دە پەداگوگتار مەن پوليتسيا ينس­پەكتورلارى بال­ا­لار­عا ۇنەمى ايتۋدان جالىقپاي­مىز. بىراق ءبىزدى بالالاردان گورى اتا-انالاردىڭ سالعىرت­تىعى ويلانتا­دى. كوپتەگەن كىسىلەر بالالارى­نىڭ ساباق ۇلگەرىمىنە, ولار­دىڭ تۇنىمەن قايدا جۇرەتىن­دىگىنە سەرگەكتىكپەن قارامايدى, – دەيدى ۋچاس­كەلىك ينسپەكتور گۇلزات بورانباەۆا. – تۇنىمەن كوشە كەزگەن بالالار قۇقىق ەرەجەسىن بۇزىپ عانا قويمايدى, وزدەرى قىلمىستىڭ قۇربانىنا اينالادى. گۇلزاتتىڭ ايتۋىنشا, تۇندە بەيمەزگىل جۇرەتىن جاسوسپىرىمدەر ءوز­دە­رىن پوليتسەيلەر توقتاتىپ, شا­قىر­عان­نان كەيىن عانا تۇندە قى­دىرۋدى ازاي­تادى. ولار پوليتسەي فورماسى­نان قاي­مىقسا دا, قىل­مىستىڭ, جاي­سىز وقي­عانىڭ ال­دىن الۋ جۇمىس­تا­رىنا تۇسىنىستىك­پەن قا­را­سا دا, ءاي­تەۋىر, ولار­­دان اياعىن تار­تادى. سو­نىڭ ارقاسىندا جىل­دىڭ با­سى­نان بەر­گى ءۇش اي ىشىندە وبلىس­تاعى كا­مە­­لەت­كە تولماعاندار جاساعان قىلمىس وتكەن جىلدىڭ وسى مەرزىمىمەن سا­لىس­تىرعاندا 77-دەن 44-كە دەيىن ازايدى. –جاسوسپىرىمدەرمەن جۇرگىزىلە­تىن پروفيلاكتيكالىق جۇمىستار­دىڭ اۋ­قى­مى كەڭ. كۇن قۇرعاتپاي ءتۇرلى شارالار وتكىزەمىز. «ءجاسوس­پى­رىم», «قۇقىق­تىق ءتارتىپ» سياق­تى اكتسيالار تەك بالالار مەن جاس­وسپىرىمدەردىڭ عانا ءتارتىبىن با­قى­لايدى. ونىڭ اراسىندا «قو­لاي­سىز اۋداندار» بولىپ سانالا­تىن جەكە ۇيلەر ورنالاسقان كو­شە­لەر مەن شا­عىن اۋداندارعا ار­نايى رەيدتەر جاسالىپ تۇرادى. ءۇش ايدىڭ ىشىندە وبلىس قالا­لا­رى مەن اۋدان­دا­رىن­دا ءتارتىپ بۇز­عان 701 ءجاسوس­پى­رىم تىزىمگە الىن­دى, – دەيدى وب­لىستىق ىشكى ىستەر دە­پارتامەنتى قوعامدىق قاۋىپ­سىز­د­ىك باسقارماسى­نىڭ ەرەكشە تاپ­سىر­مالار ءجونىن­دەگى اعا ينسپەك­تو­رى, پوليتسيا مايورى جۇماباي قوزىباەۆ. ىشكى ىستەر دەپارتامەنتى ما­مان­دارىنىڭ ايتۋىنشا, قازىر اتا-انالار تاراپىنان بالالاردىڭ ءتارتىبى بوساڭسىپ كەتكەن. مىسالى جىل باسىنان بەرگى ۋاقىتتا بەرەكەسىز 491 وتباسى ەسەپكە الىندى. ولار­دىڭ 172-ءى اكىمشىلىك جاۋاپكەرشىلىككە تارتىلدى. ال وسىن­داي جاۋاپكەرشىلىكسىز اتا-انالار­دىڭ قولىندا 