مەملەكەت باسشىسى جوسپاردان تىس جۇمىس ساپارى بارىسىندا ەلوردانىڭ وڭ جاعالاۋىنداعى تەمىرجول ۆوكزالىنىڭ قىزمەتىمەن تانىسىپ, ۆوكزال ماڭىنداعى الاڭدا قالا قوناقتارىمەن, تۇرعىندارمەن كەزدەستى.
نۇرسۇلتان نازارباەۆ «سارىارقا» اۋدانىنىڭ تۇرعىندارىمەن اڭگىمەلەسىپ, ولارعا تابىس پەن باق-بەرەكە تىلەدى, سونداي-اق قالانىڭ كوممۋنالدىق شارۋاشىلىق سالاسى قىزمەتىنىڭ جۇمىسى تۋرالى ويلارىن تىڭدادى.
– مەن جاس مامان رەتىندە 10 جىلعا جۋىق پاتەر كەزەگىندە تۇردىم. قازىر زامان باسقا. ۇمتىلىسسىز ەشتەڭەگە قول جەتپەيدى. تابىسقا جەتۋ ءۇشىن جاتپاي-تۇرماي جۇمىس ىستەۋ قاجەت, سوندا عانا ەڭبەكتىڭ جەمىسىن تاتا الاسىزدار, – دەدى ەلباسى «سارىارقا» اۋدانىنداعى تۇرعىن ءۇي كەشەنىنىڭ ءبىرىنىڭ تۇرعىندارىمەن اڭگىمەلەسۋ بارىسىندا.
قازاقستان پرەزيدەنتى قالانىڭ قىسقى ماۋسىمنان كەيىنگى جاعدايىنىڭ جاقسى ەكەنىنە توقتالىپ, شاھاردىڭ قىزمەت كورسەتۋ مەكەمەلەرى جۇمىسىنىڭ ناتيجەلەرىن جانە ەلوردانى اباتتاندىرۋ, تازالىقتى ساقتاۋ جۇمىستارىن جالعاستىرۋ قاجەتتىگىن اتاپ ءوتتى.
مەملەكەت باسشىسى اۆتوموبيل جولدارىنداعى كەپتەلىس پروبلەمالارى مەن كولىك قوياتىن ورىنداردىڭ جەتىسپەۋشىلىگىنە نازار اۋداردى.
– جولداردا كولىك وتە كوپ. قالا باسشىلىعى بۇل ماسەلەنى شەشۋدىڭ جولدارىن قاراستىرۋى كەرەك. قاجەت بولعان جاعدايدا, شەتەلدىك تاجىريبە زەرتتەلۋگە ءتيىس. سونىمەن قاتار ءتۇرلى عيماراتتاردىڭ, ساۋدا ۇيلەرى مەن دۇكەندەردىڭ يەلەرى ارىپتەستەرىمەن بىرلەسىپ, ءوز اۋماعىنداعى تازالىق پەن ءتارتىپتى قامتاماسىز ەتۋى قاجەت, – دەدى ەلباسى.
نۇرسۇلتان نازارباەۆ قالانىڭ «ەكسپو-2017» حالىقارالىق كورمەسىنە ۋاقتىلى دايىندىعىنىڭ ماڭىزدىلىعىن ايتىپ, بارلىق تۇرعىنداردى ەلوردانى كوگالداندىرۋ ىسىنە بەلسەنە اتسالىسۋعا شاقىردى.
