جەدەل قۇتقارۋ شتابىنىڭ اقپاراتى بويىنشا, قاراسۋ اۋدانىنداعى جامبىل اۋىلىندا 16 ءۇي مەن وسىنشا ءۇيدىڭ اۋلاسى سۋدا قالعان. قارعىن سۋدىڭ دەڭگەيى تومەندەپ جاتىر. 53 اۋىل تۇرعىنى, ونىڭ ىشىندە 14 بالا ۇيلەرىنە قايتىپ ورالدى. بىراق ءالى دە 48 ادام, ونىڭ ىشىندە 8 بالا تۋىستارىنىڭ ءۇيىن پانالاپ وتىر.
قۇتقارۋشىلار سۋدا قالعان ۇيلەردىڭ اۋلاسىنداعى قارعىن سۋدى ارنايى تەحنيكالارمەن سورىپ الىپ, ارىقتار ارقىلى سىرتقا توگۋ جۇمىستارىن جەدەل جۇرگىزىپ جاتىر. اۋىلدا متز, ك-700 تراكتورلارى, تيەگىش پەن ەكسكاۆاتورلار اۋلالار مەن كوشەلەردى تازارتۋ جۇمىستارىنا جەگىلگەن. وتكەن ءبىر تاۋلىك ىشىندە ۇيلەردىڭ اۋلالارىنان 24468 تەكشە مەتر سۋ سورىلىپ, دالاعا توگىلدى. سۋى كەتكەن اۋلالار كەبۋگە بەت الدى.
ءنازيرا جارىمبەتوۆا,
«ەگەمەن قازاقستان»
قوستاناي وبلىسى
