كەڭەس ءداۋىرىنىڭ پاتريوتتىق تاقىرىپتا تۇسىرىلگەن ۇزدىك فيلمدەرىنىڭ ءبارى فەستيۆالدىڭ مۇراجايارالىق «ۆوينا وكونچەنا» باعدارلاماسىنىڭ شەڭبەرىندە كورسەتىلەدى. فەستيۆالدى ا.س. پۋشكين اتىنداعى بەينەلەۋ ونەرىنىڭ مەملەكەتتىك مۇراجايى (گمي), مەملەكەتتىك ترەتياكوۆ گالەرەياسى (گتگ), ماسكەۋ مۇراجايى جانە گوركي ساياباعى ۇيىمداستىرعان.
«اتامەكەن» ءفيلمىنىڭ وقيعا جەلىسى ەكىنشى دۇنيەجۇزىلىك سوعىسىنان ءبىر جىل وتكەننەن كەيىنگى ۋاقىتتى باياندايدى. ءفيلمنىڭ باستى كەيىپكەرلەرى اتا مەن نەمەرە – سوعىستا لەنينگراد تۇبىندە ەرلىكپەن قازا تاپقان بالاسىنىڭ سۇيەگىن تاۋىپ, تۋعان جەرىنە الىپ كەلۋ ءۇشىن پويىزبەن رەسەيگە اتتانادى. الايدا مولاعا جەتكەن ولار ساربازدىڭ سوعىستاعى جولداستارىمەن ءبىر قابىردە جاتقانىن بىلەدى. قاتتى قامىققان قاريا قايعى جۇتىپ تۇرسا دا, ونى مازالاماۋدى ۇيعارادى. ويتكەنى ورتاق قايعى ەرلىكپەن شەيىت بولعان ساربازداردى ماڭگىگە تۋىس قىلدى. ءفيلمنىڭ يدەياسى – «ءبىزدىڭ وتانىمىزدىڭ ءاربىر جەرى ساربازدار ءۇشىن اتامەكەن بولىپ قالا بەرمەك». ستسەناريىن ولجاس سۇلەيمەنوۆ جازعان.
فيلم تۋرالى شاكەن ايمانوۆ ءوز ەستەلىگىندە: «ءبىزدىڭ فيلم كورەرمەنگە وي سالۋ ءۇشىن, ءوزى دامىتا الۋى ماقساتىندا تۇسىرىلگەن. كەيىپكەرلەردىڭ تۋعان جەر شەكاراسىنان ءوتىپ, ادامدارمەن تانىسىپ, سوعىستىڭ كەسىرىنەن قيراعان ورىس جەرىن كورسەتۋ ماڭىزدى ەمەس. ءبىز ءۇشىن, قاريانىڭ ءفيلمنىڭ سوڭىندا الەمگە, ادامدارعا دەگەن كوزقاراسىنىڭ وزگەرگەنىن كورسەتۋ ماڭىزدى بولدى» دەيدى. («شاكەن ايمانوۆ. و سەبە, و سۆوەم يسكۋسستۆە», ماسكەۋ, 1974 گ.)
«اتامەكەن» ءفيلمى قازاق كسر-نىڭ مەملەكەتتىك سىيلىعىمەن ماراپاتتالدى (1968 ج.). فيلمدە قاريا بەينەسىن سومداعان ەلۋباي ومىرزاقوۆ تا مەملەكەتتىك سىيلىقتى يەمدەندى. سونداي-اق, فيلمگە مۇرات احماديەۆ, يۋري پومەرانتسەۆ, ءامينا ومىرزاقوۆا, شولپان التايباەۆا جانە تاعى باسقالارى تۇسكەن.
«ۆوينا وكونچەنا» باعدارلاماسىنىڭ شەڭبەرىندە كەڭەس جانە باتىس ەۋروپانىڭ فيلمدەرى كورسەتىلمەك. ولاردىڭ اراسىندا: «گەرمانيا, گود نۋلەۆوي» (روبەرتو روسسەلليني, يتاليا, 1947), «كرەست زا وتۆاگۋ» (كازيمەجا كۋتسا, پولشا, 1959), «مير ۆحودياششەمۋ» (الەكساندر الوۆ پەن ۆلاديمير ناۋموۆ كسرو, 1961), «نيكتو نە حوتەل ۋميرات» (ۆيتاۋتاس جالاكياۆيچۋس, رەسەي/ ليتۆا, 1965), «حولودنىە دني» (اندراش كوۆاچ, ۆەنگريا, 1966), «دۆا فەدورا» (مارلەن حۋتسيەۆ, رەسەي-ۋكراينا, 1985 گ.), «بەزۋميە» (كاليو كيسك, رەسەي / ەستونيا, 1968) جانە تاعى باسقالار.
سونىمەن قاتار, «جىلىمىق» كەزەڭىنىڭ مادەنيەتىنە, ساۋلەتىنە, ونەرىنە جانە سوعىسسىز الەمگە ارنالعان دەرەكتى فيلمدەردىڭ كورسەتىلىمى وتكىزىلەدى. فەستيۆالدىڭ شەڭبەرىندە ماسكەۋدىڭ ءارتۇرلى مادەني الاڭدارىندا دارىستەر وقىلىپ, دوڭگەلەك ۇستەلدەر, سۋرەت كورمەلەرى, كونتسەرتتەر مەن پوەزيا وقۋلارى وتەدى.
ايگۇل احانبايقىزى,
«ەگەمەن قازاقستان»
الماتى