809 بالا تاربيە­نە­لەنىپ جاتىر. ەشقانداي شاراعا كونبەگەن 20 ادام اتا-انالىق قۇ­قى­نان ايىرىلدى. «دوڭگەلەك ۇستەل» ماجىلىسىندە قوس­تاناي قالاسىنداعى ءجاسوس­پى­رىم­دەر ءىسى جانە ولاردىڭ قۇقىن قور­­عاۋ ءجو­نىندەگى كوميسسيانىڭ حات­شىسى مايا مۇراتباەۆا بەرەكەسىز وتباسى­لارىمەن جۇرگىزىلگەن جۇ­مىس­­تار ءجو­نىندە اڭگى­مە­لەدى. با­ل­اعا اتا-انادان ۇلگى, ولاردان تىيىم بول­ماسا, ول وتباسىندا ەلى­مىزدىڭ بو­­لاشاعىن سەنىپ تاپسى­راتىن, قو­عام­عا پايدالى ازامات ءوسىپ قالىپ­تاس­پايدى. سون­دىق­تان پوليتسيا قىز­مەت­كەرلەرىنە بالالاردان بۇرىن اتا-انالاردىڭ ءتار­بيە جۇمىسىمەن اينا­لىسۋىنا تۋرا كەلەدى. ءماجى­لىس­تە كوميسسيا حاتشىسى وعان قا­تى­سىپ وتىر­عان جاسوسپىرىمدەرگە دە ساۋالدار قوي­دى. اتا-انالار­دىڭ ءتۇن­گى ساعات 22-دەن كەيىن بەيبەرەكەت جۇرۋگە تىيىم سال­عا­نىنا بالا­لار­دىڭ ءوز­دەرى دە قارسى ەمەس. جاس­وسپىرىم­دەردىڭ پىكىرىنشە, ولار جاز اي­لارىندا تۇندە كوشەدە كو­بىرەك قىدىرۋدى قالايدى ەكەن. الاي­دا, ۇستازدار قاۋىمى جازدا قىلمىس­تىڭ ازايمايتىندىعىن, سوندىق­تان بالالار ولاردىڭ قۇر­با­نىنا اينال­ماۋى ءۇشىن ۇيگە ۋاقى­تى­لى كەلۋىن ەسكەرتتى. بالالاردىڭ قۇقىعى مەن ءمۇد­دە­سىن قورعاۋ جونىندەگى سەكتوردىڭ ما­ما­نى ارمان بيساقالوۆتىڭ اي­تۋىن­شا, جاسوسپىرىمدەر قالا­لار­دا ءوز­دەرى­نە ارنالعان سەنىم تەلە­فونى بار­لى­عىنان حابارسىز بولا­دى. ولار زارداپ شەكسە دە, اتا-اناسى ۇرسادى دەپ, شاعىمدانۋعا قورقادى. سون­دىق­تان بالانىڭ اۋىر جاعدايعا ۇشى­راعانى تۋرا­لى ولاردىڭ كور­شى­لەرى مەن مۇعالىمدەرى حابارلايدى. قۇقىق قورعاۋ ورگاندارى, ۇس­تاز­دار جانە بالالاردىڭ قاتىسۋى­مەن بولعان باسقوسۋدا جاس بۋىن ءتار­بيە­سى مەن اتا-انالارعا قاتىس­تى تاعى دا كوپتەگەن ماسەلەلەر كوتەرىلدى. «بۇگىنگى بالا تاربيەسى­نىڭ باعىتى قانداي بولۋى كەرەك؟», «جاۋاپكەرشىلىك جۇگىن كىم قانشا­لىقتى تۇسىنە الىپ ءجۇر؟» دەگەن ساۋالدارعا كوپ بولىپ جاۋاپ ىزدەدى. ال ەلدىڭ بولا­شاعىن ويلاعان ءار قازاقستاندىققا بۇل ورتاق ماسەلە بولۋى كەرەك. ءنازيرا جارىمبەتوۆا. قوستاناي.