سپورت مەرەكەسىنىڭ اشىلۋ سالتاناتىندا ءسوز العان وبلىس اكىمى نۇرلان نوعاەۆ: «ەلباسىمىز قازاقستاندىقتاردى تۇراقتى تۇردە سپورتپەن اينالىسۋعا شاقىرادى جانە وسى ىستە ۇلگى بولىپ كەلەدى. بۇگىندە اتىراۋلىقتاردىڭ 25 پايىزى سپورتپەن شۇعىلدانادى. پرەزيدەنت تاپسىرماسىنا سايكەس بۇقارالىق سپورتتى دامىتۋدا اتىراۋ ايماعىندا ىلكىمدى ىستەر بار. وبلىس ورتالىعىندا عانا ەمەس, اۋىلداردا دا سپورتتىق نىساندار كۇردەلى جوندەۋدەن ءوتىپ, جاڭادان سالىنىپ جاتىر. سپورتتىڭ قاي تۇرىمەن دە اينالىسۋعا مۇمكىندىك بار» - دەپ اتاپ ءوتتى.
جارىس ناتيجەسىندە كوماندالىق ەسەپ بويىنشا يران ەلىنەن كەلگەن سپورتشىلار ءبىرىنشى ورىندى جەڭىپ الدى. كورەيا ەكىنشى, تايلاند ءۇشىنشى ورىننىڭ مارەسىنەن كورىندى. ال ءتورتىنشى ورىندى قازاقستاندىقتار ەنشىلەدى.
چەمپيونات قوناقتارىنىڭ جارىستان تىس ۋاقىتتارىن ءتيىمدى پايدالانۋ ماقساتىندا جايىق جاعاسىندا ەتنواۋىل بوي كوتەردى. ول جەردە ۇلتتىق قۇندىلىقتارىمىز مەيماندار نازارىنا ۇسىنىلدى. سونداي-اق, «اتىراۋ» دەنە شىنىقتىرۋ-ساۋىقتىرۋ كەشەنىنىڭ الدىندا ازيا تاەكۆوندوشىلارىنىڭ اللەياسى پايدا بولدى. ەكولوگيالىق «بايتاق بولاشاق» اليانسى قالا كوشەلەرىنە تال ەكتى. شاراعا تاەكۆوندو ازيا بىرلەستىگىنىڭ پرەزيدەنتى لي كۋي سيۋك, بەيجىڭ وليمپياداسىنىڭ قولا جۇلدەگەرى ارمان شىلمانوۆ, قر تاەكۆوندو فەدەراتسياسىنىڭ اتقارۋشى ديرەكتورى ماقسات يبراەۆ پەن وبلىستىق تاەكۆوندو فەدەراتسياسىنىڭ پرەزيدەنتى ارمان توعاەۆتار قاتىستى.
باقىتگۇل باباش,
«ەگەمەن قازاقستان».
اتىراۋ
